LESONI 46

Na Cava Mo Yalayala Kina Qai Papitaiso?

iLavelave e Tabaki

Na cava na yalayala? Qori nomu masulaka vei Jiova ni o na sokaloutaki koya duadua ga, o na vakaliuca na lomana ena nomu bula. (Same 40:8) Oti o sa na qai papitaiso. Ni o cakava qori, o vakaraitaka e matanalevu ni o sa yalayala oti. E dua na vakatulewa bibi na nona vakatulewataka e dua me yalayala vei Jiova. Ena veisautaka na nona ivakarau ni bula. Na cava ena uqeti iko mo cakava na vakatulewa qori?

1. Na cava ena uqeta e dua me yalayala?

E yavutaki ena loloma na noda yalataki keda vei Jiova. (1 Joni 4:10, 19) E uqeti keda na iVolatabu: “Mo lomani Jiova na nomu Kalou ena lomamu taucoko, ena nomu vinaka taucoko, ena nomu vakasama taucoko, kei na nomu kaukaua taucoko.” (Marika 12:30) Eda na vakaraitaka nida lomana na Kalou ena ka eda tukuna kei na ka eda cakava. Me vaka ga nodrau veilomani e rua me rau vakamau, na noda lomani Jiova tale ga ena uqeti keda meda yalayala, meda papitaiso.

2. Ena vakalougatataki ira vakacava na ivakadinadina papitaiso o Jiova?

Ni o papitaiso, o sa na mai lewena na vuvale mamarau i Jiova. E levu na sala o na vakila kina na nona loloma. O na qai volekati koya ga vakalevu. (Wilika Malakai 3:16-18.) Sa na Tamamu o Jiova, o mai lewena e dua na vuvale vakayalo era lewena na mataveitacini e vuravura raraba era lomani Jiova, era lomani iko tale ga. (Wilika Marika 10:29, 30.) Ia e tiko eso na ka mo cakava ni bera ni o papitaiso. Ena vinakati mo vulica na veika me baleti Jiova, mo lomani koya, mo vakabauti Luvena tale ga. Oti qori e bibi mo yalataki iko vei Jiova. Ni o cakava qori o qai papitaiso, o sa muria tiko na sala mo rawata na bula tawamudu. E kaya na Vosa ni Kalou: ‘Ena vakabulai kemuni na papitaiso.’—1 Pita 3:21.

VAKEKELI

Dikeva na vuna e bibi kina mo yalataki iko vei Jiova mo qai papitaiso.

3.Meda digia o cei meda qarava

E Isireli makawa, era nanuma eso ni rawa nira qaravi Jiova kei na kalou lasu o Peali. Ia o Jiova e qai tala na nona parofita o Ilaija me vakadodonutaka na rai cala qori. Wilika 1 Tui 18:21, qai veivosakitaka na taro qo:

Na vakatulewa cava mera cakava na Isireli?

Me vakataki ira na Isireli, eda na vakatulewataka tale ga o cei meda qarava. Wilika Luke 16:13, qai veivosakitaka na taro qo:

Na cava eda na sega ni rawa ni sokaloutaki Jiova kina kei na dua tale, se dua tale na ka?
Eda na vakaraitaka vakacava nida digitaka meda sokaloutaki koya duadua ga?

4. Vakasamataka vakatitobu nona lomani iko o Jiova

iYaloyalo: E vakasamataka tiko e dua na turaga na ka e solia vua na Kalou. 1. E vakaraitaka tiko e dua na tina na loloma vei luvena. 2. Veimataqali vuanikau kei na kakana draudrau. 3. Na iVolatabu. 4. Na isoro ni veivoli i Jisu Karisito.

E levu na isolisoli talei e vakarautaka o Jiova. Na cava eda rawa ni dolea vua? Sarava na VIDIO.

VIDIO: Solia Nomu iLoloma Vua na Kalou (3:04)

Na cava eso na sala e vakaraitaka kina o Jiova ni lomani iko? Wilika Same 104:14, 15 kei na 1 Joni 4:9, 10, qai veivosakitaka na taro qo:

Na loloma cava i Jiova o marautaka vakalevu?
Na cava nomu rai me baleti Jiova ena iloloma qori?

Nida ciqoma e dua na iloloma eda taleitaka, eda na via vakavinavinakataki koya e solia mai. Wilika Vakarua 16:17, qai veivosakitaka na taro qo:

Ni o vakasamataka na ka kece e cakava vei iko o Jiova, na cava o via dolea vua?

5. Ni o yalayala o na vakalougatataki vakalevu

E levu era nanuma ni rogo, na cakacaka vinaka, kei na ilavo ena vakamarautaki ira. Vakacava e dina qori? Sarava na VIDIO, qai veivosakitaka na taro tarava.

VIDIO: E Bibi Duadua Vei Au na Soka (5:45)

iYaloyalo: iTaba mai na vidio ‘E Bibi Duadua Vei Au na Soka.’ 1. E vuli iVolatabu tale o Andrey. 2. E vunau tiko kei luvena yalewa o Andrey.

Ena vidio, e taleitaka vakalevu na cauravou qori na soka, ia cava ga e biuta kina?
E vakatulewataka me yalataki koya vei Jiova, sega ni qito soka. O nanuma ni donu na vakatulewa ya? Na vuna?

Ni bera ni lotu vaKarisito na yapositolo o Paula, a saga me dua nona cakacaka vinaka. A vulica na lawa ni veika vakaJiu vua e dua na qasenivuli rogo. Ia e biuta kece qori me dua na lotu vaKarisito. Vakacava e veivutunitaka o Paula? Wilika Filipai 3:8, qai veivosakitaka na taro tarava:

Na cava e tukuna kina o Paula ni vaka na “benu” na ka e cakava tu ni bera ni dua na lotu vaKarisito?
Na cava e rawata kina?
O rawa ni vakatauvatana na nomu qaravi Jiova ena dua tale na ka?

iYaloyalo: 1. Na Farisi yalododonu vakasivia o Saula, e qai kilai me o Paula. 2. E volavola tiko vei ira na lotu vaKarisito na yapositolo yalodina o Paula. — Ni mai dua na lotu vaKarisito o Paula, e rawata e levu sara na ka ni vakatauvatani kei na ka e vakayalia

KA ERA KAYA ESO: “Sa na sega tu ga ni rawa meu solia noqu bula vua na Kalou.”

Na cava nomu rai, cava e bibi kina mo yalataka nomu bula vei Jiova?

KA O VULICA

Na loloma ena uqeti keda meda yalataki keda vei Jiova qai papitaiso.

Railesuvi

Na cava meda qaravi Jiova kina mai vu ni lomada da qai sokaloutaki koya?
E vakalougatataki ira vakacava na nona iVakadinadina papitaiso o Jiova?
O vinakata mo yalataki iko vei Jiova?

Vakaoti na lesoni ena:

iSausau

Ni o vakarautaka na lesoni e tarava, vakasamataka eso na ituvaki o na lomalomarua kina na yalayala.

Eso tale:

Dua tale nomu isausau

IKURI

Sarava na vuna rau yalataki rau kina vei Jiova e dua na daunilagasere kei na dua na dauqito.

Ra Taroga na iTabagone—Na Cava Au na Cakava ena Noqu Bula?—Rai Lesu (6:54)

Dikeva eso tale na vuna mo yalataki iko kina.

“Na Cava Mo Yalataki Iko Kina Vei Jiova?” (Na Vale ni Vakatawa, 15 Janueri, 2010)

Rogoca ena sere qo na nodra marau o ira na yalataki ira vei Jiova.

Au Solia Noqu Bula Vei Kemuni (4:30)

E kila vakacava e dua na marama na ka e bibi ena nona bula? Wilika ena ulutaga qo “Au Dau Lomatarotarotaka tu me Vica Vata na Yabaki, ‘Na Cava Eda Bula tu Kina e Vuravura?’”

“E Veisautaka na Bula na iVolatabu” (Na Vale ni Vakatawa, 1 Noveba, 2012)