Cila na Rarama ena iCabecabe ni Siga

ENA ika6 ni Seviteba, 1926, e lesu i Japani e dua na ivakatawa dauveilakoyaki mai Merika a sucu ga e Japani, me lai veiqaravi vakadaukaulotu. E mai tavaki koya e dua e dau vakaikere ni Vale ni Vakatawa, a tauyavutaka e dua na iwasewase lailai ni vuli iVolatabu e Kobe. Ena ika2 ni Janueri, 1927, e vakayacori ena korolevu qo na imatai ni nodra soqo na Gonevuli ni iVolatabu. Era tiko kina e 36, ratou papitaiso e 8. Dua na itekitekivu vinaka qori, ia era na vukea vakacava na 60 na milioni na lewenivanua e Japani mera raica na rarama ni ka dina ena iVolatabu?

Ena Me 1927, era vunau e matanalevu na Gonevuli ni iVolatabu mera veisureti ena vica na ivunau vakaivolatabu ena rogoci. Na imatai ni vunau ena rogoci e Osaka, era biuta na tacida na kena ivakamacala ena yasa ni gaunisala kei na papa lelevu ena lomanikoro taucoko ra qai vakauta e 3,000 na ivola ni veisureti vei ira na vakaitutu. Era veisoliyaka e 150,000 na tikidua ni veisureti, era tabaka tale ga ena kabani ni niusiveva rogolevu e Osaka kei na 400,000 na tikite ni sitima. Ena siga me rogoci kina na ivunau, e vuka e rua na waqavuka me vakalutuma ina lomanikoro e 100,000 na tikidua ni veisureti. Rauta ni 2,300 era tiko ena valenisoqo levu na Osaka Asahi mera rogoca na ivunau “The Kingdom of God Is at Hand” (Sa Voleka na Matanitu ni Kalou). Voleka ni 1,000 tale e tukuni mera lesu ni sa oso na valenisoqo. Ni oti na ivunau era tiko tale e 600 vakacaca me saumi nodra taro. Ena vica na vula tarava, e rogoci tale ga na ivunau e Kyoto kei na vo ni koro lelevu ena ra ni vanua o Japani.

Ena Okotova 1927, era vakavakarau na Gonevuli ni iVolatabu ena ivunau e Tokyo. E vakau tale na ivola ni veisureti vei ira na vakaitutu, wili kina na paraiminisita, ira na lewe ni palimedi, ira na iliuliu ni lotu kei na mataivalu. E vakabiri na kena ivakamacala, biu ena pepa qai veisoliyaki e 710,000 na tikidua ni veisureti. Era tiko ena ivunau tolutolu qori e 4,800 ena koroturaga kei Japani.

PAINIA GUGUMATUA

E bibi dina nodra itavi na painia nira kauta na itukutuku vinaka ni Matanitu ni Kalou e veivale. O Matsue Ishii, e dua vei ira na imatai ni tacida yalewa painia e Japani, na watina o Jizo, rau sa tara oti e dua na iwase levu ni vanua e kea, me tekivu mai Sapporo ena vualiku me yaco i Sendai, Tokyo, Yokohama, Nagoya, Osaka, Kyoto, Okayama, kei Tokushima. Rau dara na kimono, na isulu balavu ni Japani, na tacida yalewa o Ishii kei na dua tale na tacida sa kenamarama, o Sakiko Tanaka, me rau sikovi ira na vakaitutu ena matanitu. Dua e kerea mai e ya300 na ivola The Harp of God (Na Api ni Kalou) kei na Deliverance (Veivakabulai) me biu ena vatanivola e valeniveivesu.

Rau taura na ivola o Katsuo kei Hagino Miura vua na tacida yalewa o Ishii rau qai vakadeitaka ni qo ga na ka dina. Rau papitaiso ena 1931, oti rau painia sara. O Haruichi kei Tane Yamada, kei na levu na wekadrau, eratou ciqoma na itukutuku vinaka ni Matanitu ni Kalou ni bera na 1930. Rau painia tale ga na veiwatini na Yamada, na luvedrau goneyalewa o Yukiko, e lai veiqaravi ena Peceli e Tokyo.

“JEU”—LEVU, LAILAI

E saulevu ena gauna ya na motoka, e ca tale ga na gaunisala. Ia o Kazumi Minoura kei ira na painia gone era dau vakayagataka na valeqiqi. Era vakatokayacataka me o Jeu, na turaganilewa ni Isireli dau vakau qiqinivalu. (2 Tui 10:15, 16) E tolu na Jeu Levu, na kena balavu e dua e 2.2 na mita, na kena raba e 1.9 na mita, na kena cere e 1.9 na mita, rawa ni moce kina e ono na painia. E qai tara na valenivolavola ni tabana e 11 tale na Jeu Lailai. Dua na Jeu Lailai e rawa ni moce kina e le 2. E nanuma lesu o Kiichi Iwasaki, a tara na Jeu, “E vakalaca na Jeu yadua, e tiko tale ga na kena batiri me waqa kina na cina.” Era vakacilava na rarama ni ka dina na painia e Japani taucoko, nira biliga ra qai dreta na Jeu ena veiulunivanua kei na veibuca mai na vualiku kei Hokkaido me yacovi Kyushu ena ceva.

E kaya na tacida tagane painia o Ikumatsu Ota: “Ni keimami yaco ena dua na tauni, keimami vakelea neimami Jeu ena bati ni uciwai se rara. Keimami lai raici ira e liu na iliuliu ni tauni, me vaka na mea, oti keimami qai lako ina veivale me keimami vakamacalataka na ivola. Ni oti neimami cakacaka ena vanua qori, keimami toso ena tauni tarava.”

Na imatai ni nodra soqo na 36 na Gonevuli ni iVolatabu e Kobe e “siga ni ka lailai.” (Saka. 4:10) Oti tale e lima na yabaki, oya ena 1932, era ripotetaka nodra cakacaka e 103 na painia kei na dautukutuku e Japani, era solia e 14,000 vakacaca na ivola. Nikua e tuvanaki vinaka na vunau e matanalevu ena koro lelevu e Japani, sa voleka ni 220,000 na dautukutuku era vakacila rarama tiko ena iCabecabe ni Siga.—Mai na vanua e maroroi kina na keda itukutuku makawa e Japani.