O BAU KILA?
Na cava na ibalebale ni “matanivanua” e tukuni ena iVolatabu?
Kena itukutuku e dua na matanivanua ena ivakatakarakara ceuti ni Asiria
So na gauna e dau tukuni qo vei ira e sele nodra iyaya vakatagane mera vakamalumalumutaki kina. Ena gauna vakaivolatabu, qori na itotogi e soli vei ira eso na tagane era vesu se ra vakabobulataki. O ira na tagane nuitaki era vakamalumalumutaki va qori era dau liutaka na qaravi ni nodra itikotiko na yalewa, se o ira na yalewa era vakawatitaki ina vuvale vakatui. Kena ivakaraitaki na matanivanua o Ikai kei Seasikasi, rau a vakatawani ira na watina kei ira na watina lalai na Tui Perisia o Esuerosi, nanumi tale ga me o Kisekise I.—Esiteri 2:3, 14.
Ia era sega ni sele kece o ira na vakatokai ena iVolatabu mera matanivanua. Era kaya eso na vuku ni dau vakayagataki raraba tale ga na vosa qori me vakaibalebaletaki ira na vakailesilesi vakamatanitu era qarava tiko na nodra itavi ena valenitui. Kena irairai ni vakayagataki qori vei Epetimeleki, na itokani i Jeremaia, kei na turaga ni Iciopea, a sega ni tukuni na yacana, e vunau vua o Filipi. E vakaitutu o Epetimeleki ni rau dau veivosaki kei Tui Setekaia. (Jeremaia 38:7, 8) E tukuni tale ga ni a “lako . . . i Jerusalemi me lai sokalou” na turaga ni Iciopea e liutaka na valeniyau ni tui.—Cakacaka 8:27.
Cava era dau tawasei ira kina na sipi mai na me na ivakatawa ena gauna vakaivolatabu?
Ni tukuna tiko na gauna ni veilewai e se bera mai, e kaya o Jisu: “Ni [lako] mai na Luve ni tamata ena nona iukuuku, . . . ena qai tawasei ira na lewenivanua me vaka ga na nona dau tawasei ira na sipi mai na me na ivakatawa.” (Maciu 25:31, 32) Na cava mera tawasei kina?
E dau kena ivakarau ga mera kana ra qai bulavata na sipi kei na me ena siga. Era dau qai biu ina bai ena bogi mera taqomaki kina vei ira na manumanu kila, daubutako kei na batabata. (Vakatekivu 30:32, 33; 31:38-40) Era dau qai wasei ina nodra dui bai mera taqomaki kina na sipi malumalumu, vakabibi o ira na tinanisipi kei na luvedra, baleta ni rawa nira veivakamavoataki na me kila. E kaya na ivola All Things in the Bible ni o ira na ivakatawa era dau wasei ira tale ga na sipi mai na me ena gauna ni “veisusu, loba sucu, kei na gauna mera koti kina.” Na vosa vakatautauvata gona i Jisu e vakaraitaka sara ga na veika era kila vinaka tu na vakarogoci koya era bula ena vanua ni susu manumanu me vakataki Isireli makawa.