Taro na Dauwiliwili

E Vu Vakalou Na Veivakabulai Kece?

E tiko dina vua na Kalou o Jiova na kaukaua me veivakabulai, e rawa ni solia tale ga na kaukaua qori vei ira na nona tamata. Kena ivakaraitaki, e isolisoli uasivi ni yalo tabu vei ratou na yapositolo na nodratou veivakabulai. E vola na yapositolo o Paula: “E tiko na inaki yaga e cakacaka kina na yalo tabu vua na tamata yadua. Kena ivakaraitaki, e soli na yalo tabu vua e dua me cavuta kina na vosa ni vuku, . . . na isolisoli ni veivakabulai vua e dua tale ena yalo tabu vata ga qori, . . . e dua tale me parofisai, . . . e dua tale me duivosavosa.”​—1 Korinica 12:4-11, NW.

Ia ena nona ivola vata ga qori vei ira e Korinica, a vola kina o Paula ni na mudu na isolisoli ni cakamana ni yalo tabu ni Kalou. E kaya: “Na isolisoli ni parofisai ena oti yani; na duivosavosa ena mudu; na vuku ena oti yani.”​—1 Korinica 13:8, NW.

Eratou a veivakabulai ena imatai ni senitiuri o Jisu kei ratou na nona yapositolo. Ia ena gauna ya, na isolisoli ni yalo tabu me vaka na veivakabulai, e vakalagilagi kina na Kalou o Jiova, e ivakaraitaki tale ga ni nona vakadonuya kei na nona vakalougatataka na ivavakoso vaKarisito a se qai tauyavu ga. Ia ni toso vinaka na ivavakoso qai dei, sa sega ni veiganiti me ivakaraitaki ni veivakadonui ni Kalou na isolisoli uasivi eso. Na vakabauta ga, na inuinui, kei na loloma e ivakadinadina ni vakadonuya na Kalou na ivavakoso vaKarisito. (Joni 13:35; 1 Korinica 13:13) Koya gona, a mai mudu rauta na 100 S.K. na kena vakayagataki na veivakabulai me ivakaraitaki ni nona veivakadonui na Kalou.a

Ia o na rairai lomatarotarotaka, ‘Vakacava na veivakabulai eda dau rogoca ni caka?’ Kena ivakaraitaki, a tabaki ena dua na niusiveva na kena italanoa e dua na turaga a tukuni ni tauvi kenisa. A laurai ni tubu tiko eso na ka e uluna, nona ivi, kei na nona sui. Sa sega tu ni macala na ka ena yaco vua, me yacova na siga e tukuna kina ni “vosa” vua na Kalou. Oti e vica na siga, e tukuna na kena volaitukutuku ni sa yali na kenisa.

Ni o rogoca na italanoa va qori, e vinaka mo taroga: ‘E dina na itukutuku qo? E tiko na kena ivakadinadina? Ke tiko mada ga na iwali ni tauvimate, e tukuna beka na iVolatabu ni vakavuna na Kalou na veivakabulai kece?’

E bibi dina meda kila na isau ni iotioti ni taro. E vakasalataki ira na nona imuri o Jisu: “Dou qarauni kemudou mai vei ira na parofita vakailasu . . . Era na kaya vei au e lewe vuqa e na siga ko ya, ‘Kemuni na Turaga! Keimami a sega li ni vakatavuvuli e na yacamuni, ka vakasavi tevoro e na yacamuni, ka cakava na cakacaka mana e vuqa e na yacamuni?’ Ia, au na qai kaya vei ira, ‘Au sega sara ni kilai kemudou; dou lako tani vei au ni dou sa tamata dau caka ca!’”​—Maciu 7:15, 21-23, VV.

E matata mai na ka e tukuna ya na iVolatabu ni dua tale e rawa ni vakavuna nodra veivakabulai eso, sega ni Kalou. Mera kua ni vakacalai keda na kaya nira veivakabulai ena yaca ni Kalou, e bibi me donu na ka eda kila me baleta na Kalou, meda vakayagataka noda vakasama, da qai kilai ira era cakava tiko na lomana.​—Maciu 7:16-19; Joni 17:3; Roma 12:1, 2.

[iVakamacala e ra]