LESONI 47

O sa Vakarau tu Mo Papitaiso?

iLavelave e Tabaki

E levu na ka o sa mai kila me baleti Jiova ni o vulica tiko na iVolatabu. Rairai o sa cakava eso na veiveisau mo muria kina na ka o sa vulica. Ia de dua e tiko tale eso na ka e tarova na nomu yalataki iko vei Jiova mo qai papitaiso. Eda na veivosakitaka ena lesoni qo, eso na ituvaki ena tarova na nomu papitaiso kei na ka mo cakava.

1. Me vakacava na levu ni ka o kila ni bera ni o papitaiso?

Mo papitaiso, e bibi mo “kila vinaka na ka dina.” (1 Timoci 2:4) E sega ni kena ibalebale qori mo kila kece na isaunitaro ena iVolatabu. O ira mada ga na lotu vaKarisito e sa dede nodra papitaiso, era se vuli tiko ga. (Kolosa 1:9, 10) Ia e bibi mo kila na ivakavuvuli rawarawa ena iVolatabu. Era na kila na qase ni ivavakoso ke sa tiko vei iko na kila qori.

2. Na cava eso na ka mo cakava ni bera ni o papitaiso?

Ni bera ni o papitaiso, e dodonu mo ‘veivutuni mo veisau.’ (Wilika Cakacaka 3:19.) Kena ibalebale o na veivutunitaka sara ga nomu ivalavala ca, qai kerei Jiova me vosoti iko. O na cata tale ga na itovo ca, qai saga mo muria na ivakarau ni bula e taleitaka na Kalou. O sa na tekivu vakaitavi tale ga ena ivavakoso, me vaka nomu tiko ena soqoni kei na nomu lai vunau ni o sa dua na dautukutuku bera ni papitaiso.

3. Na cava me kua ni tarovi iko kina na rere?

Eso era rere nira leqataka nira na sega ni cakava na nodra yalayala vei Jiova. Ia so na gauna eda na cala, me vakataki ira na tagane kei na yalewa era cavuti ena iVolatabu. Ia e sega ni namaka o Jiova mera uasivi na qaravi koya. (Wilika Same 103:13, 14.) E marau ni o solia nomu vinaka! Ena vukei iko. E vakadeitaka mada ga o Jiova ni sega ni dua na ka ena “tawasei keda mai na [nona] loloma.”—Wilika Roma 8:38, 39.

VAKEKELI

Dikeva na sala e yaga kina nomu kilai Jiova kei na nona veivukei, mo vorata kina na ituvaki ena vakadredretaka nomu papitaiso.

iYaloyalo: E papitaiso e dua na goneyalewa ni vosota na veika dredre. E vakayagataki vakavica na iyaloyalo ena lesoni qo.

4. Kilai Jiova vinaka

E vuli iVolatabu tiko e dua na goneyalewa kei na dua na iVakadinadina i Jiova.

Me vakacava na levu ni nomu kilai Jiova mo qai papitaiso? Ena vinakati mo kilai koya vinaka mo vakamarautaki koya tale ga. Sarava na VIDIO na sala era cakava kina qori na vuli iVolatabu e veiyasa i vuravura. Qai veivosakitaka na taro tarava.

VIDIO: Veiveisau me Rawati na Papitaiso (3:56)

Ena vidio, na cava e vukei ira eso mera vakavakarau ena papitaiso?

Wilika Roma 12:2, qai veivosakitaka na taro qo:

O bau vakatitiqataka na ka e vakavulica na iVolatabu? Vakacava era vakavulica tiko na iVakadinadina i Jiova na ka dina?
Ke va qori nomu rai, cava o rawa ni cakava?

5. Vorata na ituvaki ena vakadredretaka mo papitaiso

E tawana na iVolatabu ena nona kato qai cudruvi koya o tinana.

Nida vakatulewataka meda yalataki keda vei Jiova da qai papitaiso, eda na sotava eso na ituvaki dredre. Mo raica e dua na kena ivakaraitaki, sarava na VIDIO, qai veivosakitaka na taro tarava.

VIDIO: O na Vosota na Dredre ni o Lomani Jiova (5:22)

Ena vidio, na ituvaki dredre cava e vosota o Narangerel me rawa ni qaravi Jiova?
E uqeti koya vakacava nona lomani Jiova me vosota na ituvaki dredre qori?

Wilika Vosa Vakaibalebale 29:25 kei na 2 Timoci 1:7, qai veivosakitaka na taro qo:

Eda na yaloqaqa vakacava meda vosota na ituvaki dredre?

6. Nuitaka na veivuke i Jiova

E vunau tiko vua e dua na itabaqase. E tomani koya na nona qasenivuli ena cakacaka vakavunau.

Ena vukei iko o Jiova mo vakamarautaki koya. Sarava na VIDIO, qai veivosakitaka na taro tarava.

VIDIO: Ena Vukei Iko o Jiova (2:50)

Ena vidio, na cava e tarovi gonevuli me papitaiso?
Na cava e vulica e uqeti koya me nuitaki Jiova vakalevu?

Wilika Aisea 41:10, 13, qai veivosakitaka na taro qo:

Na cava mo nuidei kina ni o rawa ni cakava nomu yalayala?

7. Vakalevutaka tiko ga nomu lomani Jiova

Na levu ga ni nomu vakasamataka nona lomani iko o Jiova, na levu tale ga ni nomu vakavinavinakataki koya, o na qai qaravi koya ga me tawamudu. Wilika Same 40:5, qai veivosakitaka na taro qo:

Na veivakalougatataki cava i Jiova o vakavinavinakataka vakalevu?

Na parofita o Jeremaia e lomani Jiova kei na nona vosa. E mareqeta vakalevu na itavi dokai me vakatokayacataki ena yaca i Jiova. E kaya: “Na nomuni vosa e ka ni marau, e ka ni reki e lomaqu, niu vakatokai ena yacamuni, kemuni Jiova na Kalou.” (Jeremaia 15:16) Sauma na taro qo: