“Era sa Muria na Lami”

“O ira oqo era sa muria na Lami e na veiyasana sa lako kina ko koya.”​—VKTA. 14:4.

1. Na cava na nodratou rai na tisaipeli dina i Jisu me baleta na nodratou muri koya tiko ga?

A MAI ‘veivakavulici toka e Kapenaumi’ o Jisu ena rauta na rua veimama na yabaki ni nona a cakacaka vakaitalatala toka mai. Ni dredre nodra kila na ibalebale ni nona vosa, “era sa suka tani kina e le vuqa vei ira na nona tisaipeli, a ra sa sega tale ni lako vata kaya.” E tarogi ratou na 12 na nona yapositolo ke ratou via lako tani tale ga, sa qai sauma o Saimoni Pita: “Kemuni na Turaga, keitou na lako vei cei? sa tu ga vei kemuni na vosa ni bula tawa mudu: ia keitou sa vakabauta ka kila, ni sai Kemuni na Karisito, na Luve ni Kalou bula.” (Joni 6:48, 59, 60, 66-69) Era sega ni via biuti Jisu na nona tisaipeli dina. Ni ratou lumuti oti ena yalo tabu, ratou tomana tiko ga nodratou muria na veidusimaki i Jisu.​—Caka. 16:7-10.

2. (a) O cei na “dauveiqaravi e yalodina qai vuku,” se “dauniyau yalo dina”? (b) E yalodina voli vakacava na dauveiqaravi ena nona “muria na Lami”?

² Na cava e rawa ni tukuni me baleti ira na lotu vaKarisito lumuti ena gauna qo? Ena nona parofisai o Jisu me baleta na ‘ivakatakilakila e dusia nona sa tiko, kei na ivakataotioti ni veika vakavuravura,’ a vakatokai ira kina vakailawalawa na nona imuri e vuravura era lumuti ena yalo tabu me “dauveiqaravi e yalodina qai vuku,” se “dauniyau yalo dina.” (Maciu 24:3, 45, NW; Luke 12:42, VV) E vakadinadinataki ni yalodina voli na dauveiqaravi qo ena nona “muria na Lami e na veiyasana sa lako kina ko koya.” (Wilika Vakatakila 14:4, 5.) Era savasava vakayalo na lewena nira sega ni vakadukadukalitaki ira ena vakabauta kei na vakavuvuli ni “Papiloni na Ka Levu,” oya o lotu lasu kece e vuravura. (Vkta. 17:5) E sega ni “kune e gusudra” na ivakavuvuli lasu, ra qai “sega ni cala” se sega ni tauvi ira na duka ni vuravura i Setani. (Joni 15:19) Ena dua na gauna se bera mai, era na “muri” koya cake na Lami e lomalagi o ira na ivovo ni lumuti e vuravura.​—Joni 13:36.

3. Na cava e bibi kina meda nuitaka na ilawalawa dauveiqaravi?

³ E lesia na dauveiqaravi yalodina qai vuku o Jisu, me “lewai ira na nona lewe-ni-vale,” qo o ira yadudua na lewe ni lawalawa dauveiqaravi, me “solia vei ira na kedra e na gauna dodonu.” E lesi tale ga na dauveiqaravi me lewa “na nona ka kecega.” (Maciu 24:45-47) Era okati ena nona “ka kecega” o ira na “[i]soqosoqo levu sara” ni ‘so tani tale na sipi’ e tubu tiko ga na kedra iwiliwili. (Vkta. 7:9; Joni 10:16) Sega li ni dodonu vei ira na lumuti yadudua kei ira na ‘so tani tale na sipi’ mera nuitaka na dauveiqaravi e lesi me liutaki ira? E levu na vuna meda nuitaka kina na ilawalawa dauveiqaravi. Qo e rua na vuna vakasakiti: (1) E nuitaka o Jiova na ilawalawa dauveiqaravi qo. (2) E nuitaka tale ga o Jisu na ilawalawa dauveiqaravi. Meda dikeva mada e so na ivakadinadina ni rau nuitaka vakaoti na dauveiqaravi yalodina qai vuku na Kalou o Jiova kei Jisu Karisito.

O Jiova e Nuitaki Koya na Dauveiqaravi

4. Na cava eda rawa ni nuitaka kina vakaoti na kakana vakayalo e vakarautaka na dauveiqaravi yalodina qai vuku?

⁴ Dikeva na vuna e rawa kina vua na ilawalawa dauveiqaravi me vakarautaka na kakana vakayalo eda gadreva ena kena gauna dodonu. “Au na vakavulici iko ka vakatakila vei iko na sala mo lako kina,” e kaya o Jiova. E tomana: “Ka’u na rai tiko vei iko ka tuberi iko.” (Same 32:8) Io, e dau dusimaki koya na dauveiqaravi o Jiova. Eda rawa ni nuitaka kina vakaoti na ivakasala vakaivolatabu, kena ivakamacala, kei na veidusimaki nei koya na dauveiqaravi.

5. Na cava e dusia ni vakayaloqaqataka tiko na dauveiqaravi na yalo tabu ni Kalou?

⁵ E vakalougatataka o Jiova na ilawalawa dauveiqaravi ena nona yalo tabu. Dina nida sega ni raica na yalo tabu i Jiova, ia e laurai ga vei ira nira vuataka tiko. Vakasamataka mada na ka sa rawata na dauveiqaravi yalodina qai vuku e vuravura raraba ena kena tukuni yani na itukutuku me baleta na Kalou o Jiova, na Luvena, kei na Matanitu ni Kalou. Era gumatua tiko na dauveiqaravi i Jiova na vunautaka na itukutuku ni Matanitu ni Kalou ena sivia na 230 na vanua kei na veiyanuyanu. Sega li ni dusia vakamatata qo ni vakayaloqaqataka tiko na dauveiqaravi na yalo tabu ni Kalou? (Wilika Cakacaka 1:8.) Ni vakarautaka na kakana vakayalo ena kena gauna dodonu vei ira na tamata i Jiova e vuravura raraba, ena cakava e so na vakatulewa bibi o koya na dauveiqaravi qo. Na nona cakava qori qai raica me vakayacori, sa vakaraitaka tiko kina na dauveiqaravi qo na loloma, yalomalumalumu, kei na so tale na itovo ni yalo tabu.​—Kala. 5:22, 23.

6, 7. E vakacava na ivakarau ni nona nuitaka na dauveiqaravi yalodina o Jiova?

⁶ Meda kila vinaka nona nuitaka o Jiova na ilawalawa dauveiqaravi, vakasamataka mada na nona vosa ni yalayala vei ira na lewena. “Ena uvuci na davui,” a vola na yapositolo o Paula, “ena qai vakaturi cake tale ko ira na mate me sega ni vuca tale, ia koi keda eda na vakamataliataki talega. Sa na vakaisulu na yago vuca oqo me kakua tale ni vuca rawa, ka sa na vakaisulu na yago sa mate oqo me kakua tale ni mate rawa.” (1 Kor. 15:52, 53) O ira na imuri lumuti i Jisu, era yalodina na qarava na Kalou ra qai mate, era na vakaturi mera ka bula vakayalo mera bula tawamudu, ia e sega ni yaco ga e kea. Era na tawamate rawa—⁠ena sega ni mudu nodra bula, ena sega tale ga nira vakarusai. Kena ikuri, e soli vei ira na yago e sega ni vuca rawa qai kena irairai nira na rawa ni bula ga vakataki ira. E kaya na Vakatakila 4:4 ni o ira na vakaturi qo era dabe ena idabedabe vakatui ra qai vakaisala ena isala vakatui koula. E waraki ira tu na lotu vaKarisito lumuti na lagilagi ni bula vakatui. Ia, e tiko e so tale na ivakadinadina ni nona dau nuitaki ira na lumuti na Kalou.

⁷ E volai ena Vakatakila 19:7, 8: “Sa yaco na vakawati ni Lami, a sa vakarautaki koya vakai koya na watina-yalewa. A sa soli vua me vakaisulu e na lineni matailalai, sa savasava ka lumilumisa: ia na lineni matailalai na nodrai valavala dodonu na tamata yalosavasava.” E digitaki ira na lotu vaKarisito lumuti o Jiova mera qai wati Luvena. Sa bau uasivi dina na “vakawati kei na Lami” qo ni sega ni vuca rawa, e tawamate, qai vakaturaga. Era ivakadinadina matata ni nona nuitaki ira na lumuti na Kalou, nira dau “muria na Lami e na veiyasana sa lako kina ko koya.”

O Jisu e Nuitaki Koya na Dauveiqaravi

8. E vakaraitaka vakacava o Jisu ni nuitaki ira na nona imuri lumuti?

⁸ Na ivakadinadina cava e dusia ni nuitaki ira vakaoti nona imuri lumuti o Jisu? Ena iotioti ni bogi ni nona bula e vuravura, a yalataka e dua na ka vei ratou na 11 na nona yapositolo yalodina. “Dou sa dautiko vata kei au e na noqu vosota na dauveivakatovolei,” e kaya vei ratou, “ia ka’u sa solia vei kemudou e dua na matanitu me vaka sa solia mai vei au ko Tamaqu; mo dou kana ka gunu e na noqu tepeli e na noqu matanitu, ka tiko talega e nai tikotiko vakaturaga, me lewai ira na mataqali nei Isireli e tinikarua.” (Luke 22:28-30) Na veiyalayalati a cakava qori o Jisu kei ratou na 11 era na okati tale ga kina na 144,000 na lotu vaKarisito lumuti. (Luke 12:32; Vkta. 5:9, 10; 14:⁠1) Vakasamataka mada, ke sega ni nuitaki ira o Jisu, ena veiyalayalati beka kei ira mera veiliutaki kei koya ena Matanitu ni Kalou?

9. Na cava soti era okati ena “nona ka kecega [o Karisito]”?

⁹ Kena ikuri, sa lesia o Jisu Karisito me qarava na dauveiqaravi yalodina qai vuku “na nona ka kecega”—⁠na veika kece e vauca na Matanitu ni Kalou e vuravura. (Maciu 24:47) Era okati kina na iyaya era vakayagataki ena valenivolavola e liu ni iVakadinadina i Jiova, ena valenivolavola ni tabana e veivanua, na Assembly Hall kei na Kingdom Hall e vuravura raraba, vaka kina na cakacaka vakavunau kei na veivakatisaipelitaki. Ena dua beka e lesia tale e dua me na maroroya qai vakayagataka na nona iyaya vakamareqeti ke sega tu mada ga ni nuitaki koya?

10. Na cava e dusia ni tiko vata kei ira na nona imuri lumuti o Jisu Karisito?

¹⁰ Ni bera toka ga nona lako i lomalagi o Jisu ena gauna sa vakaturi oti kina, a rairai vei ira nona tisaipeli yalodina qai yalataka: “Raica, au na tiko vata kei kemuni me yacova na ivakataotioti ni veika vakavuravura.” (Maciu 28:20, NW) Sa cakava beka qo o Jisu? Ena 15 na yabaki sa oti, e tubu na iwiliwili ni ivavakoso ni iVakadinadina i Jiova e vuravura raraba mai na 70,000 me sivia na 100,000—⁠qo na tubu e sivia na 40 na pasede. Era le vica na tisaipeli vou? E rauta ni 4.5 na milioni na tisaipeli era papitaiso ena 15 na yabaki sa oti—⁠e vakatautauvata ni sivia e 800 era papitaiso e veisiga. E vakasakiti dina na tubu qo, qai vakadinadinataka ni dusimaki ira tiko na nona imuri lumuti o Karisito ena nodra soqoni vakaivavakoso, qai tokona nodra cakacaka ni veivakatisaipelitaki.

E Yalodina Qai Vuku na Dauveiqaravi

11, 12. E yalodina qai vuku vakacava na dauveiqaravi?

¹¹ Ni rau nuitaka vakaoti na dauveiqaravi yalodina qai vuku na Kalou o Jiova kei Jisu Karisito, sega li ni dodonu meda cakava vaka kina? E vakaraitaka sara ga na dauveiqaravi ni yalodina ena itavi e lesi vua me cakava. Me kena ivakaraitaki, sa rauta ni 130 na yabaki na kena tabaki tiko mai na Watchtower (Na Vale ni Vakatawa). E vakaukauataki keda tiko ga vakayalo na soqoni, soqo ni tabacakacaka, kei na soqo ni tikina ni iVakadinadina i Jiova.

¹² E vuku tale ga na dauveiqaravi yalodina ni sega ni dau vakaunona—⁠oya me via liu ni se sega ni matata na veidusimaki i Jiova, se berabera nona cakava na ka ni sa matata tu kina na veidusimaki ni Kalou. Era vakadonuya se ra vakatara tu ga na iliuliu ni lotu me ivakarau ni bula na itovo tawavakalou kei na yalo ni nanumi koya ga sa takalevu tu nikua, ia e veivakasalataki na dauveiqaravi me baleta na leqa e dau yaco ena ituvaki e lewa tu qo o Setani. E vakarautaka na dauveiqaravi na ivakasala ena kena gauna dodonu baleta ni tokona tiko na Kalou o Jiova kei Jisu Karisito. E bibi gona meda nuitaka vakaoti na dauveiqaravi. Ia, eda na vakaraitaka vakacava nida nuitaka na dauveiqaravi yalodina qai vuku?

“Lako Vata” kei Ira na Lumuti Nira Muria na Lami

13. Me vaka e parofisaitaka o Sakaraia, eda na rawa ni vakaraitaka vakacava nida nuitaka na dauveiqaravi yalodina qai vuku?

¹³ E vakamacalataka na ivola na Sakaraia ni ratou torova “e dua na Jiu” e “tini na tamata” ratou qai kaya vua: “Keitou na lako vata kei kemudou.” (Wilika Sakaraia 8:23.) Ni vakayagataki na “kemudou” vua “e dua na Jiu” e kena ibalebale ni vakatakarakarataka tiko e dua na ilawalawa. Ena noda gauna, qori e dusi ira tiko na ivovo ni lotu vaKarisito lumuti—⁠era lewe ni “Isireli ni Kalou.” (Kala. 6:16) Na “lewe tini na tamata era duivosavosa mai na veivanua kecega” e vakatakarakarataki ira na isoqosoqo levu ni so tani tale na sipi. Me vaka ga nira muri Jisu na lotu vaKarisito lumuti ena vanua ga e gole kina, na isoqosoqo levu tale ga ena “lako vata” se tomani koya na dauveiqaravi yalodina qai vuku. Mera kua ni madua na isoqosoqo levu mera vakaraitaka nira tokoni ira na nodra itokani era “sa kacivi mei taukei ni ka vakalomalagi.” (Iper. 3:⁠1) E sega ni madua o Jisu me vakatokai ira na lumuti mera “tacina.”—⁠Iper. 2:11.

14. Eda na rawa ni tokoni ira vakacava ena yalodina na taci Karisito?

¹⁴ E raica o Jisu Karisito ni veitokoni eda cakava vei ira na tacina, eda sa cakava sara tiko ga vua. (Wilika Maciu 25:40.) Era na tokoni ira gona vakacava na taci Karisito lumuti o ira na nuitaka na bula e vuravura? Kena imatai, oya na noda veitokoni ena cakacaka vakavunau. (Maciu 24:14; Joni 14:12) E dina ni sa lutu tiko na kedra iwiliwili na lotu vaKarisito lumuti e vuravura ena vicasagavulu na yabaki sa oti, ia e tubu tiko ga na kedra iwiliwili na so tani tale na sipi. Nira tokona na cakacaka vakavunau o ira na nuitaka na bula e vuravura—⁠ke ra mani rawa sara ni cakacaka vakatabakidua⁠—era sa tokoni ira sara tiko ga na lotu vaKarisito lumuti ena vakayacori ni itavi ni veivakatisaipelitaki. (Maciu 28:19, 20) Meda kua tale ga ni guilecava nida rawa ni tokona na cakacaka qo ena noda cau vakailavo.

15. Meda raica vakacava na lotu vaKarisito na nona vakarautaka na dauveiqaravi na kakana vakayalo kei na vakatulewa e vauca na isoqosoqo?

¹⁵ Vakacava o keda yadudua, eda dau raica vakacava na kakana vakayalo e vakarautaka na dauveiqaravi yalodina ena kena gauna dodonu, oya na ivola vakaivolatabu kei na soqoni vakarisito? Eda dau vakayagataka vinaka qai vakaitovotaka sara na ka eda vulica? Na cava eda cakava ni vakatulewataka na dauveiqaravi na ka e vauca na isoqosoqo? Na noda talairawarawa ina veidusimaki ni dauveiqaravi e dusia nida vakabauta nona tokona o Jiova na ituvatuva qo.​—Jeme. 3:17.

16. Na cava meda vakarorogo kece kina na lotu vaKarisito vei ira na taci Karisito?

¹⁶ “Sa rogoca na noqu vosa ko ira na noqu sipi,” e kaya o Jisu, “ka’u sa kilai ira, ka ra sa muri au.” (Joni 10:27) E dina na vosa qo vei ira na lotu vaKarisito lumuti. Vakacava o ira na “lako vata” kei ira qori? Mera na vakarorogo vei Jisu. E bibi tale ga mera vakarorogo vei ira na tacina, baleta ni vakacolati sara tiko ga vei ira mera karona nodra bula vakayalo na tamata ni Kalou. Na cava soti e vauci ena noda rogoca na ka era tukuna na taci Karisito?

17. Na cava e okati ena noda vakarorogo vua na ilawalawa dauveiqaravi?

¹⁷ Na iLawalawa Dauvakatulewa e matataki koya na dauveiqaravi yalodina qai vuku ena gauna qo. E liutaka qai tuvanaka na iLawalawa Dauvakatulewa na cakacaka vakavunau e vuravura taucoko. Era lewena na iLawalawa Dauvakatulewa na qase ni ivavakoso lumuti ra qai matua vakayalo. O ira sara ga qo e tukuni nira “liutaki” keda tiko. (Iper. 13:7) Era ‘vakaogai ira ena cakacaka ni Turaga’ na qase ni ivavakoso, nira qarava tiko e sivia na 7,000,000 na daukacivaka na itukutuku ni Matanitu ni Kalou e vuravura taucoko ena sivia na 100,000 na ivavakoso. (1 Kor. 15:58, VV) Na noda vakarorogo ina ilawalawa dauveiqaravi e kena ibalebale noda tokona mai vu ni lomada na iLawalawa Dauvakatulewa.

Kalougata o Ira na Vakarorogo Vua na Dauveiqaravi

18, 19. (a) Era vakalougatataki vakacava o ira na vakarorogo vua na dauveiqaravi yalodina qai vuku? (b) Na cava meda nakita dei meda cakava?

¹⁸ Me tekivu mai na gauna a lesi kina, e cakacaka sara tiko na dauveiqaravi yalodina qai vuku me “saumaki ira na lewe vuqa me ra yalododonu.” (Tani. 12:3) E okati kina o ira na nuitaka mera na bula ena gauna ena rusa kina na ituvaki ca kei vuravura qo. Sa bau dua dina na ka ni veivakalougatataki na nona sa na vakabulai keda na Kalou!

¹⁹ Ena dua na gauna se bera mai, ‘na koro tabu, o Jerusalemi vou [ira na 144,000], ena lako sobu mai vua na Kalou mai lomalagi, ena ukucavu me vaka na goneyalewa sa uku me lako vua na watina.’ Na cava ena qai yacovi ira na rogoca na nona vosa na dauveiqaravi? E kaya na iVolatabu: “Na Kalou ena tiko vata kei ira . . . ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” (Vkta. 21:2-4) Qo gona na vuna levu meda vakarorogo kina vei Karisito kei na ira na tacina lotu vaKarisito lumuti nuitaki.

Na Cava o Vulica?

• Na cava na ivakadinadina ni o Jiova e nuitaki koya na dauveiqaravi yalodina qai vuku?

• Na cava e vakaraitaka ni o Jisu Karisito e nuitaki koya vakaoti na ilawalawa dauveiqaravi?

• Na cava meda nuitaki koya kina na dauniyau yalodina?

• Eda vakaraitaka vakacava nida nuitaki koya na dauveiqaravi?

[iYaloyalo ena tabana e 25]

O kila se o cei e digitaka o Jiova me na wati Luvena?

[iYaloyalo ena tabana e 26]

E lesia na dauveiqaravi yalodina qai vuku o Karisito me qarava “na nona ka kecega”

[iYaloyalo ena tabana e 27]

Nida vakaitavi ena cakacaka vakavunau, eda sa tokoni ira sara tiko ga na lotu vaKarisito lumuti