Na iNuinui ena iVolatabu

E veiyasa i vuravura e levu era sotava na leqa e vakavuna na rarawa, nuiqawaqawa kei na mosi. Vakacava o sotava tale ga na ituvaki va qori? De dua o rarawa tiko ena vuku ni tauvimate se ni mate e dua na wekamu voleka. O na rairai taroga, ‘Ena marautaki tale na bula?’ E veivakacegui na ka e tukuna na iVolatabu.

1. Na inuinui cava e tukuni ena iVolatabu?

E vakamacalataka na iVolatabu na vuna e levu tu kina na leqa. E tukuna tale ga na itukutuku vinaka ni sa voleka ni kauta laivi na leqa kece qo na Kalou. Na vosa ni yalayala ni iVolatabu ena ‘solia vei iko na inuinui kei na ka mo namaka ena gauna se bera mai.’ (Wilika Jeremaia 29:​11, 12.) Na vosa ni yalayala qo e vukei keda meda vosota na leqa eda sotava tiko ena gauna qo, me tiko vei keda na rai donu, da qai marau tiko ga me tawamudu.

2. Na cava e kaya na iVolatabu me baleta na veigauna se bera mai?

E vakamacalataka na iVolatabu na gauna “sa na sega tale [kina] na mate, na lolosi, na tagiyaso, kei na mosi.” (Wilika Vakatakila 21:⁠4.) Sa na oti vakadua na leqa e dau vakavuna noda rarawa ena gauna qo me vaka na veika tawadodonu, dravudravua, tauvimate kei na mate. E yalataka na iVolatabu nida na marautaka na bula me tawamudu ena Parataisi e vuravura.

3. O na vakadeitaka vakacava ni na yaco dina na ka e yalataka na iVolatabu?

Levu era nuitaka me yaco na veika vinaka, ia era sega ni vakadeitaka ni na yaco na ka era nuitaka. E duatani na ka e yalataka na iVolatabu. Eda rawa ni nuitaka na ka e tukuna nida “dikeva vinaka na iVolatabu.” (Cakacaka 17:11) Ni o vulica tiko na iVolatabu, o sa na rawa ni vakatulewataka mo vakabauta se sega na ka e tukuna me baleta na veigauna se bera mai.

VAKEKELI

4. E vakarautaka na iVolatabu na inuinui ni bula tawamudu ena ituvaki totoka

Raica mada na vosa ni yalayala e volai tu ena iVolatabu. Na kena e vei o taleitaka? Na vuna?

Wilika na tikinivolatabu e toka e yasana qai vakasamataka na taro qo:

• O nanuma ni yaga vei iko na tikinivolatabu qo? O nanuma ni na yaga tale ga na tikinivolatabu qo vei ira nomu vuvale kei na itokani?

Raitayaloyalotaka ni o bula ena vuravura:

5. Veisautaka na bula na inuinui ena iVolatabu

Levu era yalolailai se ra cudru nira raica na levu ni leqa ena gauna qo. Eso era sasaga vakaukaua mera veisautaka na ituvaki me vinaka mai. Raica na kena vukei ira tiko eso ena gauna qo na vosa ni yalayala ni iVolatabu me baleta na veigauna vinaka e se bera mai. Sarava na VIDIO, qai veivosakitaka na taro qo.

VIDIO: Au Via Tarova na Veika Tawadodonu (4:07)

• Ena vidio, na veika tawadodonu cava e kauaitaka o Rafika?

• Ni sega ni oti na veika tawadodonu e raica, e vukei koya vakacava na iVolatabu?

Na inuinui e tu ena iVolatabu me baleta na veigauna se bera mai ena vukei keda meda kua ni yalolailai, da qai vosota na leqa eda sotava. Wilika Vosa Vakaibalebale 17:22 kei na Roma 12:12, qai veivosakitaka na taro qo:

• O nanuma ni na veisautaka nomu bula na inuinui e tu ena iVolatabu? Na vuna?

KA O VULICA

E yalataka tu na iVolatabu na inuinui me baleta na veigauna se bera mai, qori e rawa kina nida vosota qai marautaka na bula ena gauna qo.

Railesuvi

• Na cava e bibi kina me tiko na ka eda nuitaka?

• Na cava e tukuna na iVolatabu me baleta na veigauna se bera mai?

• Na cava e bibi kina ena gauna qo mo nuitaka na gauna vinaka e se bera mai?

IKURI

Vulica na sala ena vakaukauataki iko kina na inuinui mo vosota na dredre.

“iNuinui​—⁠Ena Kune i Vei?” (Yadra!, Okotova-Tiseba, 2004)

Raica na sala e vukei ira kina na tauvimate bibi na inuinui ni veigauna se bera mai.

“Tauvimate Bibi​—⁠Ena Walia na iVolatabu?” (Ulutaga ena jw.org)

Ni o sarava tiko na vidio ni ivakatagi qo, raitayaloyalotaka nomu marautaka kei na nomu vuvale na Parataisi e yalataka na iVolatabu.

Mo Dau Raitayaloyalotaka (3:37)

Wilika nona veisautaka nona bula e dua e dau valataka na nodra taqomaki na manumanu. E vulica na inuinui ena iVolatabu me baleta na veigauna se bera mai.

“Au sa Qai Kila ni Sega ni Noqu iTavi Meu Veisautaka na iTuvaki ni Vuravura Qo” (Na Vale ni Vakatawa, 1 Julai, 2013)