Vakalougatataki Nona Vakabauta na Yada ni Sarifaci

E DUA na yada dravudravua, a mokota na luvena tagane duabauga. E sega ni vakabauta na ka e raica. Ia ena dua na gauna e liu a keveti luvena tagane ni sa mate. Ia qo e sa raici luvena ni sa vakaturi qai vakamarautaki koya na nona matadredredre. “Raica,” e tukuna vua na nodrau vulagi, “sa bula na luvemu.”

Na veivakaturi vakatubuqoroqoro ya a yaco rauta na 3,000 yabaki sa oti. O rawa ni wilika qori ena 1 Tui wase 17. Na vulagi e cavuti mai cake, na parofita ni Kalou o Ilaija. Ia o cei na tinanigone? E dua na yada e sega ni kilai na yacana, e vakaitikotiko ena taoni o Sarifaci. Na vakaturi ni luvena e dua vei ira na ituvaki e sotava ena nona bula e bau vakaukauataki sara ga kina nona vakabauta. Nida dikeva na kena italanoa, eda na vulica kina eso na lesoni bibi.

KUNEA O ILAIJA NA YADA VAKABAUTA

E tukuna o Jiova ni na dua na lauqa balavu ena gauna e veiliutaki kina o Eapi, na tui ca kei Isireli. Ni sa kacivaka oti o Ilaija na lauqa, a qai vunitaki koya na Kalou, a vakani Ilaija tale ga vakacakamana ena madrai kei na lewenimanumanu ena nona vakayagataki ira na reveni. A mani tukuna o Jiova vei Ilaija: “Mo cavu tu, mo lako ki Sarifaci, oqori sa vaka-Saitoni, ka tiko maikea: raica, ka’u sa vakarota vua e dua na yada maikea me vakani iko.”​—1 Tui 17:​1-9.

Ni yaco yani e Sarifaci o Ilaija, e raica sara e dua na yada dravudravua ni cabuka tiko. Qori beka ga na marama ena vakania na parofita? Ena cakava vakacava qori ni dravudravua tu mada ga? Se mani cava a vakasamataka o Ilaija, a vosa ga vua na yada. ‘Yalovinaka,’ e tukuna vua, “kauta mada mai vei au e dua na wai lailai e na bilo, me’u gunu.” Ni gole na yada me lai kauta mai na wai, e tukuna tale vua o Ilaija: ‘Yalovinaka, kauta mai vei au e dua na tiki ni madrai.’ (1 Tui 17:​10, 11) E sega ni lomaleqataka na yada na nona solia e dua na bilo wai vua na vulagi, ia e lomaleqataka ga na soli ni madrai.

E kaya na yada: “Me vaka sa bula ko Jiova na nomu Kalou, sa sega vei au e dua na [madrai], sa dua ga na [iluku falawa] e na saqa sa yakuta rawa na ligaqu, ka dua na waiwai lailai e na tavaya: ka raica, ka’u sa [kumuna e vica] na buka me’u la’ki vakarautaka na keirau kei luvequ, me keirau kania, ka qai mate.” (1 Tui 17:12) Meda raica mada se cava e vakavotui ena ka e tukuni qori.

E kila sara ga na yada ni o Ilaija e dua na Isireli e dau rerevaka na Kalou. E kilai qori mai na nona cavuta “me vaka sa bula ko Jiova na nomu Kalou.” E kena irairai ni kila toka eso na ka me baleta na nodra Kalou na Isireli, ia e sega ga ni lai vakayagataka sara na matavosa “noqu Kalou” ni cavuti Jiova tiko. E vakaitikotiko e Sarifaci na yada, na taoni e ‘taukeni,’ se dau vakanuinui ena siti vakaFinisia, o Saitoni. De dua era dau sokaloutaki Peali na lewe i Sarifaci. Ia e dua na ka vakasakiti e raica o Jiova vua na yada qo.

E bula maliwai ira na qaravi matakau na yada dravudravua qo, ia e laurai vua na vakabauta. Ena yaga vua na yada na nona tala yani o Jiova na parofita, ena yaga tale ga qori vei Ilaija. Qori eda rawa ni vulica kina e dua na lesoni bibi.

Ni takalevu e Sarifaci na qaravi Peali, e sega ni tukuni ni o ira kece era vakaitikotiko kina era tamata ca. Nona talai Ilaija o Jiova vua na yada, e dusia ni o Jiova e kilai ira e vinaka tu na inaki ni lomadra, ia era se bera ni sokaloutaki koya. Io, “[na Kalou] e vakadonui ira era dokai koya ra qai cakava na ka e vinakata mai na veivanua kece.”​—Caka. 10:35.

Era le vica era tiko ena nomu yalava era vakataki koya na yada ni Sarifaci? De dua era na maliwai ira era dau tokona na lotu lasu, ia era rairai diva tu e dua na ka e vinaka cake. Era rairai kila ga vakalailai eso na ka me baleti Jiova se ra sega sara ga ni kila, qai vinakati mera vukei ke ra mani yaco mera taleitaka na sokalou savasava. Vakacava o vakasaqarai ira tiko era va qori, o vukei ira tale tiko ga?

“CAKAVA MADA ELIU VEI AU E DUA NA [MADRAI] LAILAI”

Vakasamataka vinaka mada na ka e kerea o Ilaija vua na yada. A se qai tukuna oti ga na yada vei Ilaija ni gauna ga e sa na cakava oti kina na kedrau vakaveitinani, erau na kana, rau mate sara. Ia na cava e kaya vua o Ilaija? “Mo kakua ni rere; mo la’ki cakava me vaka na nomu vosa; ia mo cakava mada eliu vei au e dua na [madrai] lailai, ka kauta mai vei au, mo qai vakarautaka emuri na kemudrau kei luvemu. Ni sa kaya vakaoqo ko Jiova na nodra Kalou na Isireli, Ena sega ni oti na saqa [falawa], ena sega talega ni maca sobu na tavaya waiwai, ka me yaco mada na siga ena vakatauca na uca ko Jiova ki vuravura.”​—1 Tui 17:​11-14.

Ena rairai kaya eso, ‘Me soli tale ga na iotioti ni keirau? Sa sega tu ga ni rawa qori!’ Ia a sega ni cakava qori na yada. E sega ni levu na ka e kila me baleti Jiova, ia a vakabauti Ilaija qai muria na ka e tukuni vua. Qori e dua na ituvaki e vakatovolei sara ga kina nona vakabauta​—ia a qai vakatulewa vakavuku.

A sega ni biuti koya na yada dravudravua na Kalou. Me vaka ga e tukuna o Ilaija, e vakalevutaka o Jiova na ka lailai se vo tu vua me rawa ni vakani rau kina vakaveitinani kei Ilaija me yacova ni sa oti na lauqa. Io, a “sega ni oti na saqa [falawa], ka sega ni maca sobu na tavaya waiwai, me vaka na vosa i Jiova ka vosataka ko koya e na gusu i Ilaija.” (1 Tui 17:16; 18:1) Ke sega ni wasea na yada na madrai a bulia mai na falawa kei na waiwai, de dua sa na iotioti sara ga ni ka erau kania qori. Ia a laurai vua na vakabauta kei na nona nuitaki Jiova, mani vakani Ilaija kina e liu.

Dua na lesoni eda rawa ni vulica ekeri, o Jiova ena vakalougatataki ira era vakaraitaka ni tiko vei ira na vakabauta. Ni vakatovolei noda yalodina qai tiko vei keda na vakabauta, ena vukei keda o Jiova. Ena vakarautaka na ka eda gadreva, ena taqomaki keda, ena noda itokani tale ga me rawa nida vosota kina na ituvaki dredre.​—Lako 3:​13-15.

Ena 1898, a tabaki ena Zion’s Watch Tower na ka e vulici ena kena italanoa na yada: “Ke tu vua na marama ya na vakabauta me rawa kina ni talairawarawa, sa na qai ganiti koya na veivuke ni Turaga ni vakayagataki na Parofita; ke sega vua na vakabauta, de dua ena rawa ni laurai qori vua e dua tale na yada. Koya gona, se mani cava eda sotava ena noda bula, na Turaga ena biuti keda ena dua na ituvaki me vakatovolea na noda vakabauta. Ke da vakaraitaka ni tiko vei keda na vakabauta, eda na vakalougatataki, ke sega, eda na sega ni rawata.”

Nida vakatovolei, e bibi meda qara na ivakasala vakalou ena iVolatabu kei na noda ivola vakaivolatabu. E dodonu meda muria na ivakasala i Jiova se mani dredre vakacava na noda ciqoma. Eda na vakalougatataki vakaidina ke da muria na vosa ni vuku qo: “Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua: Mo vakarogotaka vua na nomu sala kecega, Ia ena vakadodonutaka na nomui lakolako ko koya.”​—Vkai. 3:5, 6.

‘O SA LAKO BEKA MAI MO MAI VAKAMATEA NA LUVEQU?’

Ena vakarau vakatovolei tale na nona vakabauta na yada. E tukuna na iVolatabu: “Sa oti na veika oqo, sa qai tauvi mate na luvena na yalewa, nai taukei ni vale; ia sa bibi sara na nona mate, ka me sega ni vo vua na nonai cegu.” Ena nona via kila na vuna e yaco kina na leqa qo, e tukuna kina na yada vei Ilaija: “A cava li na ka vei kedaru, o iko na tamata ni Kalou? o sa lako beka mai mo vakananumi au e na noqui valavala ca, mo vakamatea talega na luvequ!” (1 Tui 17:​17, 18) Na cava mada e vakaibalebaletaka na vosa kaukaua qori?

De dua a vakasamataka lesu na yada e dua na valavala ca e vakaleqa na nona lewaeloma. A rairai nanuma tale ga ni takali i luvena e itotogi ni Kalou, a talai gona o Ilaija me vakasavuya na itukutuku ni mate. Ke dina qori se sega, na iVolatabu e sega ni vakamatatataka, ia e dua ga na ka e matata vei keda: Na yada a sega ni beitaka na Kalou ena ka tawadodonu e yacovi koya.

Ena rairai kidacalataka mada ga o Ilaija nona takali na gone kei na nona veibeitaki na yada ni vakavuna na parofita na takali i luvena. A kauta o Ilaija na yagona na gonetagane ena tabavale e cake qai tagicaka: “Kemuni Jiova na noqu Kalou, o ni sa vakayacora talega beka na ca vua na yada ka’u sa tiko vulagi kaya, ni kemuni sa vakamatea na luvena?” E sega ni kinoca rawa na parofita na nona vakasamataka ni rawa ni vosavakacacataki na yaca ni Kalou ke vakararawataki tale na marama dauveikauaitaki qo. E cikeva kina o Ilaija: “Kemuni Jiova na noqu Kalou, me curu tale mada vua na gone oqo na yalona.”​—1 Tui 17:20, 21.

“RAICA, SA BULA NA LUVEMU”

A rogoca vinaka tiko o Jiova na masu i Ilaija. A vakarautaka na yada na veika a vinakata na parofita, a vakaraitaka tale ga na vakabauta. De dua a vakalaiva na Kalou me tauvimate na gonetagane ena nona kila ni na yaco na veivakaturi​—na imatai me volatukutukutaki ena iVolatabu​—me qai solia na inuinui vei ira na itabatamata ena veigauna se bera mai. Ni kerei Jiova o Ilaija, a vakabulai na gonetagane ya. Raitayaloyalotaka mada na nona marau na yada ena nona tukuna o Ilaija: “Raica, sa bula na luvemu”! A mani tukuna na yada vei Ilaija: “Au sa qai kila e na ka oqo ni ko sa tamata ni Kalou, ka sa dina na vosa i Jiova e na gusumu.”​—1 Tui 17:22-24.

E sega ni vakamacalataki ena 1 Tui wase 17 eso tale na ka e baleta na yada qo. Ia ni laurai na ka vinaka e tukuna o Jisu me baleta na yada, e kena irairai ni a yalodina voli ena nona qaravi Jiova me yacova nona sa lai takali. (Luke 4:25, 26) Eda vulica ena italanoa qo, ni Kalou e dau vakalougatataki ira era dau caka vinaka vei ira na nona tamata. (Maciu 25:​34-40) E vakadinadinataka ni dau vakarautaka na Kalou na ka era vinakata na nona dauveiqaravi, ke sotavi mada ga na ituvaki dredre. (Maciu 6:25-34) E laurai tale ga ena italanoa qo ni vinakata o Jiova me vakaturi ira na mate, e tu tale ga vua na kaukaua me cakava qori. (Caka. 24:15) Qori na vuna meda nanumi koya tiko ga kina na yada ni Sarifaci.