Vakayaloqaqataki Ilaija o Jiova

Ni rogoca o Jesepeli na ka e yacovi ira na parofita i Peali, dua na ka nona cudru. E mani tala e dua me tukuna vei Ilaija: ‘Nimataka, o na mate tale ga vakataki ira na parofita i Peali.’ E rere sara ga o Ilaija, e mani dro ina vanua talasiga. E masuta: ‘I Jiova, au sa sega ni vosota rawa. Meu mate ga.’ Ena levu ni nona wawale, e lutu sara ga nona moce ena ruku ni vunikau.

E lai vakayadrati koya e dua na agilosi qai tukuna vakamalua vua: ‘Duri mo kana.’ E raica o Ilaija e dua na ibuli madrai mokimokiti e tavu ena vatu katakata kei na dua na saqa wai. E kana sara, gunu, e moce tale. E vakayadrati koya na agilosi ena ikarua ni gauna, e kaya: ‘Mo kana ni se balavu na ilakolako.’ E kana tale o Ilaija. Oti e lako sara i Ulu i Orepi, e taura e 40 na siga 40 na bogi me yaco i kea. E lai moce ena dua na qaravatu qai vosa vua o Jiova, e kaya: ‘Na cava o cakava tiko eke Ilaija?’ E sauma: ‘Era sa biuta na Isireli na nodra veiyalayalati kei kemuni. Era vakarusa na nomuni icabocabonisoro ra qai vakamatei ira nomuni parofita. Qo era sa via vakamatei au tale ga.’

E kaya vua o Jiova: ‘Curu i tuba, mo duri ena ulunivanua.’ E liwa mai e dua na cagi kaukaua ena yasa ni qaravatu. Oti e uneune qai tarava mai na bukawaqa. E rogoca sara e dua na domo malumu, e rogo lailai. E ubia o Ilaija na matana qai duri donuya na qara. E taroga o Jiova se cava e dro kina. E sauma: ‘Sa vo ga o yau.’ Ia e kaya o Jiova: ‘Sega ni o iko duadua ga. Era se qaravi au tiko e le 7,000 e Isireli. Lako, lesi Ilaisa me parofita, me sosomitaki iko.’ E lako sara o Ilaija me cakava na ka e tukuni vua. Vakacava ena vukei iko tale ga o Jiova ke o cakava na ka e vinakata? Io ena vukei iko dina. Meda raica mada na ka e yaco ena gauna ni lauqa.