Me Vinaka Tale Nomu Veiwekani kei Jiova

E VEIYABAKI e levu na sipi mareqeti era vakalesui ina ivavakoso lotu vaKarisito. Vakasamataka mada na levu ni “marau mai lomalagi” nira lesu yadudua mai! (Luke 15:7, 10) Ke o vakalesui mai, mo nuidei ni marau vakalevu o Jisu, ira na agilosi, kei Jiova ni o sa lewena tale na ivavakoso. Ia ni o saga tiko me vinaka tale nomu veiwekani kei Jiova, ena rairai levu na ka e vakadredretaka. Na cava qori? Cava ena vukei iko?

NA CAVA ESO NA ITUVAKI DREDRE?

E levu era yalolailai tiko ga nira vakalesui ina ivavakoso. De o na duavata kei Tui Tevita. Ni sa vosoti mada ga na nona ivalavala ca, e kaya: “Au sega ni taqea rawa na noqu cala.” (Same 40:12; 65:3) Ni lesu vei Jiova e dua, ena rairai ora tu ga na lomana se madua me vica vata na yabaki. Kena ivakaraitaki o Ilisapeci, e vakasivoi tu me sivia ni 20 na yabaki.a E kaya, “E dredre meu vakabauta ni sa vosoti au o Jiova.” Ke o yalolailai, o na rawa ni malumalumu tale vakayalo. (Vkai. 24:10) Saga me kua ni yacovi iko qori.

Era lomaleqataka eso na veika e vauci ena nodra saga me vinaka tale nodra veiwekani kei Jiova. Ni vakalesui mai o Toni, e kaya, “Au sa guilecava e levu na ka au vulica se cakava ena gauna au iVakadinadina i Jiova tiko kina.” Ni va qori nodra rai eso, era sega ni via vakaitavi vakalevu ena veika vakayalo.

Kena ivakaraitaki, ke dua na vale e vakacacani ena cagilaba, ena rairai yalolailai na kena itaukei ni vakasamataka na levu ni gauna kei na cakacaka me vakavinakataki kina. E va tale ga qori nomu veiwekani kei Jiova ni vakaleqai ena ivalavala ca bibi. O na rairai yalolailai ni o vakasamataka na levu ni sasaga mo cakava me vinaka tale nomu veiwekani kei Jiova. Ia ena sega ni rawa ni o cakava duadua.

E sureti keda o Jiova: “Ni lako mada mai meda veivosaki vakadodonu.” (Aisea 1:18) O sa cakava na nomu itavi mo “veivosaki vakadodonu.” E lomani iko o Jiova ni o cakava qori. Vakasamataka mada: E rawa ni vakayagataki iko o Jiova mo vakalasuya na veibeitaki i Setani!—Vkai. 27:11.

Ni o cakava qori, o sa toro volekati Jiova tiko, e yalataka ni na volekati iko tale ga. (Jeme. 4:8) E vinaka nira sa raici iko eso tale ni o sa lewena na ivavakoso, ia e vinakati mo cakava eso tale na ka. E bibi mo vakalevutaka tiko ga nomu lomani Jiova na Tamamu kei na nomu iTokani. O na cakava vakacava qo?

NA ISAUSAU O RAWA NI SAUVA

Saga me tiko eso na nomu isausau o rawa ni sauva. Kena irairai ni o se nanuma tiko e levu na ka o vulica me baleti Jiova kei na nona vosa ni yalayala me baleta na Parataisi. Ia e vinakati me tiko e dua na nomu ituvatuva vinaka. Kena ivakaraitaki, mo vunau vakawasoma, lako ina soqoni, me tiko tale ga na gauna mo veimaliwai kina kei ira na mataveitacini. Vakasamataka mada eso na isausau qo.

Vosa wasoma vei Jiova. E kila o Tamamu ni na vakadredretaka nomu masu vua na ora ni lomamu. (Roma 8:26) Ia mo “gumatua ena masu,” mo tukuna vei Jiova ni o vinakata mo drau veitokani. (Roma 12:12) E nanuma lesu o Adriu: “Dua na ka na ora ni lomaqu kei na noqu madua. Ia niu dau masu oti, e vinaka na ivakarau ni lomaqu. E vakacegu sara ga na noqu vakasama.” Ke o sega ni kila na ka mo masulaka, vakasamataka nona masu o Tui Tevita e volai ena Same 51 kei na 65.

Vulica wasoma na iVolatabu. Qo ena vakaukauataki iko vakayalo, o na lomani Jiova tale ga vakalevu. (Same 19:7-11) E kaya o Filipe, “Ni sega noqu ituvatuva vinaka ni vuli vakataki au, au malumu kina vakayalo, au vakararawataki Jiova tale ga. Au sega ni via cakava tale qori, au vakadeitaka gona me wasoma noqu vuli vakataki au.” O rawa tale ga ni cakava qori. Ke o via kila na ulutaga veiganiti mo vulica, vacava mo kerea nona veivuke e dua na nomu itokani matua.

Me vinaka tale nomu veiwekani kei ira na mataveitacini. Era leqataka eso era vakalesui mai ni na cala nodra rai eso ena ivavakoso me baleti ira. E kaya o Lavenia: “Dua na ka noqu madua. Au kila niu vakararawataki ira na mataveitacini. Dua na gauna balavu e va tu qori noqu rai.” Mo nuidei nira via vukei iko na qase ni ivavakoso kei ira na matua vakayalo me vinaka tale nomu bula vakayalo. (Raica na kato “Na Cava Mera Cakava na Qase ni iVavakoso?”) Era marau vakalevu ni o sa lesu mai, era vinakata gona mo marau!—Vkai. 17:17.

Na cava mo cakava mo veivolekati kina kei ira na mataveitacini? Mo vakaitavi sara ga ena ka era cakava tiko, oya na soqoni kei na cakacaka vakavunau. Ena yaga vakacava qori? E kaya o Vilikesa: “Era vakanamata tu na mataveitacini meu vakalesui mai. Au vakila niu mareqeti. Era vukei au meu lewe ni ivavakoso tale, meu kila niu sa vosoti, meu toso tale ga vakayalo.”—Raica na kato “Na Cava Mo Cakava?”

KUA NI SORO!

O Setani ena vakavuna tiko ga e levu na leqa me vakamalumalumutaki iko ni o saga me vinaka tale nomu veiwekani kei Jiova. (Luke 4:13) Mo tu vakarau ni vakavinakataka nomu veiwekani kei Jiova.

E yalataka o Jiova me baleta na nona sipi: “Au na vaqarai koya e yali, au na vakalesui koya mai e lako sese, au na vadretitaki koya e mavoa, au na vakaukauataki koya e malumalumu.” (Isik. 34:16) O Jiova sa vukea e levu me vinaka tale nodra veiwekani kei koya. Mo nuidei ni via vukei iko tale ga mo vakavinakataka tiko ga nomu veiwekani kei koya.

Na Cava Mera Cakava na Qase ni iVavakoso?

E levu na ka e rawa nira cakava na qase ni ivavakoso mera vukei ira kina na dautukutuku era vakalesui mai mera vakavinakataka nodra veiwekani kei Jiova. Dikeva e vica na ka e rawa nira vukei ira kina na vakalesui mai.

Vakacegui ira. E kila na yapositolo o Paula ni o koya e valavala ca sa veivutuni e rawa ni “luvuci ena levu ni rarawa.” (2 Kor. 2:7) Ena dau madua se yalolailai vakalevu. E vakasalataka o Paula na ivavakoso: “Moni tu vakarau ni vosoti koya, ni vakacegui koya.” Mera nuidei o ira na vakalesui mai ni lomani ira vakalevu o Jiova kei na tacidra vakayalo. E vinakati mera vakacaucautaki tiko ga ra qai vukei mera kua ni yalolailai.

Masu vata kei ira. “Me kua ni beci na vakamamasu ni tamata yalododonu ni na yaga vakalevu.” (Jeme. 5:16) E tukuna o Lavenia, sa tukuni oti mai: “Au tukuna vei ratou na qase na ka au lomatarotarotaka kei na noqu lomaleqa. Eratou masu vata kei au. Au kila kina ni ratou sega ni cudruvi au na qase. Eratou via vukei au ga meu vakavinakataka noqu veiwekani kei Jiova.” E kaya o Taitusi: “Au nuidei ena nodratou masu na qase ni lomani au dina o Jiova, e raica tale ga na ka au vinaka kina, sega ni noqu malumalumu.”

Mo nodra itokani. Era vinakata na vakalesui mai mera veitokani ena ivavakoso. E kaya e dua na qase ni ivavakoso o Jone, “Dau sureti ira moni lai vunau vata ke rawa, e bibi sara mo sikovi ira ena nodra vale. E bibi dina mo nodra itokani!” E kaya e dua tale na qase o Anare, “Ke ra raica na lewe ni ivavakoso nira veitokani na qase kei koya e vakalesui mai, era na cakava tale ga qori.”

Vukei ira mera vuli vakataki ira. Rawa ni vukei koya e vakalesui mai na nona itokani matua me tiko nona ituvatuva ni vuli vakataki koya. E kaya e dua na qase ni ivavakoso o Donu: “Au taleitaka meu wasea na ka au vulica mai na noqu vuli vakataki au, meu vakaraitaka tale ga niu taleitaka noqu vulica na iVolatabu. Kena ikuri, au tuvanaka me keirau vulica vata eso na ulutaga.” E tukuna e dua tale na qase o Kaveni: “Au uqeti ira mera raica eso na italanoa ena iVolatabu e via tautauvata sara ga kei na ka era sotava.”

Vakatawai ira. Era raica o ira na vakalesui mai nira qarava na qase na nodra itavi mera turaganilewa. Sa qai bibi sara qo mera raica nira qarava na nodra itavi vakaivakatawa. (Jere. 23:4) Mo totolo ni vakarorogo qai tu vakarau ni vakacaucautaki ira. Moni veivosaki wasoma. Dikeva na ka e dau cakava e dua na qase na yacana o Marika ena veivakatawani: “Keitou na veivosakitaka e dua na tikina mai na iVolatabu, keitou vakacaucautaki ira, vakadeitaka vei ira ni keitou marautaka nodra sasaga mera lesu mai, e marautaka tale ga o Jiova. Ni cava na veisiko, keitou na tuvanaka na tikinisiga me keitou veisiko tale yani kina.”

a Sa veisau na yaca ena ulutaga qo.