Ena Tubu Tale na Vunikau e Tamusuki?

NI VAKATAUVATANI kei na vunisitari vakaitamera kei Lepanoni, e sega soti ni vakatubuqoroqoro na vuniolive ni veiveveyaki qai sega ni bulicaki vinaka. Ia e bula ena ivakarau ni draki kece. E tukuni ni so na kau qo sa 1,000 na yabaki na kedra dede. E rabailevu na vanua e teteva na wakana, qo e vakavuna me tubu tale na tolona ena gauna e tamusuki kina. Ke bula tiko ga na wakana, ena tubu tale na vuniolive.

E nuidei na peteriaki o Jope ni kevaka ena mate, ena rawa ni bula tale. (Jope 14:13-15) E vakatauvatana nona nuidei ena kaukaua ni Kalou me vakaturi koya ena nona vakayagataka e dua na vunikau, de dua na vuniolive. E tukuna o Jope: “Na vunikau mada ga sa tu na kena inuinui. Ke tamusuki, ena tubu tale.” Ni tau na uca ni oti na lauqa, ena kadre na tabanikau vou mai na vuna mamaca, ena tubu mai na “tabana me vaka na kau vou.”—Jope 14:7-9.

Me vaka ga nona vinakata na dausamaki kau me bula tale na vuniolive sa tamusuki, e vinakata tale ga na Kalou o Jiova me vakabulai ira na nona dauveiqaravi kei ira tale eso era sa takali. (Maciu 22:31, 32; Joni 5:28, 29; Caka. 24:15) Ena marautaki mada ga noda kidavaki ira na mate mera marautaka tale na nodra bula!