Matanivola Lailai, ia e Veivakadeitaki

Eda vakadeitaka vakacava ni na yaco kece na yalayala ni Kalou? A vakabauta o Jisu ni na yaco dina qori, na ka e vakavulica e uqeti ira tale ga na vakarorogo mera vakabauta. Vakasamataka mada na vosa vakatautauvata a cavuta ena nona iVunau ena Ulunivanua, e volai ena Maciu 5:18: “Au kaya vakadodonu vei kemuni, sa bau wadrega me na sega ni vakayacori e dua na matanivola lailai se dua na matanivola ni Lawa, e rawarawa cake me takali o lomalagi kei vuravura.”

Na matanivola lailai duadua ena vosa vakaIperiu na י (yod), qori tale ga na imatai ni matanivola vakaIperiu ena yaca tabu ni Kalou, o Jiova.a Era sega ni kauaitaka ga na vunivola kei na Farisi na vosa kei na matanivola ena Lawa ni Kalou, e bibi mada ga vei ira na “itoqa yadua ena matanivola.”

A tukuna o Jisu ni na rawarawa cake me takali o lomalagi kei vuravura, sa na bau wadrega me sega ni vakayacori e dua na matanivola lailai ena Lawa. Ia e kaya tale ga na iVolatabu ni na tu ga me tawamudu na lomalagi kei na vuravura. (Same 78:69) Qori e vakadeitaka ni na vakayacori kece vakamatailalai na ka e volai ena Lawa.

Vakacava e kauaitaka o Jiova na itukutuku matailalai? Io. Vakasamataka mada qo: A tukuni vei ira na Isireli mera kua ni musuka e dua na sui ni lami ni Lakosivia. (Lako Yani 12:46) E matailalai na ka e tukuni ya vei ira, era rairai sega tale ga ni kila na vuna mera kua ni musuka kina e dua na sui. O Jiova ga e kila ni itukutuku matailalai ya e vakatakarakarataka na kena sega ni musuki e dua na nona sui na Mesaia ena gauna e vakamatei kina ena kaunirarawa.—Same 34:20; Joni 19:31-33, 36.

Cava eda vulica ena vosa i Jisu? Meda nuidei ni na yaco dina na yalayala kece ni Kalou o Jiova, ena vakayacori kece vakamatailalai. Io, qori na ka e veivakadeitaki kina e dua na matanivola lailai vakaIperiu!