Vosoti Jona o Jiova

E ca nodra ivakarau na lewe i Ninive, qo e dua na koro e Asiria. E kaya o Jiova vua na parofita o Jona me lai vakasalataki ira mera veisau. Ia e dro ena dua tale na yasana ni vodo ena dua na waqa e vakarau soko i Tasisi.

Ni toso na waqa i wasawasa, e yaco e dua na draki ca levu ra qai rere na kaiwaqa. Era dui masuta nodra kalou: ‘Cava e yaco kina qo?’ E qai tukuna vei ira o Jona: ‘Qo e bale vei au. Au drovaka na ka e tukuna o Jiova meu cakava. Ni biuti au i wai me maravu na wasawasa.’ Era bese ni cakava qori ia e cikevi ira tiko ga o Jona. Era mani biuti koya i wai, mai maravu yani na wasawasa.

E nanuma o Jona ni sa na mate. Ni dromu e loma ni wasawasa, e masu vei Jiova. E qai tala o Jiova e dua na ika levu me tilomi koya, e sega ga ni mate. E masu o Jona mai na kete ni ika, e kaya: ‘Au yalataka meu talairawarawa tiko ga vei kemuni.’ E qai maroroi koya o Jiova ena kete ni ika me tolu na siga, oti e luaraki Jona e vanua mamaca.

Kena ibalebale qori ni sa na sega ni lako i Ninive? E kaya tale vua o Jiova me lako. Sa qai talairawarawa o Jona, e lai tukuna vei ira na tamata ca: ‘Ena 40 na siga mai qo, ena vakarusai o Ninive.’ Kila na cava? Era talairawarawa na kai Ninive ra qai veisau. E kaya o Tui Ninive vei ira nona tamata: ‘Ni masu vua na Kalou, ni veivutuni. De dua ena sega ni vakarusai keda.’ Ni raica o Jiova nira veivutuni, e sega tale ni vakarusai Ninive.

E cudru o Jona ni sega ni vakarusai o Ninive. Vakasamataka mada: E vosoti Jona o Jiova, e yalololoma vua, ia e sega ni va qori o Jona vei ira na kai Ninive. E lai vakaruru ena dua na vunivago ena taudaku ni koro, e vakaruburubu toka. Ni mate na vunikau qori, e cudru o Jona. E kaya vua o Jiova: ‘O lomana vakalevu na vunikau, o sega ni lomani ira na kai Ninive. Au lomani ira, ra mani bula.’ Na cava e vakaraitaka tiko o Jiova? E bibi na nodra bula na kai Ninive mai na vunikau.