Vanua e Maroroi Kina na Keda iTukutuku Makawa

‘Na iTukutuku Vinaka Duadua me Bau Rogoci’

“ME KA ni cava ya?” a taroga o George Naish ni dusia tiko na ibinibini tolonikau e 18 na mita na kena balavu era tu ena vanua era dau maroroi kina na iyaya ena iMatai ni iValu Levu mai Saskatoon, Saskatchewan i Kenada. A tukuni vua ni kau ya era dau tara kina na tawa ni sikinala donuya na iMatai ni Valu Levu. “Au nanuma ni rawa ni vakayagataki na kau ya me tara kina na tawa ni retio,” a qai tukuna o Brother Naish, “a tekivu sara ga e keri na kena vakasamataki me dua na siteseni ni retio me kaburaki kina na itukutuku vakaivolatabu.” Ni oti ga e dua na yabaki​—ena 1924​—sa tekivu kakaburaki sara na siteseni na CHUC. Ya na imatai sara ga ni siteseni ni retio me kaburaka na ka ni lotu mai Kenada.

O Kenada e via vaka ga na levu kei Urope, oya na vuna e vanua vinaka tale ga me caka kina na vunau ena retio. “Bau vinaka mada ga ni dua noda siteseni ni retio, sa rawa kina nira kila na ka dina e levu ena veivanua eda sega ni rawa ni vunau kina,” e kaya o Florence Johnson, a cakacaka ena siteseni i Saskatoon. “Ni ka vou ena gauna ya na retio, dua na ka nodra via rogoca na tamata na itukutuku cava ga e kaburaki.” Ena 1926, sa ra cicivaka ga na nodra siteseni ni retio ena va na siti mai Kenada na Gonevuli ni iVolatabu (se ra kilai kina na iVakadinadina i Jiova ena gauna ya).a

Na cava o na rogoca ena dua na siteseni qo? Era daulagasere na mataveitacini ena ivavakoso voleka ra qai vakayagataka kina na iyaya ni ivakatagi, eso na gauna e dau dua sara na mataivakatagi lailai. Ena rogoci na ivunau, e veivosakitaki tale ga na iVolatabu. A vakaitavi ena veivosaki va qori o Amy Jones, a nanuma lesu, “Niu vakamacalataki au oti ena dua na vale au vunau kina, so na gauna era na kaya na itaukeinivale, ‘Io au kila, au dau rogoci iko ena retio.’”

Dua na iwalewale vou ni veivosaki ena retio era vakayagataka na Gonevuli ni iVolatabu mai Halifax, Nova Scotia​—oya mera vakaitavi tale ga na vakarorogo ena ka e veivosakitaki, era rawa ni qiri ena siteseni ra qai taroga eso na taro vakaivolatabu. “Dua na ka na levu ni tamata era vakaitavi kina,” e vola e dua na tacida tagane. “Voleka tale ni vakaleqa na siteseni na levu ni qiri.”

Me vaka ga na nona gauna na yapositolo o Paula, eso era ciqoma nodra itukutuku na Gonevuli ni iVolatabu, so tale e sega. (Caka. 17:​1-5) Eso era taleitaka na ka era rogoca ena siteseni. Kena ivakaraitaki, ni rogoca o Hector Marshall ena retio na nodra tukuna na Gonevuli ni iVolatabu na ivola Studies in the Scriptures, a otataka sara e ono na itabataba ni ivola ya. “Au nanuma ni na vukei au na ivola ya niu veivakavulici ena wilivola ni Sigatabu,” a vola ena dua na gauna e muri. Ni wilika oti na imatai ni kena itabataba, a vakatulewataka sara me biuta na nona lotu. A dua sara na dauvunau gugumatua qai yalodina voli ni qaravi Jiova me yacova na nona mate ena 1998. Ni kaburaki oti na ivunau “The Kingdom, the Hope of the World” ena tokalau kei Nova Scotia, a tukuna o Kanala J.  A. MacDonald vua e dua na tacida: “Era rogoca mai Cape Breton Island e dua na itukutuku rogo vinaka duadua me bau rogoci ena yasa ni vuravura qo.”

Ia dua na ka na nodra cudru na iliuliu ni lotu. Era kaya eso na lotu Katolika mai Halifax nira na vakacabotetaka na siteseni ni retio e dau kaburaki kina na nodra itukutuku na Gonevuli ni iVolatabu. Ena nodra veivakabukani na iliuliu ni lotu e kacivaka kina vakasauri na matanitu ena 1928 ni na sega ni vakavoutaka na laiseni ni nodra siteseni ni kakaburaki na Gonevuli ni iVolatabu. Ra mani veisoliyaka sara na Gonevuli ni iVolatabu na tikidua Who Owns the Air? mera kudruvaka kina na ka e caka vei ira. Ia era sega ni vakavoutaka na ivakalesilesi ni matanitu na nodra laiseni ni kakaburaki na Gonevuli ni iVolatabu.

E vakayalolailaitaki ira beka na ilawalawa lailai ni dauveiqaravi i Jiova mai Kenada na ka e yaco qori? “Ni se qai tekivu, e vaka ga era sa qaqa na meca,” a tukuna o Isabel Wainwright. “Au vakabauta ni rawa ni tarova ya o Jiova ke salavata kei na nona inaki. Kena irairai ni sa kena gauna me muri e dua na iwalewale e vinaka cake me vunautaki kina na itukutuku vinaka ni Matanitu.” Sa ra sega ni vakararavi na Gonevuli ni iVolatabu ena retio mera vunau kina, sa ra lai veisiko sara ga ena nodra vale na tamata. Ena gauna ya sa bau yaga dina na retio ena kena kaburaki na ‘itukutuku vinaka duadua me bau rogoci.’​—Vanua e maroroi kina na keda itukutuku makawa mai Kenada.

[iVakamacala e ra]

[iYaloyalo ena tabana e 31]

[iYaloyalo ena tabana e 32]

(1) Siteseni mai Edmonton, Alberta (2) Dua na tacida tagane e qarava tiko e dua na misini ni kakaburaki mai Toronto, Ontario (3) Loma ni siteseni na CHUC mai Saskatoon, Saskatchewan

[Tikina bibi ena tabana e 32]

“Voleka tale ni vakaleqa na siteseni na levu ni qiri”