Vakavulica na Luvemu

Na Vuna a Sega ni Vakusakusa Kina o Jisu

E ROGOCA o Jisu ni tauvimate bibi o Lasarusa na nona itokani dredre. A vakasavuya vua na itukutuku qori e dua rau a tala mai o Meri kei Marica na ganei Lasarusa. Na italai qo e cavutu mai Pecani na nodratou itikotiko na veiganeni. Eratou tiko vakayawa na veiganeni ena tai ni Uciwai na Joritani, ia erau vakabauta o Meri kei Marica ni rawa ni vakabulai Lasarusa o Jisu ni sa vakabula oti eso era tu vakayawa.​—Maciu 8:​5-13; Joni 11:​1-3.

Ni rogoca o Jisu na itukutuku rarawataki, a sega ni vakusakusa. E tukuna na iVolatabu: “E tiko tale e kea me rua na siga.” (Joni 11:6) O kila na vuna a sega ni vakusakusa kina o Jisu me vukei Lasarusa?​—a Meda raica mada.

E tukuna o Jisu vei ratou na nona yapositolo ena gauna e rogoca kina ni sa mate o Lasarusa: “Me datou lako tale i Jutia.” Eratou kaya: “Era se qai via vakaviriki iko mada ga ena vatu na kai Jutia, oni via lako tale kina?” Sa qai vakamacalataka o Jisu: “Sa moce na nodatou itokani o Lasarusa, ia au sa lako qo meu lai vakayadrati koya.”

Eratou kaya na yapositolo: “Turaga, ke moce dina o koya, ena bula vinaka mai.” Sa qai vakamatatataka o Jisu: “Sa mate o Lasarusa.” E tukuna tale ga e dua na ka eratou rairai kurabuitaka: “Au marau ena vukumudou niu a sega ni tiko e kea, . . . Me datou lako sara vua.”

E vosa cake ena doudou o Tomasi: ‘Me datou lako tale ga me datou mate vata kei Jisu.’ E kila o Tomasi nira na saga tale na meca mera vakamatei Jisu, rairai eratou na vakamatei tale ga na yapositolo. Ia eratou lako vata ga kei Jisu. Eratou yaco i Pecani na koro i Lasarusa ni oti e vica na siga. E rauta ni tolu na kilomita na kena yawa mai Jerusalemi.​—Joni 11:​7-18.

O kila na vuna e marau kina o Jisu ni a sega ni lako totolo e kea?​—E liu a vakaturi ira e vica o Jisu, o ira qori era a mate ena loma ni vica ga na aua. (Luke 7:​11-17, 22; 8:​49-56) Ia na yagoi Lasarusa sa tu ena ibulubulu me vica na siga. Era kila kece ni sa mate dina!

Ena gauna e rogoca kina o Marica na ganei Lasarusa ni sa voleka yani i Pecani o Jisu, e cici sara me lai tavaki koya. E kaya: “Turaga, ke oni a tiko eke, ke a sega ni mate o ganequ.” A mani yalataka vua o Jisu: “Ena tucake tale na ganemu.” E cici lesu o Marica qai tukuna lo vei Meri na tacina: “Sa tiko qo na Qasenivuli, e tarogi iko tiko.”

E biubiu sara o Meri me lako vei Jisu. Era muri Meri e dua na ilala levu nira nanuma e lako ina ibulubulu. A “tagi” tale ga o Jisu ni raica na nona tagi voli o Meri kei ira na ilala levu era lako vata yani. Era yaco sara ina ibulubulu e sogo tu ena dua na vatu levu. E kaya o Jisu: “Ni kauta tani na vatu.” Ia e kaya o Marica: ‘Turaga sa na boi na yagona ni qo sa ikava ni siga.’

Era mani muria na ivakaro i Jisu ra qai kauta tani na vatu. E vakavinavinakataka mada na Kalou o Jisu, ni kila o koya ga ena solia na kaukaua me vakaturi Lasarusa. E kaci “vakadomoilevu” o Jisu: “Lasarusa, lako mai tuba!” A mani lako mai tuba o Lasarusa, “e viviraki tu.” E vakarota o Jisu: “Sereka na isolenimate me lako.”​—Joni 11:​19-44.

O sa qai kila na vuna a sega ni vakusakusa kina o Jisu?​—E kila ke wawa, era na rawa ni vakabauta e levu na veika me baleti Jiova na Tamana nira na raica na ka e cakava. Ni digia na gauna vinaka, era vakabauta kina na Kalou e levu. (Joni 11:45) O kila na cava eda vulica ena ivakaraitaki i Jisu?​—

O rawa tale ga ni digia na gauna vinaka mo tukuna kina na veika totoka sa cakava oti na Kalou kei na veika ena cakava ena gauna se bera mai. De dua o rawa ni tukuna vei ira oni vuli vata se vua na nomu qasenivuli. Eso na gone era tukuna ena nodra gauna ni kalasi na veivakalougatataki ni Matanitu ni Kalou ina kawatamata. Eda sega ni rawa ni vakaturi ira na mate, ia meda vukei ira tale eso mera kila na Kalou ena vakaturi ira dina na wekada voleka era sa takali.

[iVakamacala e ra]

TARO:

▪ Na cava a sega ni vakusakusa kina o Jisu me vukei Lasarusa?

▪ Na cava e kaya kina o Tomasi: ‘Me datou lako tale ga me datou mate vata kei Jisu’?

▪ A rawa vakacava ni vakaturi Lasarusa o Jisu?

▪ O na vakatotomuri Jisu vakacava?