TARO NA DAUWILIWILI

O cei o ira “na luve ni Kalou [“dina,” NW]” era cavuti ena Vakatekivu 6:​2, 4 era bula ni bera na Waluvu?

E tiko na vuna vinaka e rawa ni vakaibalebaletaki kina na matavosa oya vei ira na luve vakayalo ni Kalou. Eda kila vakacava qori?

E volai ena itekitekivu ni tikinivolatabu ya: “Sa qai raici ira na nodra goneyalewa na tamata ko ira na luve ni Kalou ni ra sa matavinaka; a ra sa la’ki vakawati kei ira kecega oqo era sa vinakata.”​—Vkte. 6:2.

Ena iVolatabu vakaIperiu, na matavosa “luve ni Kalou” kei na “luve ni qaqa” e volai ena Vakatekivu 6:​2, 4; Jope 1:6; 2:1; 38:7; kei na Same 89:6. Na cava eda raica ena tikinivolatabu qori me baleti ira na “luve ni Kalou”?

Na “luve ni Kalou” e cavuti ena Jope 1:6 e dusi ira na kabula vakayalo era soqoni tu ena mata ni Kalou. Dua vei ira o Setani, a ‘veilakoyaki tiko e vuravura.’ (Jope 1:7; 2:​1, 2) Eda raica tale ga ena Jope 38:​4-7 nira “kaila e na reki” na “luve ni Kalou” ena gauna a ‘biuta kina na Kalou na vatu me ivakadei’ kei vuravura. Kena irairai nira agilosi baleta eda se bera ni buli na tamata ena gauna ya. O ira na “luve ni qaqa” era cavuti ena Same 89:6 era sega ni tamata, ia era kabula dina vakayalo era bula tiko kei na Kalou mai lomalagi.

O cei gona o ira na “luve ni Kalou” era cavuti tiko ena Vakatekivu 6:​2, 4? Me salavata kei na ivakadinadina vakaivolatabu sa dikevi mai, e veiganiti kina me tukuni ni dusi ira tiko na luve ni Kalou era lako sobu mai vuravura.

E dredre na nodra vakabauta eso nira na vinakata na agilosi mera veiyacovi. E tukuna o Jisu ena Maciu 22:30 ni sega na vakawati kei na veiyacovi mai lomalagi. Ia eso na gauna era vukici ira na agilosi mera tamata, era kana ra qai gunu mada ga kei ira na tamata. (Vkte. 18:​1-8; 19:​1-3) Nira sa vukici ira rawa mera tamata na agilosi, sa rawa sara ga nira veiyacovi kei ira na yalewa.

E tiko na yavu vakaivolatabu meda vakabauta kina nira cakava sara ga qori eso na agilosi. Ena Juta 6, 7 na nodra valavala ca na tagane ni Sotoma era dau vakaceguya ga na nodra gagadre ca, e vakatauvatani kei na nodra “sega ni tudei  . . na agilosi ena nodra vanua nira biuta na nodra itikotiko dodonu.” Dua na ka era tautauvata kina na agilosi kei ira na tagane ni Sotoma oya nodra “veidauci vakalialia kei na nodra vakaceguya ga na nodra gagadre ca.” E laurai ena 1 Pita 3:​19, 20 nira tiko na agilosi talaidredre ena “siga i Noa.” (2 Pita 2:​4, 5) Koya gona, na ka era cakava na agilosi talaidredre ena siga i Noa e tautauvata kei na nodra valavala ca na kai Sotoma kei Komora.

E vakaibalebale na ivakamacala qori nida vakasamataka ni “luve ni Kalou” e cavuti ena Vakatekivu 6:​2, 4 e dusi ira na agilosi era vukici ira mera tamata ra qai veiyacovi tawakilikili kei ira na yalewa.

E tukuni ena iVolatabu ni o Jisu a “vunau vei ira na kabula vakayalo era vesu tu.” (1 Pita 3:19) Na cava e kena ibalebale qori?

E vakamacalataka na yapositolo o Pita ni o ira na kabula vakayalo qori era “talaidredre ena gauna a wawa voli kina ena vosota na Kalou ena siga i Noa.” (1 Pita 3:20) Io, o Pita a vakaibalebaletaki ira tiko na kabula vakayalo era vakatulewataka mera tokoni Setani ena talaidredre. O Juta a cavuti ira na agilosi era “sega ni tudei . . . ena nodra vanua nira biuta na nodra itikotiko dodonu,” qai tukuna ni “sa vakarautaka” na Kalou “na kedra ivesu tawamudu ena butobuto loaloa me yacova na siga ni veilewai levu.”​—Juta 6.

Na sala cava era talaidredre kina na kabula vakayalo ena siga i Noa? Ni bera na Waluvu, a sega ni vakadonuya na Kalou nodra vukici ira mera tamata na kabula ca vakayalo qori. (Vkte. 6:​2, 4) E sega tale ga ni dodonu nodra veiyacovi kei ira na yalewa na agilosi era vukici ira mera tamata, ni a sega ni buli ira na Kalou mera cakava qori. (Vkte. 5:2) O ira na agilosi ca qai talaidredre qori era na vakarusai ena nona gauna lokuci na Kalou. Me vaka ga e vakaraitaka o Juta, era se tu ena gauna qo ena dua na ituvaki “butobuto loaloa”​—e vaka ga era tu ena dua na valeniveivesu vakayalo.

Na gauna kei na sala cava a vunau kina o Jisu vei ira na “kabula vakayalo era vesu tu” qori? E vola o Pita ni yaco qori ni sa “vakabulai ena yago vakayalo” o Jisu. (1 Pita 3:​18, 19) Me nanumi tale tiko ga ni tukuna o Pita ni a “vunau” o Jisu. E laurai mai na veitikina e yavolita na tikinivolatabu qori ni a vunau o Jisu ni bera ni vola o Pita na imatai ni nona ivola. Kena irairai gona ni sa vakaturi oti o Jisu, sa qai vunautaka vei ira na kabula vakayalo ca na itotogi e veiganiti me tau vei ira. E sega sara ga ni dua na nodra inuinui ena ka e vunautaka vei ira o Jisu. A vunautaki ga vei ira na itukutuku ni veilewai. (Jona 1:​1, 2) Na nona vakaraitaka o Jisu na vakabauta kei na yalodina me yacova na nona mate, kei na nona vakaturi, e vakadinadinataka ni sega ni kaukaua vua na Tevoro. A rawa tale ga kina me vunautaka na itukutuku ni veilewai vei ira na kabula ca vakayalo.​—Joni 14:30; 16:​8-11.

Ena gauna se bera mai, ena vesuki Setani kei ira na agilosi ca o Jisu qai kolotaki ira ina qara e sega ni vakabotona. (Luke 8:​30, 31; Vkta. 20:​1-3) Me yacova na gauna qori, era se tu na kabula ca vakayalo ena dua na ituvaki vakayalo e butobuto loaloa, ena sega tale ga ni daro na nodra vakarusai.​—Vkta. 20:​7-10.