Me Vakacava na Noda iValavala Vei Ira Eso Tale?

“Me vaka dou sa vinakata me ra kitaka vei kemudou na tamata, dou kitaka vaka talega kina vei ira.”​—LUKE 6:​31.

1, 2. (a) Na cava na iVunau ena Ulunivanua? (b) Cava ena veivosakitaki ena ulutaga qo kei na kena e tarava?

E SEGA ni vakabekataki ni Qasenivuli Levu dina ga o Jisu Karisito. Na gauna era vakarota kina na iliuliu ni bete mera lai vesuki Jisu na ovisa, era a lesu lala mai, ia ra qai kaya ga: “E sega e dua na tamata sa vosa me vaka na tamata oqo.” (Joni 7:​32, 45, 46) Dau vakasakiti dina qai momona na vosa i Jisu. Kena ivakaraitaki na nona iVunau ena Ulunivanua. E volaitukutukutaki ena wase 5 ina 7 ni Kosipeli i Maciu, qai tautauvata toka kei na kena e volai ena Luke 6:​20-​49.a

² Na vosa kilai levu duadua ena ivunau qori e dau vakatokai tu me iVunau Koula. E baleta tiko na noda ivalavala vei ira e so tale. A kaya o Jisu: “Me vaka dou sa vinakata me ra kitaka vei kemudou na tamata, dou kitaka vaka talega kina vei ira.” (Luke 6:​31) Sega gona ni tukuni rawa na nona dau caka vinaka o Jisu vei ira na lewenivanua! E vakabulai ira na tauvimate, vakaturi ira tale ga na mate. Ia ra qai kalougata sara vakalevu o ira na taleitaka nona veivakavulici ena itukutuku vinaka. (Wilika Luke 7:​20-​22.) Eda marau gona na iVakadinadina i Jiova meda vunautaka na itukutuku ni Matanitu ni Kalou. (Maciu 24:14; 28:19, 20) Ena ulutaga qo kei na kena e tarava, eda na veivosakitaka na vosa i Jisu me baleta na cakacaka qo. Eda na veivosakitaka tale ga e so na ivakasala momona mai na iVunau ena Ulunivanua e baleta tiko na noda ivalavala vei ira e so tale.

Meda Yalomalua

3. O na vakamacalataka vakacava na yalomalua?

³ A kaya o Jisu: “Sa kalougata ko ira sa yalomalua: ni ra na taukena na vanua.” (Maciu 5:5) Ena iVolatabu, na yalomalua e sega ni ivakaraitaki ni tamata malumalumu. Ia e dusia tiko ga noda yalovinaka se na ivalavala vinaka eda bulataka nida muria na ivakaro ni Kalou. Ena laurai sara ga qo ena noda ivalavala vei ira e so tale. Dua na kena ivakaraitaki oya na noda sega ni “veisausaumitaka na nona ca e dua.”​—Roma 12:​17-​19.

4. Na cava era marau kina na yalomalua?

⁴ Era marau na yalomalua baleta nira na “taukena na vanua.” E “yalomalua ka yalomalumalumu” o Jisu, qai “taukei ni ka kecega.” O koya gona, e Taukei taumada ni vanua se vuravura o koya baleta ni lesi me liutaka, e levu duadua kina nona ivotavota ena vuravura qo. (Maciu 11:29; Ipe. 1:2; Same 2:8) E so tale e parofisaitaki nira na veiliutaki tale ga ena Matanitu vakalomalagi kei na Mesaia se “Luve ni tamata.” (Tani. 7:​13, 14, 21, 22, 27) Me vaka nira “taukei vata kei Karisito,” era na vakaivotavota tale ga kei Jisu ena vuravura o ira na 144,000. (Roma 8:​16, 17; Vkta. 14:1) E so tale na yalomalua era na vakalougatataki mera bula tawamudu ena vuravura ena veiliutaki kina na Matanitu ni Kalou.​—Same 37:11.

5. Ena yaga vakacava noda vakatotomuria nona yalomalua na Karisito?

⁵ Kevaka eda dau yalokaukaua se voravora noda itovo, eda na veivakacudrui da qai vakavuna nodra yawaki keda e so tale. Ia ke da vakatotomuria nona yalomalua na Karisito, era na marau na tacida vakayalo na tiko maliwai keda, eda na uqeti ira tale ga vakayalo. E dua na vua ni yalo tabu ni Kalou na yalomalua se yalomalumalumu, kevaka gona eda ‘bula qai lako voli ena Yalo Tabu’ ena laurai vei keda na itovo qori. (Wilika Kalatia 5:​22-​25.) Sega ni vakabekataki nida vinakata meda okati kei ira na yalomalua era dusimaki ena yalo tabu i Jiova!

Era Marau na Dau Yalololoma!

6. Na itovo vakasakiti cava era dau vakaraitaka o ira na ‘dau yalololoma’?

⁶ E kaya o Jisu ena nona iVunau ena Ulunivanua: “Sa kalougata ko ira e dauloloma: ni ra na lomani.” (Maciu 5:7) O ira na ‘yalololoma’ era dau veinanumi, ra caka vinaka qai kauaitaki ira dina na vakaloloma tu. A vakabulai ira vakacakamana na vakaloloma tu o Jisu baleta ni “lomani ira,” se ni uqeti koya sara ga na “yalololoma” me cakava vaka kina. (Maciu 14:14; 20:34) Noda kauai kei na noda veinanumi ena uqeti keda gona meda dau yalololoma.​—Jeme. 2:​13.

7. Na cava a cakava o Jisu ena vuku ni nona yalololoma?

⁷ Era lako yani vei Jisu e dua na ilala levu ena gauna a lai vakacegu vakalailai kina ena dua vanua lala. Ni raici ira, “a sa lomani ira, ni ra sa vaka na sipi sa sega na nodrai vakatawa.” Sega ni bera nona “vakatavulici ira e na ka e vuqa.” (Mari. 6:​34) Me vakataki Jisu ga, eda na marau vakalevu nida tukuna yani na itukutuku vinaka ni Matanitu ni Kalou, da qai vakavulici ira ena yalololoma levu ni Kalou!

8. Na cava era marau kina na dau yalololoma?

⁸ Era marau na dau yalololoma baleta nira “na lomani.” Ke da dau yalololoma, eda na lomani tale ga. (Luke 6:​38) E kaya tale ga o Jisu: “Kevaka dou sa sega ni cudruvi [“vosoti,” NW] ira na tamata sa caka cala, ena sega talega ni cudruvi [“vosoti,” NW] kemudou na Tamamudou vakalomalagi.” (Maciu 6:​14) O ira ga na dau yalololoma era na vakila na marau e vu mai na vosoti ni nodra ivalavala ca kei na veivakadonui ni Kalou.

Vuna era Marau Kina o Ira na ‘Saga na Veiyaloni’

9. Ena vakacava na noda ivalavala ke da saga na veiyaloni?

⁹ E vakamacalataka e dua tale na vu ni marau o Jisu ni kaya: “Era marau o ira na saga na bula veiyaloni, nira na vakatokai mera ‘luve ni Kalou.’” (Maciu 5:​9, NW) Na vosa vaKirisi e vakadewataki me “saga na bula veiyaloni” e vakaibalebaletaki ira na “dau veiyaloni.” Ke da dau veiyaloni, eda na sega sara ga ni tokona se vakaitavi ena veika e dau ‘tawasei ira na veitokani dina,’ me vaka na kakase. (Vkai. 16:28) Eda na cakava na ka meda veiyaloni kina kei ira ena loma ni ivavakoso, vaka kina o ira e taudaku ena noda vosa kei na noda ivakarau. (Ipe. 12:14) O koya e bibi sara, eda na saga meda dau veiyaloni me vinaka kina noda veiwekani kei Jiova.​—Wilika 1 Pita 3:​10-​12.

10. Na cava era marau kina o ira na ‘saga na veiyaloni’?

¹⁰ A kaya o Jisu nira na marau o ira na ‘saga na veiyaloni’ baleta “nira na vakatokai mera ‘luve ni Kalou.’” Era vakabauta na lotu vaKarisito lumuti ni Mesaia o Jisu, mani ‘soli kina vei ira na dodonu mera luve ni Kalou.’ (Joni 1:​12, VV; 1 Pita 2:​24) Vakacava o ira na ‘so tani tale na sipi’ nei Jisu era dau saga tale ga na veiyaloni? Ena qai ‘Tamadra me tawa mudu’ o Jisu ena duanaudolu na yabaki ni sa veiliutaki kei ira na vakaivotavota kei koya mai lomalagi. (Joni 10:​14, 16; Aisea 9:6; Vkta. 20:6) Ni oti na duanaudolu na yabaki nona veiliutaki o Karisito, era sa na qai luve ni Kalou ena kena ivakatagedegede uasivi sara o ira na dau veiyaloni era na bula tiko e vuravura.​—1 Kor. 15:​27, 28.

11. Ke dusimaki keda na “vuku maicake” ena vakacava na noda ivalavala vei ira e so tale?

¹¹ Kevaka eda via veiwekani voleka kei Jiova “na Kalou ni veivakacegui,” e bibi meda vakatotomuria na nona itovo me vaka nona dauveiyaloni. (Fpai. 4:9) Ke dusimaki keda na “vuku maicake,” ena laurai ena noda ivalavala nida dau veiyaloni. (Jeme. 3:​17) Eda na marau nida ia tiko ga na veiyaloni.

‘Mo Dou Vakacila Rarama’

12. (a) Na cava e kaya o Jisu me baleta na rarama vakayalo? (b) Eda na vakacila rarama vakacava?

¹² Ena yaga sara ga vakalevu vei ira na tamata noda tuberi ira mera kila na ka dina ni Kalou e dau veivakararamataki vakayalo. (Same 43:3) E kaya vei ira nona tisaipeli o Jisu nira “rarama kei vuravura,” qai uqeti ira mera vakacila rarama me laurai levu kina nodra “[i]valavala vinaka,” se nodra dau caka vinaka. Na nodra vakacila gona na ka dina ena vakararamataki kina vakayalo “na matadra na tamata,” se na yaga vua na kawatamata. (Wilika Maciu 5:​14-​16.) Ena gauna qo eda vakacila rarama ena noda dau caka vinaka vei ira e so tale, kei na noda vunautaka na itukutuku vinaka ni Matanitu ni Kalou ena “veiyasana kecega e vuravura taucoko,” se na “veivanua kecega.” (Maciu 26:13; Mari. 13:10) Sa dua dina na itavi dokai!

13. Na cakacaka kei na itovo cava so eda kilai kina?

¹³ E kaya o Jisu: “Na koro sa tara toka e na ulu-ni-vanua sa sega ni tabonaki rawa.” Ena laurai levu na koro e toka ena ulunivanua. Eda kilai tale ga ena noda dau vunautaka na Matanitu ni Kalou, noda dau caka vinaka, veiraurau na ka eda cakava, da qai itovo savasava.​—Taito 2:​1-​14.

14. (a) O na vakamacalataka vakacava na cina era vakayagataki ena imatai ni senitiuri? (b) Na cava na ibalebale ni noda sega ni vunitaka na cina vakayalo ena ruku ni ‘sova e dau vakarautaki kina na sila’?

¹⁴ E vakaraitaka o Jisu ni gauna e waqa kina na cina me kua ni biu ena ruku ni dua na sova, ia me biu sara ga ena kena itutu me ramase yani vei ira kece na tiko e lomanivale. Ena imatai ni senitiuri e dau vakayagataki me cina na saqa se iyaya tuli e vaka vauvau, qai domica cake na vauvau qori na waiwai me caudre tiko kina. Dau vakayagataki ga vakalevu na waiwai ni olive. E qai dau vakadaberi toka na cina ena dua na itutu kau se kaukamea me ‘cinavi ira kece na tiko e lomanivale.’ Ena sega ni waqa na cina me qai biu tale ena loma ni sova, se ena ruku ni ‘sova e dau vakarautaki kina na sila’​—na sova qo e dua na konteina levu e rawa ni tawa kina e 9 na lita na wai. A sega sara ga ni vinakata o Jisu mera tabonaka na rarama vakayalo na nona tisaipeli, ni na vaka sara ga era vunitaka na cina vakayalo ena ruku ni sova vakatakarakara. E vinakati gona meda vakacila rarama yani, meda kua ni tu suka na tukuna na ka dina ena iVolatabu se meda kubuta tu ga, dina nida dau tusaqati se vakacacani.

15. Era uqeti vakacava e so ena noda “[i]valavala vinaka”?

¹⁵ Ni oti ga nona vakamacalataka na serau ni cina, a qai kaya vei ira nona tisaipeli o Jisu: “Me caudre vakakina na nomudou rarama e na matadra na tamata, me ra raica na nomudoui valavala vinaka, ka vakarokorokotaka na Tamamudou sa tiko mai lomalagi.” Ena vuku ni noda “[i]valavala vinaka,” era sa “vakarokorokotaka” na Kalou e so tale nira mai qaravi koya. Qori e dua dina na vuna vinaka meda ‘cila kina ena kedra maliwa me vaka na veicina e vuravura’!​—Fpai. 2:​15.

16. Na cava so e dodonu meda cakava nida “rarama kei vuravura”?

¹⁶ Nida “rarama kei vuravura,” e dodonu meda vunautaka na itukutuku vinaka ni Matanitu ni Kalou, da qai tubera e so tale mera tisaipeli i Jisu. Ia e dua tale na ka e gadrevi vei keda. E vola na yapositolo o Paula: “Mo dou ia tiko nai valavala ni gone ni rarama: ni sa vua ni rarama nai valavala vinaka kecega kei nai valavala dodonu kei na ka dina.” (Efeso 5:​8, 9) E bibi me dau salavata tu ga kei na ivakatagedegede cecere i Jiova na noda ivalavala. Meda muria gona na ivakasala ni yapositolo o Pita: “Me dodonu na nomudoui valavala e na kedra maliwa era sa sega ni lotu: me ka oqori era vakarokorokotaka kina na Kalou e na siga ni veilakovi, e na vuku ni valavala vinaka era na raica, ko ira era sa dauvosavakacacataki kemudou me vaka ni dou sa tamata caka ca.” (1 Pita 2:​12) Ia na cava ga meda cakava ke yaco na veileqaleqati kei na dua na tacida vakayalo?

‘Drau Veivinakati Mada kei na Tacimu’

17-19. (a) Na cava na “[i]madrali” e tukuni tiko ena Maciu 5:​23, 24? (b) E vakacava na bibi ni noda saga meda dau veivakameautaki kei ira na tacida, e vakavotuya vakacava na tikina qo o Jisu?

¹⁷ Ena nona iVunau ena Ulunivanua, a vakasalataki ira nona tisaipeli o Jisu mera kua ni kubuta nodra lomacataka kei nodra cudruva na tacidra. Ia mera saga vakatotolo mera veivinakati se veiyaloni tale kei na tacidra era vakacudruya. (Wilika Maciu 5:​21-​25.) Vakasamataka vinaka na ivakasala qori i Jisu. Na cava mo cakava ke o mai vakacabora na imadrali ena icabocabonisoro, ia o qai nanuma ni a beitaki iko na tacimu ena dua na ka? Biuta tu mada ena mata ni icabocabonisoro na imadrali qori, drau lai veivakameautaki, oti qai mai vakacabora.

¹⁸ Levu na gauna, na “[i]madrali” qo na isoro ena rairai cabora e dua ena valenisoro i Jiova. A bibi dina ena nodra sokalou na Isireli na isoro manumanu, ni a vakarota sara ga o Jiova ena Lawa a soli vei Mosese. Ia ke qai nanuma e dua ni beitaki koya tiko e dua na tacina ena dua na ka, ena bibi cake nodrau veivakameautaki rawa mai na cabori ni isoro qori. “Biuta tu na nomui madrali e na mata ni cabocabo-ni-soro, ka mo lako,” a kaya o Jisu. “Mo drau veivinakati mada eliu kei na wekamu [“tacimu,” NW], mo qai lako mai ka vakacabora na nomui madrali.” Ena bibi cake me veivakameautaki rawa e dua kei na tacina ni bera ni cabora na isoro e vakarota na Lawa a soli vei Mosese.

¹⁹ Na ka e tukuna tiko e ke o Jisu e sega ni vakatabakidua tiko ina so ga na isoro se cala. O koya gona, se mani isoro cava e cabori, ena gadrevi me biu tu mada vakatikitiki kevaka e nanuma o koya e via vakacaboisoro ni beitaki koya tiko e dua na tacina. Ke isoro manumanu ena biuta tu mada “e na mata ni cabocabo-ni-soro” e tiko ena vanua ra veiqaravi kina na bete ena lomanibai ni valenisoro. Ni sa wali oti na veileqaleqati, sa na qai rawa ni lai vakacaboisoro.

20. Ke da cudruva e dua na tacida, na cava meda saga kina vakatotolo meda veiyaloni tale?

²⁰ Ena rai nei Jiova, e bibi tale ga ena noda sokalou dina na noda veiwekani kei ira na tacida. Ena ka wale vei Jiova na isoro manumanu e cabora e dua, ke sega ni vinaka na nona ivalavala vei ira e so tale. (Maika 6:​6-8) Sa rauta me kaya o Jisu vei ira nona tisaipeli mera ‘kusarawa ni veiyaloni.’ (Maciu 5:​25) E via tautauvata tale ga na ka a vola o Paula: “Ni dou sa cudru, kakua ni dou cala kina; me kakua ni dromu na mata-ni-siga ni dou sa cudru tiko: kakua talega ni vakarawarawataki kemudou vua na tevoro.” (Efeso 4:​26, 27) So na gauna e dau donu vinaka na ka eda cudruvaka, ia meda saga vakatotolo meda veiyaloni tale. Eda na sega kina ni cudru tiko ga qai sega ni rawai keda na tevoro meda ivalavala ca.​—Luke 17:​3, 4.

Dau Veidokai

21, 22. (a) Eda na bulataka vakacava na ivakasala i Jisu eda vulica ena ulutaga qo? (b) Cava eda na veivosakitaka ena ulutaga tarava?

²¹ Noda railesuva e so na ivakasala i Jisu ena nona iVunau ena Ulunivanua e dodonu me uqeti keda meda dau veidokai, da qai caka vinaka. Dina nida tamata ivalavala ca kece, ia eda se rawa tiko ga ni muria na ivakasala i Jisu baleta ni veiraurau na ka e vinakata meda cakava. E va tale ga qori na nona rai na Tamada vakalomalagi. Ke da dau masu, dau gugumatua qai vakalougatataki keda na Kalou o Jiova, eda na yalomalua kina, da yalololoma da qai dau veiyaloni. Eda na qai vakacila tiko ga na rarama vakayalo me vakalagilagi kina o Jiova. Kena ilutua, eda na veivakameautaki kei ira na tacida ke gadrevi.

²² Ena vakadonuya o Jiova noda sokalou vua ke vinaka noda ivalavala. (Mari. 12:31) Ena ulutaga tarava, eda na veivosakitaka kina e so tale na ivakasala mai na iVunau ena Ulunivanua ena uqeti keda me vinaka tiko ga noda ivalavala. Meda vakasamataka vakatitobu na veitikina bibi ena vuli qo me baleta nona vunau vakasakiti o Jisu ena ulunivanua. Oti meda dui tarogi keda, ‘E dau vinaka beka noqu ivalavala vei ira e so tale?’

[iVakamacala e ra]

O na Sauma Vakacava?

• Na cava na ibalebale ni yalomalua?

• Na cava era marau kina na ‘dau yalololoma’?

• Eda na vakacila rarama vakacava?

• Na cava meda kusa kina meda veivakameautaki se ‘veivinakati kei ira na tacida’?

[iYaloyalo ena tabana e 4]

Noda vunautaka na itukutuku ni Matanitu ni Kalou e dua na sala bibi eda vakacila rarama kina

[iYaloyalo ena tabana e 5]

Mera dau ivakaraitaki vinaka sara ga na lotu vaKarisito ena ivalavala vinaka

[iYaloyalo ena tabana e 6]

Meda saga meda veiyaloni tiko ga kei ira na tacida