• Na Cava na Matanitu ni Kalou?
    Marau me Tawamudu!—Vuli iVolatabu
    • Lesoni 31. E duri tu ena lagilagi i Jiova na Tui vakalomalagi o Jisu Karisito.

      LESONI 31

      Na Cava na Matanitu ni Kalou?

      Na usutu bibi ni iVolatabu na Matanitu ni Kalou. O Jiova ena vakayagataka na Matanitu qori me vakayacora kina na nona inaki taumada me baleta na vuravura. Na cava na Matanitu ni Kalou? Eda kila vakacava ni sa veiliutaki tiko nikua? Na cava sa vakayacora oti? Na cava ena qai cakava ena dua na gauna qo? Ena saumi na taro qori ena lesoni qo kei na rua tale na lesoni tarava.

      1. Na cava na Matanitu ni Kalou, o cei na kena Tui?

      Na Matanitu qo e tauyavutaka sara ga na Kalou o Jiova. E kena Tui o Jisu Karisito, ena veiliutaki mai lomalagi. (Maciu 4:17; Joni 18:36) E tukuna na iVolatabu me baleti Jisu: “Ena lewa vakatui . . . me tawamudu.” (Luke 1:32, 33) Ni Tui ni Matanitu ni Kalou o Jisu, ena liutaka na vuravura taucoko.

      2. O cei ena veiliutaki kei Jisu?

      Ena sega ni veiliutaki duadua o Jisu. Era digitaki eso “mai na yavusa kece, na vosa kece, na matatamata kece, kei na matanitu kece . . . mera veiliutaki vakatui, mera liutaka na vuravura.” (Vakatakila 5:9, 10) E le vica era na veiliutaki kei Karisito? Me tekivu mai na nona bula e vuravura o Jisu, e vica vata na milioni na lotu vaKarisito era sa nona imuri. Ia e 144,000 wale ga era na veiliutaki kei Jisu e lomalagi. (Wilika Vakatakila 14:1-4.) O ira na vo ni lotu vaKarisito era na bula e vuravura, era na vakarurugi ena Matanitu qori.​—Same 37:29.

      3. E uasivi vakacava na Matanitu ni Kalou mai na matanitu vakatamata?

      Ke ra saga mada ga na veiliutaki vakatamata mera caka vinaka, e sega vei ira na kaukaua mera cakava na ka kece era vinakata. Ni veisosomitaki e dua tale na iliuliu, ena rairai sega ni kauaitaki ira na lewenivanua. Ia ena sega ni dua ena sosomitaki Jisu me veiliutaki ena Matanitu ni Kalou. Ena “vakarautaka na Kalou ni lomalagi e dua na matanitu ena sega sara ni vakarusai.” (Taniela 2:44) Ena veiliutaki o Jisu ena vuravura taucoko, ena sega tale ga ni veivakaduiduitaki. E dauloloma, yalovinaka, qai lewadodonu. Ena vakavulici ira tale ga na lewenivanua ni Matanitu ni Kalou mera muria na itovo qori.​—Wilika Aisea 11:9.

      VAKEKELI

      Dikeva na vuna e uasivi kina na Matanitu ni Kalou mai na matanitu vakatamata.

      E liutaka tiko na vuravura o Jisu Karisito ena nona idabedabe vakaturaga e lomalagi. Era dabe tiko mai dakuna na veiliutaki kei koya. E ramase tiko mai dakudra o Jiova.

      4. Ena veiliutaki e vuravura taucoko e dua na matanitu kaukaua

      O Jisu Karisito duadua ga e tu vua na kaukaua me veiliutaki. Wilika Maciu 28:18, qai veivosakitaka na taro qo:

      • E uasivi vakacava na veiliutaki i Jisu mai na veiliutaki vakatamata?

      E dau veiveisau na veiliutaki vakatamata, qai tiko ga na vanua mera lewa. Ia vakacava na Matanitu ni Kalou? Wilika Taniela 7:14, qai veivosakitaka na taro qo:

      • Na cava e vinaka kina ni na “sega sara ni vakarusai” na Matanitu ni Kalou?

      • Na cava ena vinaka kina ni na veiliutaki ena vuravura taucoko?

      5. Me sosomitaki na matanitu vakatamata

      Na cava me sosomitaki kina na veiliutaki vakatamata? Sarava na VIDIO, qai veivosakitaka na taro qo.

      VIDIO: Na Cava na Matanitu ni Kalou?​—Vidio Lekaleka (1:41)

      • Na cava e yaco ni veiliutaki na tamata?

      Wilika Dauvunau 8:9, qai veivosakitaka na taro qo:

      • O nanuma ni dodonu me sosomitaka na matanitu vakatamata na Matanitu ni Kalou? Na vuna?

      6. Era kilai keda vinaka na veiliutaki ena Matanitu ni Kalou

      Na noda Tui o Jisu e mai bula vakatamata, e ‘kila vinaka na noda malumalumu.’ (Iperiu 4:15) O ira na 144,000 na tagane kei na yalewa yalodina era na veiliutaki kei Jisu, e digitaki ira o Jiova mai na “yavusa kece, na vosa kece, na matatamata kece, kei na matanitu kece.” ​—Vakatakila 5:9.

      • Vakacava e veivakacegui nida kila ni o Jisu kei ira na veiliutaki kei koya era kila vinaka na keda ituvaki? Na vuna?

      O ira na tagane kei na yalewa era lumuti ena duidui itabagauna, e duidui tale ga na nodra isususu.

      O Jiova e digitaki ira na tagane kei na yalewa e duidui na nodra isususu mera veiliutaki kei Jisu

      7. E uasivi na lawa ni Matanitu ni Kalou

      E bulia na matanitu na lawa me yaga qai taqomaki ira na lewenivanua. E tiko tale ga na lawa ni Matanitu ni Kalou mera muria na lewena. Wilika 1 Korinica 6:9-11, qai veivosakitaka na taro qo:

      • Cava o nanuma, ena vakacava tu na ituvaki kei vuravura ke da muria kece na lawa ni Kalou?a

      • O nanuma ni dodonu me namaka o Jiova meda muria na lawa ni nona Matanitu? Na vuna?

      • Eda kila vakacava ni rawa nira veisau o ira na sega ni muria tiko na lawa?​—Raica na tikina e 11.

      Dua na ovisa e soli pasi tiko ena dua na gaunisala osooso. Era takoso tiko eso e gaunisala.

      E bulia na matanitu na lawa me yaga qai taqomaki ira na lewenivanua. E uasivi sara na lawa ni Matanitu ni Kalou me taqomaki ira na kena lewenivanua qai yaga vei ira

      KE TAROGA E DUA: “Na cava na Matanitu ni Kalou?”

      • O na sauma vakacava?

      KA O VULICA

      Na Matanitu ni Kalou e dua dina na matanitu e tiko mai lomalagi, ena veiliutaki ena vuravura taucoko.

      Railesuvi

      • O cei era na veiliutaki ena Matanitu ni Kalou?

      • E uasivi vakacava na Matanitu ni Kalou mai na matanitu vakatamata?

      • Na cava eso na ka e namaka o Jiova vei ira na vakarurugi ena Matanitu ni Kalou?

      iSausau

      IKURI

      Dikeva na ka e vakavulica o Jisu me baleta na vanua e tiko kina na Matanitu ni Kalou.

      “E Tiko e Lomada na Matanitu ni Kalou?” (Ulutaga ena jw.org)

      Na cava era na yalodina kina na iVakadinadina i Jiova ena Matanitu ni Kalou sega ni matanitu vakatamata?

      Tokona na Matanitu ni Kalou (1:43)

      Dikeva na ka e tukuna na iVolatabu me baleti ira na 144,000 e digitaki ira o Jiova mera veiliutaki kei Jisu.

      “O Cei ena Lai Bula i Lomalagi?” (Ulutaga ena jw.org)

      Na cava e vakadeitaka e dua na marama e valeniveivesu ni Kalou duadua ga ena kauta mai na lewadodonu e vuravura?

      “How I Found the Answer to Injustice”(Awake!, November 2011)

      a Eso na lawa qori ena veivosakitaki ena iWasewase 3.

  • Sa Veiliutaki Tiko na Matanitu ni Kalou!
    Marau me Tawamudu!—Vuli iVolatabu
    • Lesoni 32. E taura tiko o Jisu Karisito na ititoko ni sa veiliutaki vakatui e lomalagi qai lewa na vuravura taucoko.

      LESONI 32

      Sa Veiliutaki Tiko na Matanitu ni Kalou!

      E tekivu veiliutaki na Matanitu ni Kalou e lomalagi ena 1914. E tekivu tale ga e keri na iotioti ni veisiga ni nodra veiliutaki na tamata. Eda kila vakacava? Dikeva na parofisai vakaivolatabu, na ka e yaco e vuravura, kei na itovo ni tamata me tekivu mai na 1914.

      1. Na cava sa tukuna tu mai na iVolatabu?

      E tukuni ena ivola i Taniela ni na tekivu veiliutaki na Matanitu ni Kalou ni sa cava e dua na gauna e vakatokai me “vitu na gauna.” (Taniela 4:16, 17) Ni oti e vica na senitiuri, e cavuta tale ga o Jisu na gauna qori me “nodra gauna lokuci na veimatanitu,” qai kaya ni se bera ni cava na gauna qori. (Luke 21:24) Eda na dikeva ni mai cava na vitu na gauna ena 1914.

      2. Cava e laurai ena itovo kei na ituvaki kei vuravura me tekivu mai na 1914?

      Eratou tarogi Jisu nona tisaipeli: “Na cava . . . na ivakatakilakila ni nomuni tiko, kei na ivakataotioti ni veika vakavuravura?” (Maciu 24:3) E sauma o Jisu ni levu na ka ena yaco ni sa tekivu veiliutaki vakaTui e lomalagi, me vaka na ivalu, leqa ni kakana, kei na uneune. (Wilika Maciu 24:7.) E kaya tale ga na iVolatabu ni itovo ni tamata ena “iotioti ni veisiga” ena vakilai kina e levu na ka dredre. (2 Timoci 3:1-5) E laurai votu qori me tekivu mai na 1914.

      3. Na cava sa qai ca ga kina na ituvaki ni sa veiliutaki na Matanitu ni Kalou?

      Ni tekivu veiliutaki me Tui o Jisu ena Matanitu ni Kalou, e vala kei Setani kei ira na timoni e lomalagi, e druka o Setani ena ivalu qori. E kaya na iVolatabu ni “kolotaki sobu i vuravura, e kolotaki sobu vata kei ira na nona agilosi.” (Vakatakila 12:9, 10, 12) E cudru vakalevu o Setani ni kila ni na vakarusai. E vakavuna gona e levu na rarawa kei na mosi e vuravura taucoko. Sa rauta me sa qai ca ga na ituvaki kei vuravura! Sa na vakarau vakaotia kece qori na Matanitu ni Kalou.

      VAKEKELI

      Dikeva se da kila vakacava ni sa tekivu veiliutaki na Matanitu ni Kalou ena 1914 kei na ka meda cakava.

      4. Na tuvai ni gauna ena iVolatabu e dusia na 1914

      Sarava na VIDIO.

      VIDIO: Tekivu Veiliutaki na Matanitu ni Kalou ena 1914 (5:02)

      E vakavuna na Kalou me tadra o Tui Nepukanesa e Papiloni makawa na ka ena yaco na gauna se bera mai. E vakamacalataka o Taniela ni tadra qori e dusia na veiliutaki i Nepukanesa kei na Matanitu ni Kalou.​—Wilika Taniela 4:17.a

      Wilika Taniela 4:20-26, qai vakayagataka na kato mo sauma kina na taro qo:

      Sala e Veisemati Kina na Tadra ni Vunikau kei na Matanitu ni Kalou

      NA PAROFISAI (Taniela 4:20-36)

      Veiliutaki

      (A) Dua na vunikau vakaitamera

      Na vunikau vakaitamera.

      Cegu na veiliutaki

      (B) “Taya na vunikau,” me “oti mada na vitu na gauna”

      Dua na vunikau e vesu wavoki na vuna ena kaukamea kei na kopa.

      Vakalesui na veiliutaki

      (C) “Ena nomuni tale na nomuni matanitu”

      Na vunikau vakaitamera.

      Na imatai ni kena vakayacori na parofisai qo . . .

      • (D) E dusi cei na vunikau?​—Raica na tikina e 22.

      • (E) E mai cegu vakacava nona veiliutaki?​—Wilika Taniela 4:29-33.

      • (F) Na cava e yaco vei Nepukanesa ni mai cava na “vitu na gauna”?​—Wilika Taniela 4:34-36.

      IMATAI NI KENA VAKAYACORI

      Veiliutaki

      (D) Nepukanesa na Tui kei Papiloni

      E dokadoka o tui Nepukanesa ni tucake tu.

      Cegu na veiliutaki

      (E) Ni oti na 606 B.G.V., a lialia o Nepukanesa qai muduki nona veiliutaki me 7 na yabaki

      E davo tu ena qele qai kana co vaka na manumanu.

      Vakalesui na veiliutaki

      (F) E vinaka tale na nona vakasama o Nepukanesa, qai veiliutaki tale

      E dodoka tu i cake na ligana o Nepukanesa qai rai tu e lomalagi.

      Na ikarua ni kena vakayacori na parofisai qo  . . .

      • (G) E dusi cei na vunikau?​—Wilika 1 Veigauna 29:23.

      • (H) E cegu vakacava nodra veiliutaki? Eda kila vakacava ni cegu tu nodra veiliutaki ni se bula e vuravura o Jisu?​—Wilika Luke 21:24.

      • (I) Na gauna kei na vanua cava ena vakalesui kina na veiliutaki?

      IKARUA NI KENA VAKAYACORI

      Veiliutaki

      (G) Ira na tui kei Isireli era matataka na veiliutaki ni Kalou

      Na veitaravi ni veiliutaki vakatui e Isireli. E cilavi ira na rarama.

      Cegu na veiliutaki

      (H) E vakarusai o Jerusalemi, e cegu kina nodra veiliutaki na tui kei Isireli me 2,520 na yabaki

      E kama o Jerusalemi ena 607 B.G.V. Ni oti qori e mai cava na 2,520 na yabaki.

      Vakalesui na veiliutaki

      (I) Tekivu veiliutaki o Jisu e lomalagi me Tui ni Matanitu ni Kalou

      Liutaka na vuravura o Jisu ena idabedabe vakaturaga ena 1914 G.V. E lako mai vua na rarama.

      E vakacava na dede ni vitu na gauna?

      Eso na tikinivolatabu ena vakamatatataka eso tale na tikinivolatabu. Kena ivakaraitaki, e tukuni ena ivola na Vakatakila ni tolu veimama na gauna e tautauvata ni 1,260 na siga. (Vakatakila 12:6, 14) Me kilai na vitu na gauna, ena vakaruataki na iwiliwili qori me yacova na 2,520 na siga. Eso na gauna na iVolatabu e dau vakayagataka e dua na siga me dusia e dua na yabaki. (Isikeli 4:6) E va tale ga qori na vitu na gauna ena ivola i Taniela​—e dusia e 2,520 na yabaki.

      5. Sa veisau o vuravura me tekivu mai ena 1914

      Sarava na VIDIO.

      VIDIO: Veisau o Vuravura me Tekivu ena 1914 (1:10)

      E sa tukuna oti tu o Jisu na ka ena yaco i vuravura me dusia ni sa na Tui. Wilika Luke 21:9-11, qai veivosakitaka na taro qo:

      • Na ituvaki cava o sa raica sara tu ga nikua se o rogoca?

      E vakamacalataka na yapositolo o Paula na itovo ni tamata ena iotioti ni veisiga. Wilika 2 Timoci 3:1-5, qai veivosakitaka na taro qo:

      • Na itovo cava o raica vei ira na tamata nikua?

      iYaloyalo: Na ituvaki kei vuravura kei na itovo ena iotioti ni veisiga. 1. E kaila tiko e dua na iliuliu ni mataivalu qai lave tiko na ligana. 2. Era vakacacani na tabavale ni oti na uneune. 3. Waqavuka ni mataivalu. 4. Era vakamask tiko e dua na ilala qai taubale tiko e tuba. 5. Kacabote na Twin Tower e Niu Yoka ni oti na vakacaca ni batikadi. 6. E dua na turaga e vakayagataka tiko na wainimate gaga. 7. E via vacuki watina o tagane vakawati qai vosavosa vua. 8. Veimataqali wainimate gaga kei na gunu. 9. Rau tabaki rau tiko e rua na yalewa, rau qai dara tu na isulu ni gauna qo kei na ukuuku. 10. E dua na daunivakatagi ena dua na soqo. 11. Dua na dau tayabe e vakarautaka viritaka e dua na ka.

      6. Na veiliutaki ni Matanitu ni Kalou e dodonu me uqeti keda

      Wilika Maciu 24:3, 14, qai veivosakitaka na taro qo:

      • Na cakacaka bibi cava e vakaraitaka ni sa veiliutaki tiko na Matanitu ni Kalou?

      • O rawa ni vakaitavi vakacava ena cakacaka qo?

      Sa veiliutaki tiko na Matanitu ni Kalou, sa voleka tale ga na gauna me lewa kina na vuravura taucoko. Wilika Iperiu 10:24, 25, qai veivosakitaka na taro qo:

      • Na cava e dodonu meda cakava “nida raica ni sa voleka mai na siga”?

      iYaloyalo: 1.E tiko ena soqoni ni iVakadinadina i Jiova e dua na vuli ivolatabu. 2. E vunau sara na gonevuli qori vua e dua rau veikilai.

      Ke o sa mai vulica e dua na ka ena rawa ni vukea se vakabulai ira eso tale, na cava mo cakava?

      KE TAROGA E DUA: “Na cava era kaya kina na iVakadinadina i Jiova ni yabaki bibi na 1914?”

      • Na cava o na kaya?

      KA O VULICA

      Na parofisai vakaivolatabu, na veitaravi ni gauna kei na ituvaki kei vuravura e vakadeitaka ni sa veiliutaki tiko na Matanitu ni Kalou. Eda vakaraitaka nida vakabauta qori nida vunautaka da qai tiko ena soqoni vaKarisito.

      Railesuvi

      • Na cava e yaco ni oti na vitu na gauna e parofisaitaki ena ivola i Taniela?

      • Na cava o vakabauta kina ni tekivu veiliutaki na Matanitu ni Kalou ena 1914?

      • O na vakaraitaka vakacava ni o vakabauta ni sa veiliutaki tiko na Matanitu ni Kalou?

      iSausau

      IKURI

      Dikeva na ka era tukuna na daunitukutuku makawa kei na so tale ena veiveisau e yaco ena 1914.

      “Veisau Vakasauri na iTovo Vinaka” (Yadra!, Epereli 2007)

      Dikeva na kena veisautaka na nona bula e dua na turaga na Maciu 24:14.

      “E ca na Uluqu ena Qito!” (Na Vale ni Vakatawa Nb. 3 2017)

      Eda kila vakacava ni parofisai e volai ena Taniela wase 4 e dusia na Matanitu ni Kalou?

      “Gauna Cava e Tekivu Veiliutaki Kina na Matanitu ni Kalou? (Wase 1)” (Na Vale ni Vakatawa, 1 Okotova, 2014)

      Eda kila vakacava ni “vitu na gauna” e cavuti ena Taniela wase 4 e mai cava ena 1914?

      “Gauna Cava e Tekivu Veiliutaki Kina na Matanitu ni Kalou? (Wase 2)” (Na Vale ni Vakatawa, 1 Noveba, 2014)

      a Raica na iotioti ni rua na ulutaga ena iKuri ena lesoni qo.

  • Na Cava ena Cakava na Matanitu ni Kalou?
    Marau me Tawamudu!—Vuli iVolatabu
    • Lesoni 33. Bula ena vuravura parataisi.

      LESONI 33

      Na Cava ena Cakava na Matanitu ni Kalou?

      Sa veiliutaki tiko na Matanitu ni Kalou. Sa voleka ni cakava na veisau lelevu e vuravura. Meda dikeva mada eso na veika vinaka eda vakanamata tu kina ni sa veiliutaki na Matanitu ni Kalou.

      1. Ena vakalesuya mai vakacava na Matanitu ni Kalou e vuravura na vakacegu kei na lewadodonu?

      O Jisu na Tui ni Matanitu ni Kalou ena vakarusai ira na tamata ca kei na veimatanitu ena ivalu na Amaketoni. (Vakatakila 16:14, 16) Ena gauna qori, sa na qai vakayacori kina na vosa ni yalayala qo ena iVolatabu: “Malua mada vakalailai, sa na sega vakadua na daucaka ca.” (Same 37:10) Ni sa na veiliutaki na Matanitu ni Kalou, ena raica o Jisu me vakilai e vuravura na vakacegu kei na lewadodonu.​—Wilika Aisea 11:4.

      2. Ena vakacava na ituvaki e vuravura ni sa vakayacori na loma ni Kalou?

      Ni sa na veiliutaki na Matanitu ni Kalou, “o ira na yalododonu era na taukena na vuravura, era na qai bula tawamudu kina.” (Same 37:29) Raitayaloyalotaka mada na vuravura era sa na bula ga kina na yalododonu, era lomani Jiova kece, ra qai veilomani! Sa na sega na tauvimate, era na qai bula tawamudu.

      3. Na cava ena cakava na Matanitu ni Kalou nira sa vakarusai na tamata ca?

      Nira sa vakarusai na tamata ca, ena veiliutaki o Jisu me Tui me 1,000 na yabaki. Ena gauna qori, o Jisu kei ira na 144,000 era na vukei ira na kawatamata e vuravura mera bula uasivi. Ni mai cava na gauna qori, sa na veisau na vuravura me parataisi, era na tawana na tamata mamarau nira muria na lawa i Jiova. Ena qai solia lesu o Jisu na veiliutaki vei Tamana o Jiova. Qori na gauna ena ‘vakarokorokotaki kina na yaca i Jiova.’ (Maciu 6:9, 10) Ena qai vakadinadinataki e keri ni o Jiova ga na iLiuliu vinaka, e kauaitaki ira dina na vakarurugi ena nona veiliutaki. O Jiova ena qai vakarusai Setani, o ira na timoni, kei ira kece na talaidredre ena nona veiliutaki. (Vakatakila 20:7-10) Na veisau ena kauta mai na Matanitu ni Kalou ena tawamudu.

      VAKEKELI

      Dikeva na vuna meda nuitaka kina ni na vakayagataka na Kalou nona Matanitu, me vakayacora na ka kece e yalataka tu na iVolatabu me baleta na gauna se bera mai.

      4. Na Matanitu ni Kalou ena vakarusa na matanitu vakatamata

      ‘Ni veiliutaki na tamata e tini ga ina leqa.’ (Dauvunau 8:9) Ena vakayagataka o Jiova na nona Matanitu me vakaotia na veika tawadodonu.

      Wilika Taniela 2:44 kei na 2 Cesalonaika 1:6-8, qai veivosakitaka na taro qo:

      • Na cava ena cakava o Jiova kei na Luvena o Jisu vei ira na veiliutaki vakatamata kei ira na tokoni ira?

      • O vakadeitaka vakacava ena veika o vulica me baleti Jiova kei Jisu, ni rau na vakaotia na veika tawadodonu qai sega ni veivakaduiduitaki?

      O Jisu na Tui ni Matanitu vakalomalagi e liutaka tiko mai na vuravura.

      5. E ganiti Jisu me Tui

      Ni Tui ni Matanitu ni Kalou o Jisu, ena vukei ira vakalevu na bula e vuravura. Sarava na VIDIO mo raica na sala a vakaraitaka kina o Jisu ni vinakata sara tu ga me vukei ira na tamata kei na nona solia vua na Kalou na kaukaua me cakava qori.

      VIDIO: Dusia o Jisu na ka ena Cakava na Matanitu ni Kalou (1:13)

      Ni se bula e vuravura o Jisu, a vakaraitaka na ka ena cakava na Matanitu ni Kalou. Na veivakalougatataki cava e volai tu qo o rai vakanamata kina? Wilika na tikinivolatabu e toka e yasana mo kila kina na veivakalougatataki qori.

      NI SE BULA E VURAVURA O JISU . . .

      NI SA VEILIUTAKI MAI LOMALAGI O JISU, ENA . . .

      • e vakani ira vakacakamana e vica vata na udolu.​—Maciu 14:17-21.

      • raica mera bulabula vinaka na lewe i vuravura.​—Aisea 33:24.

      6. Na Matanitu ni Kalou ena kauta mai na veika vinaka

      Ena vakayacora na Matanitu ni Kalou na nona inaki taumada na Kalou o Jiova vei keda na kawatamata. Era na bula tawamudu ena vuravura parataisi. Sarava na VIDIO mo kila na sala e vakayagataki Jisu kina o Jiova me vakayacora na nona inaki.

      VIDIO: Veika Totoka ena Yaco ena Veigauna se Bera Mai (4:38)

      Wilika Same 145:16, qai veivosakitaka na taro qo:

      • Na cava nomu rai ni o mai kila ni o Jiova ena “vakaceguya na veika era gadreva na kabula kece”?

      KA ERA KAYA ESO: “Ke da cakacaka vata kece, eda na walia na leqa e vuravura.”

      • Na leqa cava ena vakaotia na Matanitu ni Kalou e sega ni cakava rawa na matanitu vakatamata?

      KA O VULICA

      Ena vakayacora na Matanitu ni Kalou na inaki ni Kalou. Ena veisautaka na vuravura me parataisi, era na tawana na tamata vinaka mera qaravi Jiova me tawamudu.

      Railesuvi

      • Ena vakarokorokotaka vakacava na yaca i Jiova na Matanitu ni Kalou?

      • Na cava eda vakabauta kina ni Matanitu ni Kalou ena vakayacora na ka e yalataka na iVolatabu?

      • Na veisau cava ena Matanitu ni Kalou o rai vakanamata tu kina?

      iSausau

      IKURI

      Dikeva na ibalebale ni Amaketoni.

      “Na iValu Vakacava na Amaketoni?” (Ulutaga ena jw.org)

      Dikeva na ka era na yaco ena “veivakararawataki levu“ me vaka e tukuna o Jisu.​—Maciu 24:21.

      “Na Cava na Veivakararawataki Levu?” (Ulutaga ena jw.org)

      Raica na sala mera vakasamataka kina vakatitobu na vuvale na veivakalougatataki ni Matanitu ni Kalou e se bera mai.

      Raici Iko ena Parataisi (1:50)

      Raica ena ulutaga “E Levu na ka Au Via Kila,” na sala e saumi kina na nona vakatataro e dua e dau saqata na matanitu.

      “E Veisautaka na Bula na iVolatabu” (Na Vale ni Vakatawa, 1 Janueri, 2012)