iWali ni Yaloca na Yalololoma
A SEGA ni taleitaka e dua na kena marama e Necaladi nodrau vakamacalataka vua na itukutuku vinaka ni Matanitu ni Kalou e rua na iVakadinadina, o George kei Manon. Erau qai kila ni sa takali ruarua na watina na marama qo kei na luvena tagane, qai tauvi koya tu na sasala ena kena ivakatagedegede e ca sara ga. A qai vakarorogo ni toso nodratou veitalanoa ia a sega tiko ga ni taleitaki rau.
Mani nanuma o George me rau na kauta vua e dua na ivutu senikau kei Manon ena gauna rau na lesuvi koya kina ni rui galili qai yalorarawa. Ni rau yaco yani ina vale nei koya na marama oya, na yacana o Rie, e kurabui sara ga ni raici rau. Me vaka ni a sega ni namaki rau, ratou mani tuvanaka tale e dua na siga me ratou sota kina. Ia ni rau lesu yani ena siga ratou lokuca, rau sega ni sotava e dua. Rau lesu tale vakavica, sega tiko ga ni ratou sota. Lakolako rau sa nanuma ni sa sega ni taleitaki rau.
Dua tale na siga ni gole yani o George, sa qai sotavi koya e nona vale. A kerea me rau vosota ni sega rawa ni ratou sota ni a curu i valenibula. A kaya vei rau: “Drau na sega ni vakabauta na ka au cakava ena nomudrau biubiu oti ga ena siga ya. Au sa tekivu wilika na iVolatabu!” Totoka sara nodratou veitalanoa, tauyavu tale ga na vuli iVolatabu.
Ni toso nona vulica na iVolatabu o Rie, sa yalololoma qai mamarau, sa sega ni dau yaloca me vaka e liu. Ni sa tiko ga e vale, e dau wasea na ka dina e sa kila vei ira kece era sikovi koya yani. E tautauvimate qai sega ni wasoma nona lako ena soqoni, ia e marautaka nodra dau sikovi koya na mataveitacini. Ena siga sara ga e yabaki 82 kina, a tiko ena soqo ni tabacakacaka qai yalataki koya vei Jiova ena nona papitaiso.
Ni oti e vica na vula na nona takali, a qai kune e dua na serekali a vola. A vakayatuyatutaka na rarawa e vakavuna na galili kei na yaga ni yalololoma. “E tarai au sara ga na qaqa ni serekali oya ena gauna au wilika kina,” a kaya o Manon, “ia au marau ga ni vukei keirau o Jiova me keirau lomana na marama ya.”
Io, e uqeti keirau dina na ivakaraitaki i Jiova me keirau dauloloma qai yalovinaka. (Efeso 5:1, 2) Ena vuavuaivinaka noda cakacaka vakaitalatala nida “dauveiqaravi ni Kalou . . . yalovinaka.”—2 Kor. 6:4, 6.