‘Dou Cakava Qo Mo Dou Vakananumi Au Kina’

1, 2. Na cava era na rairai vakasamataka na yapositolo ni bera ni gole o Jisu ena iotioti ni nona ilakolako e Jerusalemi?

ERA raica na yadra e Jerusalemi na vula vou. A tukuni qori vei ira na lewe ni Sanadrini, ra mani vakarota kina ni sa tekivu na vula vou, na Naisani. E veitukuniyaki na itukutuku qori ena kena waqa na buka me ivakatakilakila, ra talai tale ga eso. Era kila gona na yapositolo ni sa voleka na solevu ni Lakosivia. Era na rairai vakasamataka tale ga ni na vinakata o Jisu me gole i Jerusalemi ni bera na solevu qori.

² Ena gauna qori, a tiko o Jisu kei na nona yapositolo e Peria (tai ni Joritani), ni bera ni gole ena iotioti ni nona ilakolako e Jerusalemi. (Maciu 19:1; 20:​17, 29; Mari. 10:​1, 32, 46) Ni sa kilai ga na imatai ni siga ni vula vakaJiu na Naisani, ena qai vakayacori na Lakosivia ni oti e 13 na siga, qori ni sa dromu na siga ena ika14 ni Naisani.

3. Na cava mera kauaitaka kina na lotu vaKarisito na tikinisiga ni Lakosivia?

³ Ena vakayacori na iVakayakavi ni Turaga ni sa dromu na siga ena ika14 ni Epereli, 2014, e veidonui qo kei na tikinisiga ni Lakosivia. Oya e siga lavotaki vei ira na lotu vaKarisito dina kei ira na tataleitaki. Na vuna? E tukuni ena 1 Korinica 11:​23-25: “[Ena] bogi me soli yani kina . . . o Jisu, a taura mada e dua na madrai, e vakavinavinakataka, e tikica, qai kaya: ‘Qo e vakaibalebaletaka na yagoqu e soli ena vukumudou. Dou dau cakava qo mo dou vakananumi au kina.’ E cakava tale ga qo ena bilo.”

4. (a) Na cava eda na rairai taroga me baleta na iVakananumi? (b) E cakacakataki vakacava na tikinisiga ni iVakananumi e veiyabaki? (Raica na kato “iVakananumi ena 2014.”)

⁴ E macala ga ni o na tiko ena soqo a tukuna o Jisu mera vakananuma e veiyabaki na nona imuri. E vinaka mo taroga ni bera na soqo qori: ‘Meu vakavakarau vakacava ina yakavi oya? Na cava ena vakayagataki kina? Na ituvatuva cava ena muri ena soqo qo? Na cava me bibi kina vei au na soqo qo kei na ka e vakayagataki kina?’

NA MADRAI KEI NA WAINI

5. Na cava a tukuna o Jisu me vakarautaki me baleta na iotioti ni Lakosivia kei ratou na yapositolo?

⁵ Ni tukuna o Jisu vei ratou na yapositolo me ratou vakarautaka e dua na rumu me caka kina na kanavata ni Lakosivia, a sega ni tukuna me ukutaki vakasivia; de dua a vinakata me dua ga na rumu veiganiti, e savasava qai rauti ratou na sureti kina. (Wilika Marika 14:​12-16.) Eratou na vakarautaka eso na iyaya me vakayagataki ena kana, wili kina na madrai sega ni vakaleveni kei na waini damudamu. Ni oti na kanavata ni Lakosivia, sa qai vakamacalataka o Jisu na madrai kei na waini.

6. (a) Ni oti na kanavata ni Lakosivia, cava e tukuna o Jisu me baleta na madrai? (b) Na madrai vakacava e vakayagataki ena iVakananumi?

⁶ A qai vola e muri na yapositolo o Maciu a tiko tale ga ena yakavi oya: “E taura e dua na madrai o Jisu, ni masulaka oti, e tikica, solia vei iratou na tisaipeli qai kaya: ‘Dou taura, dou kania.’” (Maciu 26:26) A sega ni vakaleveni na “madrai,” me vaka ga a vakayagataki ena Lakosivia. (Lako 12:8; Vkru. 16:3) A buli na madrai mai na falawa e caka mai na witi kei na wai, a sega ni vakaleveni se vakaisaluaki ena so na ka me vaka na masima. Ena sega ni tubu na madrai ni sega ni vakaleveni. E sega ni dua tale na ka e waki vata, e mamaca, e vaka na bisikete, qai tikici rawarawa. Ena gauna qo, ni bera na iVakananumi era na rairai kerea na qase ni ivavakoso e dua me bulia na madrai mai na falawa e caka mai na witi kei na wai, qai tavu ena itavuteke e vakawaiwai vakalailai. (Ke sega na falawa e caka mai na witi, e rawa ni vakayagataki na falawa e caka mai na raisi, varile, sila, se dua na covuata va qori.) Se rawa ni vakayagataki na kedra madrai na Jiu e sega ni vakaleveni e vakatokai na matzoth, e sega ni biu kina na covuata a toni tu ena wai qai sigani, na yaloka, se varasa.

7. Na cava a taura tu o Jisu ena iVakayakavi ni Turaga, na waini vakacava e rawa ni vakayagataki nikua ena iVakananumi?

⁷ E tomana o Maciu: “E taura . . .na bilo [o Jisu], ni masulaka oti, e solia vei iratou qai kaya: ‘Dou gunu kece kina.’ ” (Maciu 26:​27, 28) E taura tiko qori o Jisu na bilo waini damudamu. (Qori e sega ni wai ni vuanivaini e se qai beti ga, ni se oti makawa sara na tamusuki ni vuanivaini.) A sega ni vakayagataki na waini ena imatai ni kanavata ni Lakosivia e Ijipita, ia a sega ni vakatabuya o Jisu me vakayagataki ena Lakosivia. A vakayagataka mada ga eso na waini ena iVakayakavi ni Turaga. Oya na vuna e vakayagataki tale ga kina na waini ena nodra iVakananumi na lotu vaKarisito. Me vaka ga na kena sega ni vinakati me waki vata kei na dra i Jisu e dua tale na ka me nanumi ni na yaga kina vakalevu, na waini tale ga e vakayagataki e sega ni waki kei na alakaolo se vakaisaluaki. Me vakayagataki ga na waini damudamu e sega ni waki kei na dua tale na ka, na waini e caka ga e vale se na kena e voli me vaka na Beaujolais, Burgundy, se Chianti.

IBALEBALE NI MADRAI KEI NA WAINI

8. Na cava era raica kina vakabibi na lotu vaKarisito na ibalebale ni madrai kei na waini?

⁸ E vakamatatataka na yapositolo o Paula ni o ira tale ga na lotu vaKarisito mera vakananuma na iVakayakavi ni Turaga, sega ni o iratou ga na yapositolo. E vola vei ira na tacina vakayalo e Korinica: “Ni vakadewataka vei au na Turaga, au vakaraitaka tale ga vei kemuni,  . . na Turaga o Jisu, a taura mada e dua na madrai, e vakavinavinakataka, e tikica, qai kaya: ‘Qo e vakaibalebaletaka na yagoqu e soli ena vukumudou. Dou dau cakava qo mo dou vakananumi au kina.’ ” (1 Kor. 11:​23, 24) Sa rauta mera vakayacora tiko ga nikua na lotu vaKarisito na soqo lavotaki qo e veiyabaki ra qai raica vakabibi na ibalebale ni madrai kei na waini.

9. Na rai cala cava a tiko vei ira eso me baleta na madrai a vakayagataka o Jisu?

⁹ Era tukuna eso na daulotu ni a tukuna sara ga o Jisu: ‘Qo na yagoqu,’ era vakabauta gona ni a vuki vakacakamana na madrai me yagona. Ia qori a sega ni yaco dina.a O Jisu a tu sara tu ga ena matadratou na yapositolo yalodina, a tu tale ga ekea na madrai sega ni vakaleveni me ratou na kania. A vosa tiko gona vakaibalebale o koya, me vaka ga a cakava ena levu na gauna.​—Joni 2:​19-21; 4:​13, 14; 10:7; 15:1.

10. Na cava e vakaibalebaletaka na madrai e vakayagataki ena iVakayakavi ni Turaga?

¹⁰ Na madrai eratou raica, ratou qai vakarau vakayagataka na yapositolo e vakaibalebaletaka na yagoi Jisu. Na yago cava? Ni a tikica na madrai o Jisu qai sega ni ramusu e dua na nona sui, era nanuma kina ena dua na gauna na dauveiqaravi ni Kalou ni madrai e vakaibalebaletaka “na yagoi Karisito,” na ivavakoso vaKarisito lumuti. (Efeso 4:12; Roma 12:​4, 5; 1 Kor. 10:​16, 17; 12:27) Ia ni toso na gauna, e vakadeitaki ena vakekeli kei na iVolatabu ni madrai e vakaibalebaletaka na yagona vakatamata o Jisu. A “vakararawataki na yagoi” Jisu, a vakoti mada ga. Ena iVakayakavi gona ni Turaga, na madrai e vakatakarakarataka na yagona vakatamata o Jisu, a ‘colata kina na noda ivalavala ca.’​—1 Pita 2:​21-24; 4:1; Joni 19:​33-36; Iper. 10:​5-7.

11, 12. (a) Na cava a tukuna o Jisu me baleta na waini? (b) Na cava e vakatakarakarataka na waini e vakayagataki ena iVakayakavi ni Turaga?

¹¹ Qori e vukei keda meda kila na ka a tukuna o Jisu me baleta na waini. E tukuni ena iVolatabu: “E cakava tale ga qo ena bilo, ni sa vakayagataka oti na ivakayakavi, e qai kaya: ‘Na bilo qo e vakaibalebaletaka na veiyalayalati vou e vakadeitaki ena noqu dra.’” (1 Kor. 11:25) E levu na iVolatabu e tautauvata na vosa era vakayagataka kei na ilavelave ni iVolatabu i Robert Young: “Na bilo qo e veiyalayalati vou ni noqu dra.” Vakacava a veiyalayalati vou sara ga na bilo a taura tu o Jisu? Sega. Na vosa “bilo” e vakaibalebaletaka na ka e tiko e loma ni bilo​—na waini. Na cava a tukuna o Jisu ni vakaibalebaletaka se vakatakarakarataka na waini? Nona dra vakadavei.

¹² Eda wilika ena Kosipeli i Marika na ka e tukuna o Jisu: “Qo e vakaibalebaletaka na noqu ‘dra ni veiyalayalati,’ ena vakadavei ena vukudra e lewe levu.” (Mari. 14:24) Io, na dra i Jisu ena “vakadavei me vosoti kina na nodra ivalavala ca e levu.” (Maciu 26:28) E veiganiti kina me vakatakarakarataka sara ga na dra i Jisu na waini damudamu. Na dra oya eda sereki kina ena ivoli, me “vosoti kina na noda cala.”​—Wilika Efeso 1:7.

IVAKANANUMI NI MATE I KARISITO

13. Vakamacalataka na sala e vakananumi kina na mate i Jisu e veiyabaki.

¹³ Na cava mo namaka ena imatai ni gauna o tiko kina ena nodra iVakananumi na iVakadinadina i Jiova? Ena totoka qai savasava na vanua ena caka kina na soqo me rawa nira marautaka kece o ira na tiko kina. Ena rawarawa ga na tuva ni senikau, ena sega ni ukutaki vakasivia, ena sega tale ga ni vaka e dua na pati. Ena vakamacalataka vakamatata ena veidokai e dua na qase ni ivavakoso matua na ka e tukuna na iVolatabu me baleta na soqo qo. Ena vukei keda meda kila na ka e cakava ena vukuda o Karisito. A mate me keda ivoli meda rawata kina na bula.​—Wilika Roma 5:​8-10.

14. Na inuinui cava ena vakamacalataki ena iVakananumi?

¹⁴ Ena vakamacalataka o koya e vunau e rua na nodra inuinui na lotu vaKarisito e tukuni ena iVolatabu. Na imatai ni inuinui oya na veiliutaki kei Karisito e lomalagi, qori era nuitaka ga e dua na iwiliwili lailai era imuri i Karisito, me vakataki ratou na yapositolo yalodina. (Luke 12:32; 22:​19, 20; Vkta. 14:1) Na ikarua ni inuinui e baleti ira na vo ni lotu vaKarisito era qarava tiko na Kalou ena yalodina nikua. Era nuitaka na bula tawamudu ena vuravura parataisi. Sa na qai vakayacori na inaki ni Kalou e vuravura me vaka ga e caka tiko mai lomalagi, era sa masulaka voli mai vakadede na lotu vaKarisito. (Maciu 6:10) E vakamatatataki tale ga ena iVolatabu na ituvaki totoka era na marautaka me tawamudu.​—Aisea 11:​6-9; 35:​5, 6; 65:​21-23.

15, 16. Na cava e dau caka ena madrai ena iVakayakavi ni Turaga?

¹⁵ Ni voleka ni oti na nona ivunau na qase ni ivavakoso, ena qai vakaraitaka mai ni sa gauna me vakayacori kina na ka a tukuna o Jisu vei ratou na nona yapositolo. Me vaka e sa vakamacalataki oti mai, ena vakayagataki na madrai sega ni vakaleveni kei na waini damudamu. Qori ena rairai biu tiko ena dua na teveli e voleka vua e vunau. Ena cavuta e dua na tikinivolatabu me baleta na ka a tukuna o Jisu kei na ka a cakava ena gauna a tauyavutaka kina na soqo qo. Kena ivakaraitaki, eda wilika ena ivolatukutuku i Maciu: “E taura e dua na madrai o Jisu, ni masulaka oti, e tikica, solia vei iratou na tisaipeli qai kaya: ‘Dou taura, dou kania. Qo e vakaibalebaletaka na yagoqu.’” (Maciu 26:26) E tikica na madrai sega ni vakaleveni o Jisu me rawa ni veisoliyaka vei ratou na yapositolo eratou dabe tiko ena yasana ruarua. O na raica ena iVakananumi ena ika14 ni Epereli eso na madrai sega ni vakaleveni sa tikici rawa tu ra qai biu tu ena veleti me veisoliyaki.

¹⁶ Ena veirauti na veleti e vakayagataki me rawa ni veisoliyaki ena dua ga na gauna lekaleka vei ira kece na tiko ena iVakananumi. Ena sega ni vereverea na ka e caka. Ena dua ga na masu lekaleka, oti sa na veisoliyaki sara vakamatau na veleti, me veiganiti qori kei na vanua e caka kina na soqo. E vica ga (se kena irairai e sega sara ga ni dua) ena kania na madrai, me vaka a yaco ena gauna a veisoliyaki kina na madrai ena levu na ivavakoso ena iVakananumi ni 2013.

17. Ena muri vakacava ena iVakananumi na ka e tukuna o Jisu me baleta na waini?

¹⁷ Ena vakamacalataka tarava o koya e vunau na ka e vola o Maciu: “E taura . . . na bilo [o Jisu], ni masulaka oti, e solia vei iratou qai kaya: ‘Dou gunu kece kina; qo e vakaibalebaletaka na noqu “dra ni veiyalayalati,” ena vakadavei me vosoti kina na nodra ivalavala ca e levu.’” (Maciu 26:​27, 28) Ni muri na ivakarau qori, ena dua tale na masu, ra qai veisoliyaki na “bilo” waini damudamu vei ira kece na tiko ena iVakananumi.

18. Na cava e se bibi ga kina meda tiko ena iVakananumi ke mani vica ga se sega sara ga ni dua e vakayagataka na madrai kei na waini?

¹⁸ E levu vei ira na tiko ena iVakananumi era na sega ni vakayagataka na waini kei na madrai, era na veisoliyaka ga baleta e tukuna o Jisu ni o ira ga na veiliutaki kei koya ena Matanitu vakalomalagi era na vakayagataka. (Wilika Luke 22:​28-30; 2 Tim. 4:18) O ira na kena vo era na vakaraitaka nodra doka na soqo ena nodra tiko sara ga kina. E vakaraitaka tale ga qori na levu ni nodra vakamareqeta na bibi ni isoro i Jisu. Era rawa ni vakasamataka ena iVakananumi na veivakalougatataki era na marautaka ena vuku ni isoro ni veivoli i Jisu. Era nuitaka mera maliwai ira na “isoqosoqo levu” era bula sivia na “veivakararawataki levu” sa roro tiko mai. Qori o ira na dausokalou era sa “savata na nodra isulu balavu ra qai vakavulavulataka ena dra ni Lami.”​—Vkta. 7:​9, 14-17.

19. Na cava meda cakava meda vakavakarau kina, me yaga tale ga vei keda na iVakayakavi ni Turaga?

¹⁹ Eda dau vakavakarau na iVakadinadina i Jiova e veiyasa i vuravura ina soqo lavotaki qo. Ni se vo tu e vica na macawa, eda na veisureti ena kena levu e rawa. Ni vo tale ga e vica na siga me caka na iVakananumi, e levu vei keda ena wilika ena iVolatabu na ka a cakava o Jisu kei na ka a yaco ni bera na iVakayakavi ni Turaga ena 33 S.K. Eda na tuvanaka rawa eso na ka me caka meda kua ni calata kina na soqo qo. Ena vinaka meda totolo yani ni bera ni tekivu na sere kei na masu, me rawa nida kidavaki ira na vulagi da qai kua ni calata na porokaramu taucoko. Ena yaga dina vei keda kece na lewe ni ivavakoso kei ira na vulagi na noda raica tiko na noda iVolatabu ni vakamacalataki na veitikina bibi. E bibi sara oya, noda tiko ena iVakananumi e dusia nida vakavinavinakataka mai vu ni lomada na isoro i Jisu da qai talairawarawa ina nona ivakaro: “Dou dau cakava qo mo dou vakananumi au kina.”​—1 Kor. 11:24.