Au Vakalougatataki Vakalevu Niu Talairawarawa Vei Jiova

QORI e dua na ka au kila duadua e liu me baleti tamaqu, e dua na turaga yalomalumalumu qai daucakacaka. Ni dau kauaitaka vakalevu na veika dodonu, a uqeti koya sara ga na itukutuku vakaivolatabu a rogoca ena 1953. Me tekivu mai na gauna oya, a saga ena nona vinaka kece me tuberi keitou na gone ena veika e vulica. A dredre me biuta o tinaqu na nona vakabauta vakatolika, ia ni toso na gauna a vakadeitaka tale ga ni dina na veika e vulica ena iVolatabu.

A dredre me rau vuli iVolatabu kei keitou na noqu itubutubu​—a sega ni vuli vinaka o Nana qai levu ga na gauna e tu ena iteitei o Tata. Eso na gauna e dau sosovu ena gauna ni vuli ena levu ni nona wawale. Ia a vakalougatataki na nona sasaga. Niu ulumatua, au veivuke kina ena nodratou vakavulici na taciqu, dua na yalewa rua na tagane. E okati ena veivakavulici qori e dua na ka e dau wewenigusu i Tata, oya na nona lomani ratou na nona vuvale o Noa qai laurai qori ena nona talairawarawa vua na Kalou. Dua na ka noqu dau taleitaka na ivakaraitaki vakaivolatabu qori! Ena loma ni dua ga na gauna lekaleka, keitou sa gole vakavuvale ena soqoni e dau caka ena Vale ni Soqoni e Roseto degli Abruzzi, e dua na siti ena baravi na Adriatic e Itali.

Au se qai yabaki 11 ga ena 1955 ena gauna keirau gole kina vakaveitinani ena neirau imatai ni soqo ni tikina e caka mai Roma. Me tekivu mai na yabaki oya, au sa okata voli mai na soqo lelevu va qori me dua na ka talei ena noda bula na lotu vaKarisito.

Niu papitaiso oti ena yabaki tarava, au veiqaravi sara vakatabakidua. Au painia lavotaki niu yabaki 17, au qai lesi e Latina ena ceva kei Roma rauta na 300 na kilomita na kena yawa mai vale. Ni se qai dua toka ga na siti o Latina, e sega ni leqataki kina vakalevu na nodra rai na lewenivanua ke ciqoma e dua na itukutuku vinaka. Keirau marautaka kei na noqu itokani painia na neirau veisoliyaka e levu na ivola vakaivolatabu, ia me vaka niu se gone ga au vakanananu vakalevu i vale! Qori e sega ni tarova na noqu vinakata meu muria na veika au dusimaki kina.

Au lesi e Milan ena dua na gauna e muri meu lai veivuke ena vakavakarau ni soqo cokovata ni veimatanitu ena 1963 e kena usutu na “Everlasting Good News.” Au bolecakacaka ena soqo qori kei na levu tale na mataveitacini, dua vei ira na cauravou o Paolo Piccioli e cavutu mai Florence. A veiuqeti dina na nona ivunau ena ikarua ni siga me baleta na bula vakadawai. Au vakasamataka sara, ‘Ena sega ni vakawati na tacida qo.’ Ia keirau mani veivolavolai, keirau qai raica ni levu na ka keirau tautauvata kina​—neirau isausau, neirau lomani Jiova, kei na neirau vinakata dina me keirau talairawarawa vua. Keirau vakamau ena 1965.

VEITALANOA KEI IRA NA ILIULIU NI LOTU

Au painia tudei e Florence me tini na yabaki. E marautaki dina na tubu e laurai ena ivavakoso, vakabibi nodra toso vakayalo na itabagone. Keirau marautaka tale ga vakaveiwatini na veitalanoa kei ira ena veika vakayalo kei na so tale na ka ni veivakalasai, qai dau vinakata o Paolo me caka ena gauna va qori na soka. Au dau marautaka na neirau gauna vakaveiwatini, ia au raica nira gadreva qai yaga vei ira na itabagone kei na vuvale ena ivavakoso na nona veikauaitaki o Paolo kei na gauna e vakayagataka vei ira.

E se vakamarautaki au tu ga na noqu dau vakasamataka lesu na levu ni neirau vuli iVolatabu. Dua neirau gonevuli o Adriana, a tukuna na veika e vulica ena rua tale na vuvale. Eratou tuvanaka sara na lewenivuvale qori me ratou veivosakitaka kei na dua na bete na ivakavuvuli ni lotu me vaka na Letoluvakalou kei na tawamate ni yalo. Eratou tiko ena veivosaki qori e tolu na bisovi. E vereverea nodratou ivakamacala qai sega ni sema, e rawarawa sara na nodratou kidava qori na neirau vuli iVolatabu ni ratou veidutaitaka kei na ivakavuvuli matata ena iVolatabu. Io, na veivosaki qori e veisautaka sara ga na nodratou rai. Ni toso na gauna, e rauta na le 15 na lewe ni vuvale qori era mai qaravi Jiova.

Sa duidui sara ena gauna qo na noda iwalewale ni vunau. A “kenadau” ena gauna oya o Paolo ena veivosaki kei ira na bete​—qai yaco qori ena levu na gauna. Au se nanuma tiko e dua na veivosaki era vakarorogo tu kina o ira era sega ni iVakadinadina. Sa qai kilai e muri nira sa tuvanaka oti tu na dauveitusaqati mera taroga na vakarorogo eso na taro dredre. Ia a vuki na uto. E qai taroga e dua ke dodonu me siova o lotu na veika vakapolitiki, me vaka sa cakava voli mai me vica vata na senitiuri. Eratou kila ena gauna qori na bete ni sa na sega ni yaco na lomadratou. Sega ni dede sa boko na cina, sa tini tale ga e keri na veivosaki. A qai kilai ena vica na yabaki e muri ni sa navuci tiko ga me na boko na cina ke sega ni toso vinaka na veivosaki me vaka eratou nanuma na bete.

ESO TALE NA TABA NI VEIQARAVI

Ni oti e tini na yabaki na neirau vakawati, keirau sureti ena veiqaravi vakaivakatawa ni tabacakacaka. A cakacaka vinaka tu o Paolo, sega kina ni rawarawa na neirau vakatulewa. Ia ni keirau vakasamataka oti qai masulaka, keirau ciqoma na veisureti ya. Keirau dau marautaka na veimaliwai kei ira na vuvale era dau vakaicilitaki keirau. Keimami dau vuli iVolatabu kece ena yakavi, oti sa qai dau vukei ira na gone o Paolo ena nodra ka ni vuli, vakabibi ke baleta na fika. E dau gumatua ena wilivola o Paolo, e marautaka tale ga na nona dau vakamacalataka na veika totoka kei na itukutuku veiuqeti e wilika. Keimami dau lai vunau ena Moniti ena taoni e sega kina na iVakadinadina ra qai sureti na lewenivanua mera lai rogoca na ivunau ena yakavi oya.

Se qai rua ga na yabaki neirau veiqaravi vakaivakatawa ni tabacakacaka, keirau sa sureti ena Peceli e Roma. O Paolo me lai veiqaravi ena tabana vakalawa, o yau ena Tabana ni Mekesini. E sega ni rawarawa na neirau veisau, ia keirau vakadeitaka ga me keirau talairawarawa. E vakavumarau ni laurai na kena vakalevutaki na valenivolavola ni tabana kei na tubu vakasakiti ni kedra iwiliwili na mataveitacini e Itali. A vakalawataki ena gauna qori eso na veika bibi me baleti keda na iVakadinadina i Jiova. Keirau marautaka dina na taba ni veiqaravi qo.

Ni keirau veiqaravi voli e Peceli, a basika e Itali e dua na ituvaki e vauca na noda vakabauta vakaivolatabu me baleta na dra. A caka e dua na kena veilewai ena veiyabaki ni 1980 qai vakavu veileti sara ga. Erau beitaki vakailasu e dua na veiwatini iVakadinadina ni rau vakavuna na nona mate na luvedrau yalewa, dina ga ni vakaleqai koya na mate bibi e laurai ena nona dra, e dau tauvi ira e levu ena yasayasa na Mediterranean ena gauna era sucu kina. Era veivuke na lewenivuvale e Peceli vei ira na loya era valataka na nodrau kisi na itubutubu lotu vaKarisito. A vakarautaki e dua na tikidua kei na itabataba lavotaki ni Yadra! me vukei ira na lewenivanua mera kila na ka dina e yaco kei na ivakamacala dodonu ni iVolatabu me baleta na dra. Ena gauna qori, levu na gauna e cakacaka tu vakadua o Paolo me 16 na aua ena dua na siga qai sega ni bau cegu. Au saga ena noqu vinaka kece meu tokoni koya ena itavi bibi e dau qarava.

DUA TALE NA VEISAU ENA NEIRAU BULA

E tawanamaki na veika e yaco ni oti e 20 na yabaki na neirau vakawati. Niu yabaki 41 qai yabaki 49 o Paolo, au tukuna vua niu sa rairai bukete. Au raica ni vola toka o Paolo ena nona dairi me baleta na siga oya: “Masu: Ke dina, vukei keirau me keirau veiqaravi tiko ga vakatabakidua, me keirau kua ni wele vakayalo, me keirau itubutubu ivakaraitaki vinaka tale ga. E bibi sara na noqu vukei meu bau bulataka mada ga e 1 na pasede na veika au vakavulica mai na buturara ena loma ni 30 na yabaki sa oti.” E vakadinadinataki ena veika keirau sotava ni rogoca o Jiova na neirau masu.

E levu sara na veisau e yaco ena neirau bula ena gauna e sucu kina na luvei keirau yalewa o Ilaria. Eso na gauna keirau dau yalolailai, me vaka ga e tukuni ena Vosa Vakaibalebale 24:10: “Kevaka ko sa gu ca e na siga ni rarawa, sa lailai na nomu kaukauwa.” Ia keirau dau veitokonitaka na veika keirau sotava, ni keirau kila ni bibi na veivakayaloqaqataki.

E tukuna o Ilaria ni marautaka dina na nodrau gugumatua ena veiqaravi vakatabakidua na nona itubutubu. E sega ni bau nanuma ni lekata e dua na ka; na nona isususu e vakataki ira ga na vuvale tale eso. Au tiko kei koya ena siga. Ni lesu mai vale ena yakavi o Paolo, e dau tu na cakacaka me vakaotia; ia e tiko na gauna me vakayagataka vei Ilaria, erau dau qito qai vukei koya ena nona ka ni vuli. E dau cakava qori ke mani gadrevi mada ga me yadra tiko me yacova na rua se tolu ena mataka me vakaotia kina na nona cakacaka. E dau tukuna o Ilaria: “Noqu itokani vinaka duadua o Tata.”

A bibi me kua ni veiveisau na neirau veivakavulici​—eso na gauna me keirau vosa vakadodonu​—me rawa ni dei tiko ga o Ilaria ena ivakavuvuli vaKarisito. Au se nanuma tiko e dua na gauna a sega kina ni vinaka na nona ivakarau vua e dua na nona itokani erau qito vata tiko. Keirau vakamacalataka vua ena iVolatabu na vuna e sega ni vinaka kina na ka e cakava. Keirau tukuna tale ga vua me kere veivosoti vua na nona itokani ni keitou tiko kece.

E kaya o Ilaria ni vakavinavinakataka na nodrau dau gugumatua ena cakacaka vakaitalatala na nona itubutubu. Qo ni sa vakawati, sa qai matata sara vua na bibi ni noda talairawarawa vei Jiova kei na noda muria na nona veidusimaki.

TALAIRAWARAWA NI SOTAVI MADA GA NA RARAWA

A qai kila o Paolo ena 2008 ni tauvi kenisa. A nanumi ni na sega ni vakaleqai koya na mate qori, qai dau vakayaloqaqataki au vakalevu. Keirau vaqara na ivakasala vakavuniwai vinaka duadua, keitou masuta tale ga vakaveitamani na veivuke i Jiova ena veika ena yaco ena veigauna se bera mai. Ia ni toso na gauna, sa malumu tiko ga mai na turaga a kaukaua tu ena dua na gauna qai daucakacaka. A mosimosi dina na nona takali ena 2010. Au lomavakacegu ga niu vakasamataka na veika e rawati ena 45 na yabaki ni neirau vakawati. Keirau a solia vei Jiova na neirau vinaka kece. Au kila ni na yaga tu ga na neirau cakacaka. Dua na ka na noqu vakanamata tu ena nona vakaturi o Paolo, me salavata kei na ka e tukuna o Jisu ena Joni 5:​28, 29.

Me tekivu mai niu se gone me yacova mai qo, au se taleitaka tiko ga na italanoa kei Noa. E sega tale ga ni veisau na noqu inaki. Au vinakata meu talairawarawa vei Jiova se mani cava e kerea vei au. Au nuidei ni sega sara ga ni dua na ka na veika dredre au sotava, na veika au vakuai au kina kei na leqa cava tale ni vakatauvatani kei na veika totoka e dau veivakalougatataki kina na noda Kalou dauloloma. Au vakadinadinataka qori​—au rawa sara ga ni tukuna ni o na sega vakadua ni veivutunitaka.