LESONI 37
Rai ni iVolatabu me Baleta na Cakacaka kei na iLavo
Vakacava o sa bau lomaleqataka na cakacaka se ilavo? E sega ni rawarawa meda qarava na veika eda gadreva, ena gauna vata qori meda qai qaravi Jiova ena sala e vakadonuya. E tu ena iVolatabu na ivakasala yaga ena vukei keda.
1. Na cava e kaya na iVolatabu me baleta na cakacaka?
E vinakata na Kalou meda marautaka na noda cakacaka. E kaya na iVolatabu ni “sega ni dua tale na ka e vinaka vua na tamata . . . me marautaka na nona cakacaka vakaukaua.” (Dauvunau 2:24) E dau cakacaka vakaukaua o Jiova. Nida vakatotomuria nona cakacaka vagumatua, eda na vakamarautaki koya, eda na lomavakacegu tale ga.
E bibi na cakacaka. Ia meda kua ni raica me bibi duadua me lai vakawaleni kina noda qaravi Jiova. (Joni 6:27) E yalataka ke da vakaliuci koya, ena vakarautaka na veika vakayago eda gadreva.
2. Na cava na rai donu me baleta na ilavo?
E tukuna na iVolatabu ni “itataqomaki na ilavo,” ia e veivakasalataki tale ga ni na sega ni kauta mai na marau. (Dauvunau 7:12) Eda uqeti gona meda kua ni lomana na ilavo, ia meda ‘lomavakacegu ga ena ka e sa tiko vei keda.’ (Wilika Iperiu 13:5.) Nida lomavakacegu eda na sega ni vinakata e levu na ka se dinau vakalialia. (Vosa Vakaibalebale 22:7) Eda na sega tale ga ni rawai ena veimauilavo kei na sala meda rawa ilavo totolo kina.
3. Eda na vakayagataka vinaka vakacava na ilavo?
E Kalou lomasavu o Jiova, eda na vakatotomuri koya nida ‘lomasavu, meda yalosolisoli tale ga.’ (1 Timoci 6:18) Eda na vakayagataka vinaka na noda ilavo nida tokona na ivavakoso kei ira eso tale era vinakata tu na veivuke, vakabibi o ira na tacida. E kauaitaka o Jiova na inaki ni noda soli ka, sega na levu ni ka eda solia. Nida soli ka mai vu ni lomada, eda na marau, ena marau tale ga o Jiova.—Wilika Cakacaka 20:35.
VAKEKELI
Dikeva na yaga ni rai donu me baleta na cakacaka kei na noda lomavakacegu.
4. Lagiti Jiova ena ivakarau ni nomu cakacaka
Me laurai ena ivakarau ni noda cakacaka na vinaka ni noda veiwekani kei Jiova. Sarava na VIDIO, qai veivosakitaka na taro tarava.
Ena vidio, na cava o taleitaka ena itovo i Jesoni kei na nona rai me baleta na cakacaka?
Na cava e cakava me veiraurautaka kina na nona cakacaka?
Wilika Kolosa 3:23, 24, qai veivosakitaka na taro qo:
Na cava e bibi kina na noda ivakarau ni rai me baleta na cakacaka?
E bibi na cakacaka. Ia meda kua ni raica me bibi duadua da qai vakawaletaka na noda qaravi Jiova
5. Na yaga ni noda lomavakacegu
E levu era saga mera kumuna vakalevu na nodra ilavo. Ia e duatani na ka e tukuna na iVolatabu me baleta na ilavo. Wilika 1 Timoci 6:6-8, qai veivosakitaka na taro qo:
Na cava e uqeti keda na iVolatabu meda cakava?
E se rawa tiko ga nida marau ke lailai na noda ilavo. Sarava na VIDIO, qai veivosakitaka na taro tarava.
E lailai na nodratou ilavo na vuvale qo, ia na cava ratou marau tiko ga kina?
Vakacava ke sa levu tu na noda ilavo, ia eda qai vinakata tiko ga vakalevu. E tukuna o Jisu na kena rerevaki ena dua na vosa vakatautauvata. Wilika Luke 12:15-21, qai veivosakitaka na taro qo:
Na cava o vulica ena vosa vakatautauvata i Jisu?—Raica na tikina e 15.
Wilika qai vakatauvatana na Vosa Vakaibalebale 10:22 kei na 1 Timoci 6:10, qai veivosakitaka na taro qo:
Na cava o nanuma ni bibi duadua, na nomu veiwekani kei Jiova se me levu nomu ilavo? Na vuna?
Na leqa cava e rawa ni yaco ke o vinakata vakalevu na ilavo?
6. Ena vakarautaka o Jiova na ka eda gadreva
Ni leqa noda cakacaka kei na ilavo, ena rawa ni vakatovolei na noda vakabauti Jiova. Sarava na VIDIO meda kila na ka meda cakava nida sotava na ituvaki qori, qai veivosakitaka na taro tarava.
Ena vidio, na dredre cava e sotava na tacida qori?
Na cava e cakava me walia kina na ituvaki qori?
Wilika Maciu 6:25-34, qai veivosakitaka na taro qo:
Na cava e yalataka o Jiova vei ira na vakaliuci koya?
KA ERA KAYA ESO: “Au na cakacaka vakaukaua meu tokona na noqu vuvale. Au na sega ni rawa ni lai soqoni ena veimacawa.”
Na tikinivolatabu cava o vakadeitaka ni vakatulewa vinaka duadua mo vakaliuca nomu qaravi Jiova?
KA O VULICA
E yaga na cakacaka kei na ilavo, ia me kua ni vakalatilati ena noda qaravi Jiova.
Railesuvi
O na veiraurautaka vakacava na nomu cakacaka?
Ena yaga vakacava vei iko na lomavakacegu?
O na vakaraitaka vakacava ni o nuitaka na yalayala i Jiova ni na vakarautaka na ka eda gadreva?
IKURI
Vakacava e ca na ilavo? Dikeva na ka e tukuna na iVolatabu.
Vulica na soli ka vakacava e marautaka na Kalou.
“Cava e Kaya na iVolatabu me Baleta na Soli Ka?” (Ulutaga ena jw.org)
Vakacava e ka ni qito wale ga na veimauilavo?
Wilika se cava e uqeta e dua na dauveimauilavo qai daubutako me veisautaka na nona ivakarau ni bula.
“Au Taleitaka ga na Veitau Ose” (Na Vale ni Vakatawa, 1 Noveba, 2011)