Taro Na Dauwiliwili . . .

Ena Vakavucesa na Bula Tawamudu ena Parataisi?

▪ E tukuni ena iVolatabu na inuinui ni rawa nida bula tawamudu ena Parataisi e vuravura. (Same 37:29; Luke 23:43) Ena vakavucesa beka na bula tawamudu ena ituvaki e uasivi?

Qori e dua dina na taro vinaka. Era kunea na dauvakadidike ni vucesa ena rairai vakavuna vua e dua na lomaocaoca, lomabibi, qai cakava na ka ena vakaleqai koya. O ira era nanuma ni sega ni vakainaki na nodra bula se ra vuturitaka na nodra bula e veisiga, e rawarawa sara mera vucesa. Ena vakainaki na nodra bula o ira era na bula ena Parataisi se sega? Ena vakavucesa na bula e veisiga?

E dua na ka meda vakasamataka ni Kalou o Jiova e vakavuna na iVolatabu, e yalataka na bula tawamudu. (Joni 3:16; 2 Timoci 3:16) Na nona itovo talei duadua na loloma. (1 Joni 4:8) Ena levu ni nona loloma, e solia vei keda na ka vinaka kece eda marautaka tiko ena gauna qo.—Jemesa 1:17.

E kila na Dauveibuli nida na marau ke da cakava na cakacaka e yaga. (Same 139:14-16; Dauvunau 3:12) O ira na bula ena Parataisi era na sega ni vaka na misini e porokaramutaki tu na ka mera cakava. Ena sega ni yaga ga vei ira na ka era cakava, ena yaga tale ga vei ira era lomana. (Aisea 65:22-24) Ena vakavucesa na bula ke o cakacaka e veigauna, o taleitaka na ka o cakava, qai levu na ka vou o vulica kina?

Meda vakasamataka tale ga ni Kalou o Jiova ena sega ni vakatara vakaveitalia e dua na tamata me bula ena Parataisi. E yalataka na bula tawamudu vei ira ga era vakatotomuria na Luvena o Jisu. (Joni 17:3) A marau o Jisu me cakava na lomai Tamana ena gauna a bula voli kina e vuravura. A vakavulici ira tale ga na nona imuri ena ka e tukuna kei na ka e cakava ni rawati na marau nida solia na ka, vakalailai ena taura na ka. (Cakacaka 20:35) O ira kece era na bula ena Parataisi vou era na muria e rua na ivakaro levu duadua—nodra lomana na Kalou kei na nodra lomani ira na kainodra. (Maciu 22:36-40) Vakasamataka mada ni o bula vata kei ira era dau veinanumi, era lomani iko ra qai taleitaka na nodra cakacaka! O nanuma ni o na vucesa na tiko kei ira?

Na cava tale e okati ena bula ena Parataisi? E dua na ka vou eda na vulica e veisiga me baleta na Dauveibuli. E levu sara na ka vakasakiti me baleta na ibulibuli i Jiova era sa kunea na dauvakadidike. (Roma 1:20) Ia me yacova mai nikua e lailai sara na ka eda kila me baleta na nona ibulibuli. A vakatakila na turaga yalodina o Jope ena vica na udolu na yabaki sa sivi me baleta na veika e bulia na Kalou, na ka e tukuna oya se dina tiko ga. E kaya: “Oqori ga na nonai valavala vakatikina eso: Ia na vakasolokakana walega eda sa rogoca kina: Ia na kurukuru ni nona kaukauwa, ko cei me na kila rawa?”—Jope 26:14.

Se mani vakacava na balavu ni noda bula, eda na sega ni kila rawa na ka kece me baleta na Kalou o Jiova kei na nona cakacaka. E tukuna na iVolatabu ni tugana e lomada meda vinakata na bula tawamudu. Ia e tukuna tale ga nida na sega ni “kunea rawa na cakacaka sa cakava na Kalou mai na kenai vakatekivu ka yacova na kenai otioti.” (Dauvunau 3:10, 11) O nanuma ni na vakavucesa na vulica na veika vovou me baleta na Dauveibuli?

Ena gauna mada ga qo, o ira era oga ni vukei ira tale eso ra qai vakalagilagia na Kalou e tu tu yadua mera vucesa. Ke da oga tiko ga ena cakacaka vata qo, eda na sega ni vucesa—ke vaka mada ga eda bula tawamudu.

[iTaba ni Credit Line ena tabana e 27]

Vuravura: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)