Vanua e Maroroi Kina na Keda iTukutuku Makwa
Nodra Cakacaka na Pilgrim
“AU SEGA ni rawa ni lako e veivale!” Era nanuma tale ga qori e levu na vuli iVolatabu vou me baleta na nodra vunau vei ira era sega ni kila! Ia na vosa qori a cavuta e dua e maqosa na vunau, e qasenivuli tale ga ni iVolatabu qai vakatokai me pilgrim (kedra icavuti na ivakatawa dauveilakoyaki ena gauna ya).
Levu era dau wilika na Zion’s Watch Tower era biuta na nodra lotu era vinakata mera veimaliwai kei ira era taleitaka tale ga na ka dina ena iVolatabu. Na mekesini qori e uqeti ira na dauwiliwili mera vaqara eso tale era vakabauta vata, mera soqoni wasoma mera vulica na iVolatabu. E rairai tekivu ena 1894 na nodra talai eso era matataka na Watch Tower Society mera raici ira era kerea mera sikovi. Qori o ira na tagane matua qai daucakacaka era digitaki nira yalomalua, kila na iVolatabu, maqosa ena vosa kei na veivakavulici, ra qai vakaraitaka nira yalodina ina isoro ni veivoli i Jisu kei na ka talei e vakaibalebaletaka. Ena dua se rua ga na siga na veisiko qori, ia e siga osooso ruarua. Era vakaitavi ena imatai ni gauna ena cakacaka vakavunau e levu na vuli iVolatabu nira veisoliyaka na tikidua ni veisureti ena nona ivunau o koya e veisiko yani. Ni vunau oti ena dua na yakavi ena dua na koronivuli o Hugo Riemer, a qai lewe ni iLawalawa Dauvakatulewa, a sauma na taro vakaivolatabu me yacova na bogilevu. A wawale, ia e marau qai kaya ni “totoka” na soqoni.
E kaya na Watch Tower ni vuna bibi era veisiko kina o ira era vaka na ivakatawa dauveilakoyaki, mera vakayaloqaqataka na “lewenivuvale vakabauta” ena soqoni e dau caka ena nodra vale na vakabauta. O ira na Gonevuli ni iVolatabu ena veivanua voleka era mai rogoca na ivunau kei na veitarotarogi e dau caka. Oti qori era na vakaraitaka na lotu vaKarisito na nodra veikauaitaki. Ni se goneyalewa o Maude Abbott e dau lai rogoca e dua na vunau ena mataka, oti era dabe kece na vakarorogo ena dua na teveli balavu ena lomanibai. E kaya o koya: “E levu dina na kakana totoka, na saga ni vuaka, toa tavuteke, veimataqali madrai, pai, kei na keke! Keimami kana kece me yacova ni keimami sa mamau, qai rogoca tale e dua na ivunau ena rauta na rua na kaloko.” E tomana, “na gauna e qai tekivu tale kina era sa via sosovu kece na vakarorogo.” E kaya o Benjamin Barton a dede nona qarava voli na itavi vaka pilgrim, ‘Keu kania na kakana vinaka kece e dau vakarautaki, au sa cegu makawa ena noqu itavi qo.’ A vakau mai na itikotiko liu e Brooklyn e dua na ivola e vakasalataki ira na tacida yalewa dauveikauaitaki mera vakarautaka ga vei ira na pilgrim na “kakana rawarawa,” mera kua tale ga ni “vakasosani nira moce.”
E maqosa na ivakarau ni nodra veivakavulici na pilgrim qai bulabula na nodra vunau nira vakayagataka na droini, ivakatakarakara, se ka ga e tu vei ira ena gauna ya. Na nona vunau o R. H. Barber “e levu na kena isaluaki vakayalo.” E vaka ga na tama o W. J. Thorn, e dau vosa “me vakataki ira na peteriaki ena gauna makawa.” Ni vodo tiko o Shield Toutjian ena dua na motoka na A Ford, a kailavaka, “Kele mada!” E sobu me lai betia eso na senikau, sa qai vakamacalataka eso na ka me baleta na ibulibuli i Jiova.
E sega ni rawarawa na nodra cakacaka na pilgrim, vakabibi vei ira sa uabula se sa dua toka na itaba. Ia na ituvaki dredre duadua era sotava eso tale, na kena veisau na iwalewale ni nodra cakacaka. Qo sa na vinakati mera liutaka na cakacaka vakavunau e veivale. E tukuna na Watch Tower ni 15 Maji, 1924, ni “dua na itavi bibi” ni lotu vaKarisito dina me “tukuna vei ira tale eso na Matanitu ni Kalou. Qori na inaki ni nodra talai na pilgrim.”
Eso era biuta na nodra cakacaka ni veisiko nira sega ni taleitaka na veisau qori, eso era cudru ra qai tauyavutaka ga na nodra lotu. A talanoataka o Robie D. Adkins na nona cavuta ena rarawa e dua na pilgrim qai maqosa na vosa: “Au kila wale ga na vunau mai na buturara. Au sega sara ga ni rawa ni lako e veivale!” A nanuma lesu o Brother Adkins: “Au raica na tacida qori ena soqo ni tikina mai Columbus, Ohio ena 1924. O koya duadua ga e mataruburubu tu ena soqo ya, a duri duadua toka ena ruku ni dua na vunikau lailai, o koya duadua ga e rarawa, ia o ira na vica tale na udolu na mataveitacini era mamarau. Ya ga na iotioti ni gauna au raici koya kina, sega ni dede sa biuta na isoqosoqo.” Ena yasana adua, “keimami veisivi kei na levu na mataveitacini mamarau era kau ivola tiko ena nodra motoka,” era sa nanamaki sara tu ga mera vunau e veivale.—Caka. 20:20, 21.
Me vakataki ira ga era lai vakavulica, dua na ka na nodra rere tale ga ni vunau e veivale e levu na pilgrim, ia era gumatua ga ni vunau. Me baleta na cakacaka vakavunau e veivale, a vola e dua na pilgrim e kila na vosa vakaJamani o Maxwell G. Friend, “Sa qai ikuri ga ni veivakalougatataki ena neimami ilakolako na iwalewale vou ni neimami cakacaka na pilgrim.” A ripotetaka e dua na pilgrim o John A. Bohnet nira duavata na mataveitacini ni vinakati me vunautaki na Matanitu ni Kalou. E kaya ni dua na iwase levu e “gu sara ga na lomadra mera liu ena cakacaka qo.”
Era vakila sara ga na mataveitacini na yaga ni nodra dau veisiko na tagane yalodina qori. A kaya e dua e iVakadinadina tu mai ena dua na gauna balavu o Norman Larson, “Niu se gone au sa raica rawa na yaga kei na bibi ni nodra itavi na pilgrim, era vukei au sara ga meu cakava na ka e dodonu.” Me yacova mai qo, na nodra dau vakuai ira kei na nodra yalodina na ivakatawa dauveilakoyaki sa vukei ira tiko na mataveitacini mera kaya, “Keimami rawa ni vunau e veivale!”
[Tikina bibi ena tabana e 32]
E dau gauna marautaki na nodra yaco mai na pilgrim!
[iYaloyalo ena tabana e 31]
Na ituvatuva i Benjamin Barton ena yabaki 1905, e rauta ni 170 na vanua e veisiko kina
[iYaloyalo ena tabana e 32]
O Walter J. Thorn a dua na pilgrim, e vakatokai me o Pappy ni dau vaka e dua na tama
[iYaloyalo ena tabana e 32]
O J. A. Browne a lesi i Jamaica me pilgrim ena rauta na yabaki 1902 me vakaukauataki ira qai vakayaloqaqataki ira e 14 na iwasewase lalai
[iYaloyalo ena tabana e 32]
Na nodra cakacaka na pilgrim e vakaukauataka na vakabauta, dei kina na duavata vaKarisito, e vakavolekati ira tale ga na mataveitacini ina isoqosoqo