“Cava na iVunau Levu Duadua?”

Na cava meda cakava meda vakamarautaki koya kina na Kalou? Meda muria beka e levu na lawa? E sega ni gadrevi qori. Na ka meda cakava e rawa ni umani ga ena dua na vosa, me vaka a tukuna o Jisu Karisito, na Luvena duabau na Kalou.—Wilika Marika 12:28-31.

A cavuta na vosa qori o Jisu ena gauna a veivakavulici tiko kina ena valenisoro ena ika11 ni Naisani, ni vo e vica na siga ni bera ni mate. Era tarogi Jisu na kena meca ena so na taro dredre mera vakacalai koya kina. A vagalui ira o Jisu ni sauma na nodra taro. Oti sa qai tarogi vei Jisu: “Cava na ivunau levu duadua?”—Tikina e 28.

Dua dina na taro dredre qori. Era veibataka eso na Jiu se ivunau cava mai na sivia na 600 na lawa a soli vei Mosese e levu duadua se bibi duadua. Eso era nanuma ni bibi kece na lawa, era nanuma tale ga ni cala ke vakabibitaki ga eso na lawa. Ena sauma vakacava o Jisu na taro qori?

A sauma o Jisu ena nona tukuna e rua na ivunau. Kena imatai, e tukuna: “Mo lomani Jiova na nomu Kalou ena lomamu taucoko, ena nomu bula taucoko, ena nomu vakasama taucoko, kei na nomu kaukaua taucoko.” (Tikina e 30; Vakarua 6:5) Na vosa “lomamu,” “vakasama,” “bula,” kei na “kaukaua” e rawa ni vakaibalebaletaka ga e dua na ka.a Kena ibalebale: Na noda lomani Jiova e okati kina na noda bula taucoko, na ka kece eda rawa ni cakava kei na noda iyau. E tukuna e dua na ivoladusidusi ni iVolatabu: “Me lomani na Kalou ena ivakarau ni bula taucoko.” Koya gona, ke o lomana na Kalou, o na saga ena nomu vinaka taucoko mo muria e veisiga na ivakarau ni bula ena vakadonui iko kina.—1 Joni 5:3.

Kena ikarua, e tukuna o Jisu: “Mo lomana na kainomu me vaka nomu lomani iko.” (Tikina e 31; Vunau ni Soro 19:18) Erau salavata na noda lomana na Kalou kei na noda lomani ira na kainoda. Eda lomani ira na kainoda baleta nida lomana na Kalou. (1 Joni 4:20, 21) Ke da lomani ira na kainoda me vaka na noda lomani keda, eda na vakayacora vei ira na tamata na ka eda vinakata mera cakava vei keda. (Maciu 7:12) Qori e vakaraitaka nida lomana na Kalou, o koya a buli keda kece meda ucui koya.—Vakatekivu 1:26.

E vakacava sara mada na bibi ni ivunau ni noda lomana na Kalou kei ira na kainoda? E tukuna o Jisu: “E sega tale ni dua na ivunau e uasivi rau na ivunau qo.” (Tikina e 31) Ena dua tale na gauna, a tukuna o Jisu nira yavutaki mai na rua na ivunau qo na vo kece ni lawa.—Maciu 22:40.

E sega ni dredre meda vakamarautaka na Kalou. Na ka meda cakava e rawa ni umani ga ena dua na vosa: loloma. Qori na ka a kerea na Kalou vei ira na nona dauveiqaravi mera dau cakava, e se kerea tiko ga. Ia ena sega ni laurai na loloma ena ka eda tukuna; e laurai ga ena ka eda cakava. (1 Joni 3:18) Vakacava mo vulica na sala o rawa ni bucina kina qai vakaraitaka ni o lomani Jiova, na Kalou e “dauloloma”?—1 Joni 4:8.