LESONI 23

Papitaiso—Na iSausau Yaga!

iLavelave e Tabaki

E vakavulica o Jisu ni dodonu mera papitaiso na lotu vaKarisito. (Wilika Maciu 28:19, 20.) Ia na cava na papitaiso? Na cava me cakava e dua me papitaiso?

1. Na cava na papitaiso?

Na vosa na “papitaiso,” e vu mai ena dua na vosa vaKirisi e kena ibalebale “dromu” e lomaniwai. Ni papitaiso o Jisu ena Uciwai na Joritani, e dromu sara ga e wai, oti e qai ‘lamata mai.’ (Marika 1:9, 10) Era papitaiso tale ga va qori na lotu vaKarisito dina nira dromu e wai.

2. Na cava e vakaraitaka ni papitaiso e dua?

E vakaraitaka ni sa yalataki koya oti vua na Kalou o Jiova. Ena cakava vakacava nona yalayala? Ni bera ni papitaiso, ena tukuna vei Jiova ena masu ni via qaravi koya me tawamudu. E yalataka me na sokaloutaki Jiova duadua ga qai bibi duadua vua me cakava na loma ni Kalou. E vakatulewataka me ‘kua tale ni muria na lomana, ena muria tiko ga na’ ivakavuvuli i Jisu kei na nona ivakaraitaki. (Maciu 16:24) Na nona yalayala kei na papitaiso ena veitokani voleka kina kei Jiova kei ira na mataveitacini.

3. Na cava me cakava e dua me papitaiso?

Ni bera ni o papitaiso, ena bibi mo vulica na veika me baleti Jiova qai vakabauti koya. (Wilika Iperiu 11:6.) Ni toso tiko na ka o kila kei na nomu vakabauta, o sa na qai lomani Jiova ga vakalevu. O na vinakata sara ga mo tukuni koya, mo muria tale ga na nona ivakatagedegede. (2 Timoci 4:2; 1 Joni 5:3) Ke o sa kila ‘ni rakorako vei Jiova na nomu itovo, mo vakamarautaki koya vakalevu,’ sa rawa ni o vakatulewataka mo yalayala vua na Kalou qai papitaiso.—Kolosa 1:9, 10.a

VAKEKELI

Raica na ka eda rawa ni vulica ena papitaiso i Jisu kei na ka e rawa ni cakava e dua me vakarautaki koya ena ikalawa bibi qo.

4. Ka eda vulica ena papitaiso i Jisu

Wilika Maciu 3:13-17 mo kila kina e levu tale na itukutuku me baleta na papitaiso i Jisu, qai veivosakitaka na taro qo:

Vakacava e papitaiso o Jisu ni se gonedramidrami?
A papitaiso vakacava? A vakamiriki vua na wai?

Ni papitaiso oti o Jisu, e lesi vua na itavi vakalou. Wilika Luke 3:21-23 kei na Joni 6:38, qai veivosakitaka na taro qo:

Ni papitaiso oti o Jisu, na cakacaka cava e vakaliuca?

5. E sega ni dredre na papitaiso

Eso era nanuma ni dredre na yalayala kei na papitaiso. Ia e rawa ni tomani tiko ga na nomu vuli, me yacova ni o sa dei mo cakava kina na vakatulewa bibi qori. Eso era cakava qori, sarava na VIDIO.

VIDIO: Vaqaqacotaka Noda Veiwekani kei Jiova (1:11)

Wilika Joni 17:3 kei na Jemesa 1:5, qai veivosakitaka na taro qo:

Na cava me cakava e dua me papitaiso?

A. E dua na marama e yalataki koya vua na Kalou ena masu.

B. E papitaiso na marama qori me iVakadinadina i Jiova ni tabadromuci e wai.

Eda yalayala nida tukuna vei Jiova ena masu nida via qaravi koya me tawamudu
Nida papitaiso, eda vakaraitaka e matanalevu nida sa yalataki keda vua na Kalou

6. Ni o papitaiso, o sa lewe ni vuvale i Jiova

Nida papitaiso, eda sa mai lewena e dua na vuvale e vuravura raraba. E duidui na noda isususu kei na vanua eda lako mai kina, ia e tautauvata na noda vakabauta kei na ivakatagedegede savasava eda muria. Wilika Same 25:14 kei na 1 Pita 2:17, qai veivosakitaka na taro qo:

Ena yaga vakacava ena nomu veiwekani kei Jiova kei ira na mataveitacini nomu papitaiso?

iYaloyalo: Dua na tacida yalewa papitaiso e vakasamataka tiko na nona veiwekani vinaka kei ira na tacida ena ivavakoso. 1. E talaucaka na lomana. 2. E vukea tiko e dua na tacida yalewa itabaqase me taubale. 3. E kana tiko kei ira e duidui na nodra yabaki. 4. Erau vunau tiko kei na dua na tacida yalewa vua e dua na turaga. 5. E veitaba tiko kei na rua tale na tacida mai na duidui vanua ena soqo ni veimatanitu.

KA ERA KAYA ESO: “Au qai papitaiso vakamalua.”

Ke va qori nomu rai, o nanuma ni yaga na papitaiso?

KA O VULICA

E vakavulica o Jisu ni dodonu mera papitaiso na lotu vaKarisito. Me rawati na isausau qori, ena vinakati mo vaqaqacotaka nomu vakabauti Jiova, mo muria na nona ivakatagedegede qai yalataki iko vua.

Railesuvi

Na cava na papitaiso, cava e bibi kina?
E veisemati vakacava na yalayala kei na papitaiso?
Na cava mo cakava mo yalayala qai papitaiso?

Vakaoti na lesoni ena:

iSausau

Raica na kato ena iWasewase 4, “Sa Rawa Niu Vunau kei Ira na Lewe ni iVavakoso?” kei na “Sa Rawa Niu Papitaiso?,” mo kila kina ke o sa rawa ni papitaiso.

Eso tale:

Dua tale nomu isausau

IKURI

Vulica na ibalebale dina ni papitaiso.

“Na Cava na Papitaiso?” (Ulutaga ena jw.org)

Dikeva na ka e rawa ni cakava e dua me papitaiso.

“Nomu Lomani Jiova ena Uqeti Iko Mo Papitaiso” (Na Vale ni Vakatawa, Maji 2020)

Wilika se cava e uqeta e dua na turaga me papitaiso.

“Erau Vinakata Meu Vakadeitaka ga Vakataki au na ka Dina” (Na Vale ni Vakatawa, 1 Feperueri, 2013)

Dikeva na vuna e isausau yaga kina na papitaiso kei na sala mo vakarautaki iko kina.

“E Dodonu Meu Papitaiso?” (Ra Taroga na iTabagone—Kena iSau, iTabataba 2, wase 37)

a Ke o sa papitaiso oti ena nomu lotu makawa, ena vinakati mo papitaiso tale mo iVakadinadina i Jiova. Na vuna? E sega ni vakavulica nomu lotu makawa na ka dina ena iVolatabu.—Raica na Cakacaka 19:1-5 kei na Lesoni 13.