Au “Vakaraici Ratou Tiko na va na Kabula”

E macala ga ni sa raica o Isikeli na ivakatakarakara vakaitamera ni bulumakau vakatabana, kei na laione e uluna na tamata nira dau yadrava tu na mata ni valenitui kei na valenisoro. Era kune vakalevu qori ena vanua makawa e Asiria kei Papiloni. A rairai wadravi ira tu na manumanu vakaitamera qori o Isikeli me vakataki ira ga na vakararai tu, eso e rauta ni 6 na mita na kena balavu. Se mani rerevaki vakacava na kedra irairai, era kamate ga, era ceuti ena vatu.

Ia o Isikeli e raivotutaka na manumanu eratou “kabula.” Sa bau duidui dina! Na kena vakatubuqoroqoro vei Isikeli na ka e raica, e cavuta kina vaka12 ena itekitekivu ni nona parofisai na vosa “kabula.” (Isik. 1:5-22) Nodratou toso vata tu na va na kabula qo ena dua ga na gauna, ena dua na vanua, ena ruku ni idabedabe vakaturaga ni Kalou, e kila kina o Isikeli ni lewa kece tu o Jiova na kabula. Eda qoroya tale ga nikua mai na raivotu qori na cecere kei na kaukau i Jiova, kei na lagilagi ni nona veiliutaki.​—1 Vei. 29:11.