IKURI C
Caka Vuli ena iVola Marau me Tawamudu!
Dua na cakacaka levu era cakava na tacida ena vakarautaki ni ivola Marau me Tawamudu!, era masulaka qai vakekeli vinaka ni bera ni vakarautaki. Koya gona, mo rawa ni veivakavulici vinaka ena ivola qori, muria na iwalewale qo.
Ni bera na vuli
1. Vakavakarau vinaka. Vakasamataka na ka e gadreva o gonevuli, kena ituvaki, kei na nona rai. Saga mo kila na tikina ena dredre vua me kila se muria. Vakasamataka na sala ena yaga kina vei nomu gonevuli na kato “iKuri,” mo vakayagataka ena gauna veiganiti ni caka tiko na vuli.
Ena gauna ni vuli
2. Me tekivu qai tini na vuli ena masu, vakavo ke sega ni vakadonuya o gonevuli.
3. Qarauna mo kua ni vosa vakalevu. Kauaitaka ga na ulutaga drau vulica tiko, qai laivi gonevuli me tukuna nona nanuma.
4. Ni tekivu e dua na iwasewase vou, wilika na kena inaki qai vakabibitaka eso na ulutaga ni lesoni.
5. Ni oti e dua na iwasewase, drau veivosakitaka na “railesuvi” mo rawa ni kila kina ke sa kasa vei gonevuli na ka drau vulica.
6. Ni drau vulica e dua na lesoni:
Wilika na parakaravu.
Wilika kece na tikinivolatabu e volai tiko kina “Wilika.”
Wilika eso tale na tikinivolatabu ke ganiti koya.
Ke rawa me saravi kece na vidio e volai tiko kina “Sarava.”
Taroga na taro yadua.
Drau dikeva vata na iyaloyalo ena “Vakekeli,” qai kerei gonevuli me vakamacala kina.
Vakayagataka na kato “iSausau,” me kila kina o gonevuli nona toso vakayalo. O rawa ni uqeti koya me sauva na isausau sa tiko rawa, se so tale, se ruarua.
Tarogi nomu gonevuli ke taleitaka e dua na ulutaga se vidio ena kato “iKuri” ena gauna e vakavakarau tiko kina.
Ke rawa me vakaoti kece na lesoni yadua ena dua na gauna ni vuli.
Ni oti na vuli
7. Dau vakasamataki nomu gonevuli. Kerea vei Jiova me vakalougatataka nona toso, me solia tale ga vei iko na vuku mo kila na sala mo vukei koya kina.