Vei Kemuni na Dauwiliwili

Na mekesini oni wilika tiko qo a tekivu tabaki ena Julai 1879. Me tekivu mai na gauna ya sa levu dina na veiveisau​—wili tale ga kina na mekesini qo. (Raica na itaba e cake.) Me tekivu ena itabataba qo o na raica e levu tale na veisau ena Vale ni Vakatawa. Na veisau cava o na raica?

Ena levu na vanua, e dau rawarawa vei ira e levu mera kauta ga mai na internet na itukutuku era vinakata. E rawa nira gole ena vanua e tu kina na itukutuku era vaqara nira tabaka ga na idusidusi ena nodra kompiuta. E levu na ivola, mekesini, kei na niusiveva sa rawa ni wiliki ena internet.

Ni levu era taleitaka mera wilika ga na itukutuku ena internet, sa vakavoutaki gona na neimami Web site na www.pr2711.com me taleitaki vakalevu qai rawarawa na kena vakayagataki. O ira na rai ena site qo era rawa ni wilika na ivola sa vakarautaki ena sivia na 430 na vosa. Me tekivu ena vula qo, o ira na rai ena Web site qori era na rawa ni wilika tale ga eso na ulutaga a dau tabaki tu ena mekesini, ia sa na laurai ga ena Web site.a

Ni sa biu ena internet e levu na ulutaga, sa vakalailaitaki kina na iwiliwili ni drauniveva ni Vale ni Vakatawa mai na 32 na tabana ina 16, me tekivu ena itabataba qo. Ena gauna qo sa tabaki Na Vale ni Vakatawa ena 204 na vosa. Ni sa vakalailaitaki na iwiliwili ni drauniveva ni mekesini qo, sa na rawa ni vakadewataki ena levu tale na vosa.

E nuitaki ni ituvatuva vou qo sa rawa ni vukei ira e levu tale mera kila na itukutuku ni bula e volai tu ena iVolatabu. Tekivu qo lako yani sa na vakarautaki tiko ga e levu na itukutuku e veivakararamataki vakayalo qai veivakauqeti​—na kena e tabaki kei na kena e rawa ni wiliki ena internet. Qori ena yaga vei ira e levu na dauwiliwili era doka na iVolatabu, era via kila sara ga na ka e vakatavulica.

Ira na Vakarautaka na Mekesini Qo