Vanua e Maroroi Kina na Keda iTukutuku

“Au sa Qai Taleitaka Tiko ga na Cakacaka ni Volitaki iVola e Veisiga”

ENA 1886, a kau i Chicago, Illinois e duanadrau na itabataba ni Millennial Dawn, Volume I era tu ena Bible House i Allegheny, Pennsylvania mai Merika. A nanuma o Charles Taze Russell me veisoliyaki na ivola vou qo ena sitoa ni ivola. A vakadonuya e dua na kabani levu e dau volitaka na ivola ni lotu mai Merika me veisoliyaka na ivola na Millennial Dawn. Ia ni oti ga e rua na macawa a vakasukai lesu tale ina Bible House na ivola kece oya.

E tukuni ni a levataka e dua na dauvunau kilai ni rau tuvani vata tu ena sitoa ni ivola na nona ivola kei na Millennial Dawn. E kaya ke raica tiko ga na ivola oya ena kauti ira na nona itokani qai tokitaka na nona bisinisi kei na nona ivola ena dua tale na vanua. A sega ni marautaka na kabani ni ivola e dau volitaka na ivola na Dawns me vakauta lesu, ia mani cakava ga. Kena ikuri, a laurai tale ga ena niusiveva eso tale na itukutuku me baleta na ivola na Dawns. Ia o ira na saqata na itukutuku qori era tarova na kena tabaki. Era na qai kila vakacava na ivola vou qo o ira era vakasaqara na ka dina?

Era rawa ga ni vakayacora qo o ira era kilai ena gauna oya mera dauvolitaki ivola.a Ena 1881, a kerea e 1,000 na dauvunau na Zion’s Watch Tower me nodra cakacaka vakatabakidua na veisoliyaki ivola vakaivolatabu. Era sega ni levu sara na dauvolitaki ivola ia era vakatetea na sore ni ka dina ena nodra veisoliyaka na ivola ena veivanua yawa sara. Me qai yacova na 1897, e voleka ni dua na milioni na ivola na Dawn era sa veisoliyaka rawa na dauvolitaki ivola. E levu vei ira qori era bula ga ena dua na iwase ni ilavo lailai era cautaka o ira era taura na Watch Tower se na ivola era solia.

O cei o ira na dauvolitaki ivola gugumatua qo? So era tekivu nira se gone, so tale era cakava qori nira sa uabula. E levu era dawai, eso na veiwatini era sega ni vakaluveni, qai levu tale ga na vuvale era vakaitavi kina. Era dau cakacaka ena siga taucoko na dauvolitaki ivola tudei, qai tiko ga o ira era dauveivuke era cakacaka ga ena dua se rua na aua e veisiga. E sega ni levu vei ira era bulabula vinaka, so tale ena vuku ni kedra ituvaki era sega ni rawa ni vakayacora na cakacaka qo. Ia ena dua na soqo ni tikina ena 1906 e tukuni kina ni sega ni gadrevi vua e dauvolitaki ivola me “vuli vinaka sara se vaka taledi kina, se tiko vua na gusu ni agilosi.”

Era vakayacora rawa ga na cakacaka vakasakiti qo e veiyasai i vuravura o ira era sega ni kenadau kina. E tukuna e dua na tacida ni solia rawa e 15,000 na ivola ena loma ga ni vitu na yabaki. E kaya, “Au sega ni vakaitavi ena cakacaka qo meu volitaki ivola kina, ia meu vunautaki Jiova ga kei na ka dina me baleti koya.” E vakawakana na sore ni ka dina ena nodra cakacaka na dauvolitaki ivola, qai tubu tiko ga na Gonevuli iVolatabu ena vanua kece era lako kina.

Era cati ira na dauvolitaki ivola na iliuliu ni lotu, ra qai kacivi ira mera dauvolivolitaki. A vakamacalataka Na Vale ni Vakatawa ni 1892: “E vica wale sara era kilai [ira] mera matataka dina na Turaga, se ra raica ni dokai ira na Turaga nira yalomalumalumu ra qai vakuai ira.” Io, me vaka ga e tukuna e dua na marama, na nodra bula na dauvolitaki ivola e sega ni rawarawa. Na sala duadua ga ni veilakoyaki na nodra vava kaukaua kei na basikeli. Ke lailai na ilavo era na solia na ivola me rawa kina na kakana. Ni oti na nodra cakacaka vakavunau era dau lesu tale ina nodra valelaca se na vale era redetaka, era dau oca ia era marau ga. Lakolako sa ra bulia ga e dua na nodra motoka vakavale (Colporteur Wagon) e vakarawarawataka na nodra cakacaka qai sega ni levu tale ga na ilavo era vakalusia kina.b

Na Soqo ni Tikina mai Chicago ena 1893, sa rogoci kina eso na ulutaga e baleti ira na dauvolitaki ivola. Qo e okati kina eso na irogo, vakatutu ni iwalewale ni vunau, kei na ivakasala yaga. A uqeti ira na dauvunau o Brother Russell mera katalau vinaka, mera yadua na bilo sucu ena vakasigalevu, ke katakata na siga mera gunu ice-cream soda (aisikirimu vakawainimoli).

Era dau vakareveni dromodromo na dauvolitaki ivola ke ra vaqara e dua mera cakacaka vata. O ira se qai vakaitavi vakadua ena volitaki ivola era na veitomani kei ira sa kenadau. E bibi na veivakavulici qori, ni cavuta sara ga ena taqaya e dua se qai vou ga ena volitaki ivola, “O sega ni vinakata na ivola qo?” Kalougata ni a ciqoma na ivola qori o koya a vosa kina qai mai dua na tacida yalewa.

A vakasamataka e dua na turaga, ‘Meu cicivaka tiko ga na noqu bisinisi vinaka qai cautaka e duanaudolu na ilavo ni Merika ena cakacaka qo e veiyabaki, se meu vakaitavi ena volitaki ivola?’ A tukuni vua ni na marautaka na Turaga ke cakava e dua vei rau na ka e vakasamataka tiko, ia ena kalougata sara ke cakacaka vakatabakidua sara ga vua na Turaga. A raica o Mary Hinds ni “sala vinaka duadua me caka vinaka kina vei ira e levu,” oya na nona volitaki ivola. A tukuna e dua na turaga e dau mamadua o Alberta Crosby, “Au sa qai taleitaka tiko ga na cakacaka ni volitaki ivola e veisiga.”

E levu na wekadra vakayago kei na wekadra vakayalo na dauvolitaki ivola gugumatua era tomana tiko ga na cakacaka qo nikua. Ke sega ni dua ena nomu vuvale e cakacaka vakatabakidua se painia, vakacava mo tekivuna? O na liaca ni toso na gauna o na qai taleitaka ga vakalevu na cakacaka vakatabakidua.

[iVakamacala e ra]

[Tikina bibi ena tabana e 32]

Sega ni gadrevi vua e dauvolitaki vola me “vuli vinaka sara se vaka taledi kina, se tiko vua na gusu ni agilosi”

[iYaloyalo ena tabana e 31]

Na dauvolitaki ivola o A.  W. Osei e Ghana, rauta na 1930

[iYaloyalo ena tabana e 32]

E cake: Na dauvolitaki ivola o Edith Keen kei Gertrude Morris e Igiladi, ena rauta na 1918; e ra: Stanley Cossaboom kei Henry Nonkes e Merika kei na kateni lala ni ivola erau veisoliyaka