“Au na Vunau Rawa Vakacava?”

E levu na tacida e veiyasai vuravura era gumatua ni vakaitavi ena cakacaka vakavunau dina ga ni tauvi ira eso na mate lelevu. Kena ivakaraitaki o Dalia, e vakaitikotiko e Vilnius na koroturaga kei Lithuania.

Na tacida yalewa qo e yabaki 30 vakacaca. E tauvi koya na strouk ena gauna e se qai sucu kina. E vakavuna qori me paralase qai sega ni matata na ka e tukuna. O ratou ga na nona vuvale ratou kila na ka e vinakata. Ia e qaravi koya tiko na tinana, o Galina. E vakila dina o Dalia na dredre kei na rarawa ena nona bula taucoko, ia e donu tiko ga na nona rai. E rawa vakacava qori?

E tukuna o Galina: “Ena 1999, a sikovi keirau mai na wekaqu o Apolonija. Me vaka ni dua na iVakadinadina i Jiova o Apolonija keitou raica ni kila vinaka sara na iVolatabu, mani vakatarogi koya sara ena levu na taro o Dalia. E vulica sara na iVolatabu. Eso na gauna au na tomani rau ena vuli meu vakamatatataka na ka e dau tukuna o Dalia. Au raica ni yaga sara vua na ka kece e vulica tiko. Toso na gauna au kerea tale ga meu vuli iVolatabu.”

Ni matata vei Dalia eso na ivakavuvuli dina ena iVolatabu, sa qai lomatarotarotaka ga vakalevu e dua na ka. Yaco na gauna me sega ni kinoca rawa mani tarogi Apolonija kina: “Niu paralase tu, au na vunau rawa vakacava?” (Maciu 28:19, 20) E vakacegui Dalia o Apolonija ena nona tukuna: “Kua ni rere, o Jiova ena vukei iko.” Io, e dau cakava dina qori o Jiova.

E rawa gona vakacava ni vunau o Dalia? Qo eso na ka e dau cakava kei ira na tacina vakayalo. Era dau vukei koya eso na mataveitacini yalewa me dau vola eso na itukutuku ni iVolatabu me qai vakauta. Ena vakamacalataka mada e liu o Dalia vei ira na mataveitacini na ka e nanuma. Oti era qai vola sara na ka e tukuna. E dau vunau tale ga o Dalia ena nona vakauitukutuku ena mobail. Ni draki vinaka, era dau kauti koya eso na lewe ni ivavakoso me dau vunau ena dua na rara voleka ga se yasa ni gaunisala.

Erau toso tiko ga vakayalo o Dalia kei tinana. Erau yalataki rau vei Jiova, rau papitaiso sara ena Noveba 2004. Ena Seviteba 2008, tauyavutaki e dua na iwasewase lailai ena vosa vakaPoladi e Vilnius. Ni gadrevi vakalevu kina na dautukutuku ni Matanitu ni Kalou, rau mani lewena na iwasewase lailai qori o Dalia kei tinana. E tukuna o Dalia: “Au dau leqataka niu sega ni vunau ena so na vula. Ia niu kerea na veivuke i Jiova, ena kerei au sara e dua meu tomani koya ena cakacaka vakavunau.” E raica vakacava o Dalia na kena ituvaki? E tukuna: “Na mate e tauvi au e vakavuna meu paralase, ia e sega ni paralase na noqu vakasama. Au marautaka ga vakalevu niu wasea na ka e baleti Jiova vei ira eso tale!”