Taniela ena Qara ni Laione

E dua tale na Tui Papiloni o Taraiasi na kai Mitia. E raica ni turaga vinaka o Taniela, mani lesi koya me nodra iliuliu na turaga vakaitutu ena vanua. Ia era vuvutaki Taniela na turaga qori, era via vakamatei koya. Nira kila ni dau masu vakatolu e veisiga o Taniela vei Jiova, era kaya sara vei Taraiasi: ‘Kemuni na tui, me buli mada e dua na lawa me keimami masu duadua ga vei kemuni. O koya e bese me biu ena qara ni laione.’ E donu vei Taraiasi na vakasama qori mani sainitaka na lawa.

Ni rogoca o Taniela na lawa vou, e lako sara ina nona vale. E tekiduru donuya na katubaleka qai masu vei Jiova. Era curu yani ina nona vale na turaga vuvu qori, era raici koya sara ni masu tiko. Era cici vei Taraiasi, ra qai kaya: ‘E talaidredre vei kemuni o Taniela. E dau masu vakatolu vua nona Kalou e veisiga.’ E taleitaki Taniela o Taraiasi, e sega ni vinakata me mate. Ena siga taucoko qori, e vakasamataka na sala me vakabulai koya kina. Ia e sega ni dua e rawa ni veisautaka na lawa sa sainitaki oti, wili kina na tui. Sa na vakaroti ira ga nona tamata mera biuti Taniela ena qara ni laione daukata.

Ena bogi qori, e sega ni moce rawa o Taraiasi ni leqataki Taniela vakalevu. Ena mataka, e cici ina qara qai kailavaka vei Taniela: ‘E vakabulai iko na nomu Kalou?’

E rogoca o Taraiasi na domo i Taniela! E tukuna vei Taraiasi: ‘Na agilosi i Jiova e sogota na gusudra na laione, era sega ni vakamavoataki au.’ Dua na ka nona marau o Taraiasi! E vakarota me kau tani mai o Taniela. E sega mada ga ni drakusi na yagona. E qai vakarota na tui: ‘Mera biu ina qara na turaga era beitaki Taniela.’ Ni bera nira tau i ra, e qurulaki ira na laione.

E vakauta o Taraiasi na ivakaro qo vei ira na nona tamata: ‘Moni doka kece na Kalou i Taniela, ni vakabulai koya mai na qara ni laione.’

Vakacava o dau masu vei Jiova e veisiga me vakataki Taniela?