Taro na Dauwiliwili

Eda kila vakacava ni lekaleka ga na kena ravuti na koro makawa o Jeriko?

E tukuni ena Josua 6:​10-15, 20, nira wavokita vakadua na Isireli na koro o Jeriko me ono na siga. Ena ikavitu ni siga, era wavokita vakavitu qai vakavuna na Kalou me kasura na bai kaukaua kei Jeriko. A rawa kina mera curuma na Isireli na koro ra qai vakarusa. Vakacava e tokona na ivakadinadina ni vakekeli na ka e tukuna na iVolatabu ni lekaleka ga nona ravuti o Jeriko?

Ena gauna makawa, era na wavokita na meca na koro e vakabai vinaka ni bera nira ravuta. Se mani vakacava na balavu ni ravuravu, eda kila ga ni na yauta o koya e qaqa na itokinivalu kei na so tale na ka. Ia e laurai ena irusarusa kei Jeriko e dua na iwase levu ni kakana. E tukuna kina na ivola na Biblical Archaeology Review: “E kune vakalevu ena irusarusa na ka kece e tuli kei na witi. . . . Qo e duatani duadua ena itukutuku ni veigauna ena vakadidike kei Palesitaina. Levu na gauna e dau kune e dua ga se rua na saqa witi, ia e sega ni vakabauti me kune e dua na iwase levu ni witi va qo.”

Me vaka e volatukutukutaki ena iVolatabu, e tiko na vuna vinaka era sega ni yauta kina na Isireli na kedra witi na kai Jeriko. A vakaroti ira sara ga o Jiova mera kua ni tara. (Josua 6:​17, 18) Era ravuravu tiko na Isireli ena vulaitubutubu, qori ni se qai oti ga na tatamusuki qai levu sara tu ga kina na witi. (Josua 3:​15-17; 5:10) Na levu ni witi e laurai e Jeriko, e dusia ni lekaleka ga nodra ravuravu na Isireli, me vaka ga e tukuni ena iVolatabu.