A Dei tu ga ena Gauna ni Rarawa

E TEKIDURU o Meri qai sega ni tukuni rawa na levu ni nona rarawa. Se nanuma vinaka tu ga na iotioti ni vosa e cavuta o luvena ni bera ni mate. Ena sigalevu tutu oya, e buto qai sakure na vanua. (Maciu 27:45, 51) De nanuma o Meri ni vakatakila tiko kina e vuravura o Jiova ni rarawataka vakalevu duadua o koya na mate i Jisu Karisito.

Ena yakavi ya, e tagicaki luvena toka o Meri ena vanua o Kolikoca se Qavokavoka. (Joni 19:17, 25) E rairai nanuma lesu o Meri e levu na ka. Kena ivakaraitaki, na veika a yaco ena 33 na yabaki yani e liu. A tomani Meri o Josefa ena nodrau kauti luvedrau ina valenisoro e Jerusalemi, qai uqeti ena yalo tabu na kenaturaga o Simione me parofisaitaka e dua na ka me baleti Jisu. E levu na ka vinaka e parofisaitaka, ia e tukuna tale ga ni na rarawa o Meri me vaka ga e suaki ena iseleiwau balavu. (Luke 2:25-35) Ni yaco mai na gauna rarawataki qori, sa qai kila o Meri ni dina na ka e parofisaitaki.

E tukuni ni nona mate e dua na gone e ka mosimosi qai rarawataki duadua vua na itubutubu. E keda meca o mate qai dau vakararawataki keda kece. (Roma 5:12; 1 Korinica 15:26) Vakacava e rawa nida vosota na ituvaki qori? Nida dikeva na bula i Meri ni tekivu na cakacaka vakaitalatala i Jisu me yacova nona mate kei na veika e yaco tarava, eda na raica se vukei Meri vakacava na nona vakabauta me dei tu ga ena gauna ni rarawa.

“NA KA GA E TUKUNA, NI CAKAVA”

Meda dikeva mada na veika e yaco ena tolu veimama na yabaki e liu. A kidava o Meri ni sa vakarau yaco na veisau. E ka ni veitalanoa ena taoni lailai o Nasareci o Joni na Dauveipapitaisotaki kei na nona itukutuku veiuqeti ni veivutuni. E siqema o Meri ni raica o luvena ulumatua me ivakatakilakila na itukutuku qori, sa kena gauna me tekivu nona cakacaka vakaitalatala. (Maciu 3:1, 13) Ena vakilai vakalevu na veika dredre ena vuvale i Meri ni sa na yali o Jisu. Na vuna?

Sa rairai mate ena gauna qori o Josefa na wati Meri. Kena ibalebale, e sega ni ka vou vei Meri na rarawa e vakilai ni takali e dua.a E kilai ena gauna ya o Jisu me “luve ni matai,” me “matai” tale ga. De dua sa cicivaka o Jisu na bisinisi nei tamana, a vakarautaka tale ga na veika eratou gadreva na vuvale, wili kina e ono na tacina eratou qai sucu e muri. (Maciu 13:55, 56; Marika 6:3) E taravi Jisu o Jemesa, ke a vakavulici koya mada ga o Jisu ena cakacaka vakamatai, ena vakilai tiko ga ena vuvale na nona yali o koya e ulumatua. Vakacava ena marautaka o Meri na veisau qori ni sa tu mada ga na itavi me qarava? Eda sega ni kila na kena isau. Ia e bibi meda taroga: Na cava ena cakava o Meri ni sa na Mesaia se Karisito a parofisaitaki tu mai vakadede, o Jisu na kai Nasareci? Ena kilai qori nida dikeva e dua na ivolatukutuku vakaivolatabu.—Joni 2:1-12.

A Lumuti ni Kalou se Mesaia o Jisu ena gauna e gole kina vei Joni me papitaiso. (Luke 3:21, 22) Oti sa qai digi ratou na nona tisaipeli. E bibi qai vakatotolotaki na nona cakacaka, ia e tiko na gauna me veimaliwai kina kei ira na nona vuvale kei na nona itokani. Kena ivakaraitaki, a gole kei tinana, ratou nona tisaipeli, kei ratou na tacina ina dua na kana ni vakamau mai Kena, na taoni e toka ena dua na delana rauta na 13 na kilomita mai Nasareci. Ni vakacagau tiko na soqo, era veiraici qai vakasolokakana na weka ni vakamau. A kidava o Meri ni dua na leqa. Sa oti na waini! Na leqa e yaco qori e rawa ni nanumi kina ni ratou wele na itaukeinisoqo, ratou na vakamadualaki na vuvale qai sega ni marautaki na soqo. Dua na ka nona lomani ratou o Meri, mani kere veivuke vei Jisu.

E tukuna vei luvena: “Sa oti na waini.” Na cava e namaka me cakava o luvena? Levu na ka eda rawa ni vakasamataka, ia e kila o Meri ni tu vei luvena na kaukaua, ena veivakurabuitaki tale ga na ka ena cakava. De vakanuinui tu o Meri me cakava sara ga qori ena soqo eratou tiko kina. E vaka me tukuna tiko vei luvena, “Luvequ, kerekere cakava e dua na ka!” E rairai kidacalataka o Meri na nona kaya o Jisu: “Me icavai vei kedaru qori?” E sega ni veibeci na nona vosa va qori o Jisu me vaka e nanumi tu. A veivakadodonutaki tiko ga vakayalololoma, e via vakaraitaka vei tinana ni sega ni lewa na sala me vakayacora kina na nona cakacaka vakaitalatala, e lewa ga na Tamana o Jiova.

A ciqoma o Meri na veivakadodonutaki i luvena, ni yalomalumalumu qai kila na vuna e tukuna kina ya o Jisu. E tukuna vei ira na veiqaravi tiko ena soqo: “Na ka ga e tukuna, ni cakava.” E kila o Meri ni sa sega ni dodonu me tukuna vei luvena na ka me cakava, era sa na vakarorogo kece vei Jisu okati kina o koya. Me vakataki tinana, e vakaraitaka tale ga o Jisu ni lomani rau na veiwatini vou. A mani vakayacora na imatai ni nona cakamana ni vukica na wai me waini vinaka. Cava e qai yaco? “Eratou mani vakabauti koya na nona tisaipeli.” A vakabauti Jisu tale ga o Meri. Ia sa sega ni okati Jisu wale ga o Meri me luvena, sa nona Turaga, nona iVakabula.

Era rawa ni vulica e levu na ka na itubutubu nikua ena vakabauta i Meri. E macala ga ni sega ni dua na itubutubu e susuga e dua na gone e uasivi vakataki Jisu. Ia me vaka e vakila o Meri, e rawa ni dredre tale ga vua e dua na itubutubu nikua na nona veisau o luvena me dua na uabula. E rawa gona ni nanuma o itubutubu me vagonelailaitaki luvena tu ga, dina ni sa sega ni veiganiti qori. (1 Korinica 13:11) E rawa gona vakacava ni vukei luvena cauravou se goneyalewa e dua na itubutubu? Dua oya, me nuidei ni na yalodina e dua na cauravou se goneyalewa me muria tiko ga na ivakavuvuli vakaivolatabu qai vakalougatataki koya o Jiova. Na nona yalomalumalumu, vakabauta, kei na nona veinuitaki o itubutubu ena yaga vakalevu vei ira na gone era sa cauravou se goneyalewa. A marautaka dina o Jisu na nona veitokoni o Meri ena levu ni itavi e qarava ena veiyabaki e muri.

“ERATOU SEGA . . . NI VAKABAUTI KOYA NA TACINA”

E sega ni vakamacalataki e levu na ka me baleti Meri ena Kosipeli ena tolu veimama na yabaki ni cakacaka vakaitalatala i Jisu. Ia sa rairai yada qai itubutubu ledua ena gauna ya, de dua era se tiko tale ga e vale eso na gone. Eda kila e keri na vuna e sega ni rawa ni tomani Jisu kina o Meri ena cakacaka vakavunau. (1 Timoci 5:8) Ia e dau vakasamataka vakatitobu o Meri na ka dina e vulica me baleta na Mesaia, e sega tale ga ni calata na soqoni ena valenisoro me vaka eratou dau cakava vakavuvale.—Luke 2:19, 51; 4:16.

A rairai vakarorogo tale tiko ga o Meri ena ivunau i Jisu ena valenisoro e Nasareci. Sa wacava na nona marau ni rogoca na nona tukuna o luvena ni sa vakayacori vua na veika e parofisaitaki ena vica na senitiuri sa oti me baleta na Mesaia! Ia e rairai rarawataka o Meri na nodra sega ni vakabauti luvena na wekana e Nasareci. Era saga mada ga mera vakamatei luvena!—Luke 4:17-30.

A rarawataki tale ga na nodratou ivalavala na vo ni luvei Meri tagane, eratou sega ni vakataki tinadratou me ratou vakabauti Jisu. E tukuni ena Joni 7:5: “Eratou sega . . . ni vakabauti koya na tacina.” E sega ni tukuna na iVolatabu e dua na ka me baleti rau na ganei Jisu.b Eda kila ga ni a vakararawataki Meri na nodra sa duidui lotu na nona lewenivuvale. Ena gadrevi me veiraurautaka o koya na nona yalodina vei Jiova kei na nona sasaga me vukei ratou na nona vuvale me ratou vakabauta, ia me kua ni veivakasaurarataki se voravora vei ratou.

Era gole ena dua na gauna mera lai “kauti” Jisu mai eso na wekana kei ratou na tacina, nira kaya: “Sa leqa na nona vakasama.” (Marika 3:21, 31) E sega ni va qori na nanuma i Meri, ia e gole kei ratou na luvena tagane ni nuitaka eratou na vulica e dua na ka me ratou vakabauta kina. Vakacava e yaco qori? E veivakurabuitaki na ka e cakava o Jisu qai totoka na ka dina e vakavulica, ia eratou sega ni vakabauti koya na tacina. E vakavu nuiqawaqawa beka vei Meri na nona vakasamataka na sala me veisautaki ratou kina na nona vuvale?

Vakacava o lewe ni dua na vuvale e duidui vakabauta? O rawa ni vulica e levu na ka ena vakabauta i Meri. E sega ni soro ni vukei ira na wekana era sega ni vakabauta. E vinakata mera raica ni vakamarautaki koya na nona vakabauta, e vakila tale ga kina na vakacegu. E sega tale ga ni cegu na nona tokoni luvena yalodina. Vakacava e dau nanumi Jisu? E dau diva beka ena so na gauna me tiko ga e vale o Jisu? Ke dina qori, e sega ni bau vakaraitaka o Meri. E ka dokai ga vua me tokoni Jisu qai vakayaloqaqataki koya. Vakacava o rawa tale ga ni vukei ira na luvemu mera vakaliuca na Kalou ena nodra bula?

“SUAKA NA LOMAMU E DUA NA ISELEIWAU BALAVU”

A vakalougatataki beka o Meri ena nona vakabauti Jisu? E dau dina o Jiova ena nona yalayala me vakalougatataki ira era vakabauta, e dua vei ira o Meri. (Iperiu 11:6) Raitayaloyalotaka mada na ka e dau vakila o Meri ni rogoci luvena ni vunau, se nira mai talanoa vua eso era rogoci luvena.

Ni cavuta na vosa vakatautauvata o luvena, vakacava e dau siqema o Meri eso na ka e nanuma lesu kina na nona se susu voli mai Nasareci o Jisu ni se gone? Ni vakamacalataka o Jisu na yalewa e taviraka na nona vale me vaqara na nona ilavo e yali, na qaqi ni falawa me caka kina na madrai, se na waqa ni cina qai biu ena kena itutu, ena rairai nanuma lesu o Meri na nona dau toka e yasana o Jisu ni se gone ni cakava voli eso na itavi qori e veisiga. (Luke 11:33; 15:8, 9; 17:35) Ni tukuna o Jisu ni veivakacegui na nona ivua qai mamada na nona icolacola, ena rairai nanuma lesu o Meri na yakavi guiguilecavi dredre ena veiyabaki sa sivi ni dau saravi Josefa voli ni vakavulici Jisu me cakava vinaka na ivua me kua ni tarabi vua na manumanu. (Maciu 11:30) Ni vakasamataka o Meri na itavi dokai e solia vua o Jiova, dua na ka nona marau ni bau veivuke ena nona susugi kei na nona vakavulici na gone ena qai Mesaia. Sa matalau mada ga na vakarorogo vei Jisu na qasenivuli uasivi duadua me bau bula, e vakavulica eso na lesoni bibi ni vakayagataka ga na ka ni bula ni veisiga!

Ia e yalomalumalumu tu ga o Meri. A sega ni bau nanuma o Jisu me vakacaucautaki tinana vakasivia, sa qai yawa sara me sokaloutaki. Ni vunau voli ena dua na gauna o Jisu, a kacivaka yani e dua na marama ni sa na marau mada ga o tinana ni vakasucumi koya. A qai kaya o Jisu: “Sega, era kalougata ga o ira era rogoca na vosa ni Kalou ra qai muria!” (Luke 11:27, 28) Dua tale na gauna era tukuna eso vei Jisu ni ratou tiko voleka na tinana kei na tacina, ia e tukuna nira tinana ra qai tacina o ira era vakabauta. A sega ni leva o Meri ni taura rawa na ka e via vakabibitaka o Jisu, oya nira talei cake na weka vakayalo mai na weka vakayago.—Marika 3:32-35.

E sega ni tukuni rawa na kena mosi vei Meri ni raica na nona vakararawataki o luvena me yacova na nona mate vakaloloma ena kaunirarawa. E qai volatukutukutaka ena dua na gauna e muri na yapositolo o Joni a raica na nona vakamatei o Jisu: Ena gauna rarawataki qori, e duri “volekata tu na kaunirarawa i Jisu” o Meri. Sega ni dua na ka ena tarova na marama yalodina qai dauloloma qo ena nona tokoni luvena me yacova na iotioti. E vakila na mosi o Jisu ni saga mada ga me cegu tiko, sa qai dredre sara me vosa, ia e saga me vosa ni raici tinana. A tataunaki tinana vei Joni, na yapositolo e dau lomana. E sega ni nuitaki ratou na tacina o Jisu ni ratou sega ni vakabauta, mani kerea e dua na nona imuri yalodina me qaravi tinana. A vakaraitaka e keri o Jisu ni bibi vua na tagane vakabauta me qaravi ira na nona lewenivuvale, vakabibi na nodra bula vakayalo.—Joni 19:25-27.

Na gauna a mate kina o Jisu, e vakila sara ga o Meri na mosi kei na rarawa a parofisaitaki ni na vaka na isua ni iseleiwau balavu. Ke da sega ni katuma rawa na levu ni nona rarawa ena gauna qori, sa qai yawa sara meda katuma na nona marau ni oti e tolu na siga! A qai kila o Meri ni a yaco na cakamana vakairogorogo, oya na nona vakaturi o Jisu! E ikuri ni marau i Meri na nona rairai o Jisu vua na tacina vakacabecabe o Jemesa ni tiko taudua voli. (1 Korinica 15:7) E uqeti Jemesa sara ga kei ratou na vo ni tacina vakacabecabe na ka e cakava qori o Jisu. E tukuni ni ratou qai vakabauta ena dua na gauna e muri ni Karisito o Jisu. Eratou sa gole tale ga ina soqoni vaKarisito kei tinadratou ratou qai “masu tiko ga.” (Cakacaka 1:14) E rua na tacina, o Jemesa kei Juta rau qai vakayagataki tale ga ena volai ni iVolatabu.

Na nona masu kei ratou na luvena tagane ena soqoni vaKarisito e iotioti ni gauna me cavuti kina o Meri. E mai cava e keri na ivolatukutuku kei Meri, ia e ivakaraitaki vinaka vei keda. A dei tu ga ena gauna ni rarawa qai soli vua e dua na icovi lagilagi ena vuku ni nona vakabauta. Ke da vakatotomuria na nona vakabauta, eda na dei tu ga se mani rarawa cava eda sotava ena ituvaki ca qo, e sega tale ga ni tukuni rawa na veivakalougatataki eda na marautaka.