iWasewase Lalai ni Dra kei na Veisele

iWasewase lalai ni dra. Qo e wasei mai na va na iwasewase lelevu ni dra, na red cell, white cell, platelet kei na plasma. Kena ivakaraitaki, e tiko ena red cell na protein hemoglobin. Eso na ka e kau mai na noda hemoglobin kei na nodra na manumanu e dau vakayagataki vei ira e lailai nodra dra se sivia na dra e lako tani mai yagodra.

E dua na iwase levu se rauta ni 90 na pasede ni plasma e wai qai levu kina na hormone, eso na mataqali masima, enzyme, na nutrient, wili kina na mineral kei na suka. E tiko tale ga ena plasma na ka e vakavuna me cevata na dra (clotting factor) kei na ka e valuta na manumanu ni mate kei na protein me vaka na albumin. Ke dua e donuya na ituvaki ena rawa ni tauvi koya kina e dua na mate, era na rairai vakatura na vuniwai me cula ena gamma globulin e kau mai na plasma ni nodra dra o ira e sega ni tauvi ira rawa na mate ya. Na white blood cell e tiko kina e dua na mataqali wai e vakatokai na interferon kei na interleukin e rawa ni vakayagataki me valuti kina na manumanu lalai e dau vakadewa na kenisa kei na mate tale eso.

Me vakadonuya beka na lotu vaKarisito me vakayagataki na iwasewase lalai ni dra ena veiqaravi vakavuniwai e caka vua? Sega ni tukuna na iVolatabu na ka me caka, e dodonu gona me vakatulewa sara ga na lotu vaKarisito yadua ni vakayagataka nona lewaeloma. Nira vakasamataka nodra vakaroti na Isireli ena Lawa mera “livia ga ena qele” na dra ni manumanu, era na sega kina ni vinakata eso na lotu vaKarisito me vakayagataki vei ira na iwasewase lalai kece ni dra. (Vakarua 12:22-24) So tale era sega ni via tauri dra se na kena iwasewase lelevu, ia era vakadonuya na veiqaravi e vakayagataki kina e dua vei ira na iwasewase lalai. De ra nanuma ni iwasewase lalai ni dra sa sega ni vakatakarakarataka na nona bula o itaukei ni dra baleta sa wasei tani mai na dra taucoko.

Ni vinakati mo vakatulewa me baleta na iwasewase lalai ni dra, ena vinaka mo taroga: Noqu sega ni vinakata na iwasewase lalai kece ni dra, au kila beka ni okati kina na wainimate e caka mai na dra me valuta na mate se me vakacevatataka na dra me tarovi kina na kena drodro vakayauyau? Au rawa ni vakamacalataka vei vuniwai na vuna au vakadonuya kina se sega na iwasewase lalai ni dra?

iWalewale ni Veisele. E okati eke na hemodilution kei na cell salvage. Ena hemodilution, e vakadrodroi tani mai na yago na dra, sosomitaki toka vakawawa ena wainimate me vakalevutaka na dra, oti sa qai vakadrodroi lesu na dra ina yago. Ena cell salvage, na dra e drodro tani ena gauna ni veisele e kumuni qai tauvuloni. Na dra tale ga mai na mavoa e rawa ni vakasavasavataki qai vakasukai vua e mavoa. Ia me vaqaqa vinaka na lotu vaKarisito na ka e via cakava o vuniwai ni sega ni tautauvata na iwalewale e taurivaka na vuniwai yadua.

Ni o bera ni vakatulewa, ena vinaka mo taroga: ‘Ke vakadrodroi tani mai yagoqu eso na dra qai mudu tu vakalailai na kena drodro, ena vakatulewataka beka noqu lewaeloma ni se noqu dra tiko ga oya qai sega ni dodonu me ‘livi ina qele’? (Vakarua 12:23, 24) Ena vakaleqai beka noqu lewaeloma vakavulici vakaivolatabu ke vakadrodroi tani mai yagoqu eso na dra ena gauna ni veisele, waki vata kei na so na wainimate qai vakadrodroi lesu i yagoqu? Keu sega ni vakadonuya na veiqaravi vakavuniwai e vakayagataki ga kina noqu dra, au kila niu na sega tale ga ni vakadonuya me dikevi na noqu dra, me vakayacori vei au na hemodialysis, se vakayagataki vei au ena gauna ni veisele na misini e pamutaka na dra ina uto kei na yatevuso?’

Na lotu vaKarisito yadua ena vakatulewataka na ka me caka ena nona dra ena gauna ni veisele. Qori e okati kina na vakadidike se veiqaravi vakavuniwai e caka me baleta na nomu dra me vaka na kena vakadrodroi tani mai yagomu, vakasavasavataki qai vakadrodroi lesu.