SALA MEDA VALUTA KINA NA YALO NI VEICATI

1 | Kua ni Veivakaduiduitaki

iVakavuvuli Vakaivolatabu:

“E sega ni dau veivakaduiduitaki na Kalou, ia e vakadonui ira na dokai koya ra qai cakava na ka e vinakata mai na veivanua kece.”—CAKACAKA 10:34, 35.

Kena iBalebale:

Na Kalou o Jiovaa e sega ni vakaduiduitaki keda ena vanua eda cavutu mai kina, matatamata eda lewena, roka ni yagoda, se itovo vakavanua. E kauaitaka ga na ka e bibi duadua, ya na ivakarau ni lomada. Io, “ni raica ga na tamata na ka e sau, ia o Jiova e raica na loma ni tamata.”—1 Samuela 16:7.

Ka o Rawa ni Cakava:

Eda sega ni rawa ni raica na loma ni tamata, ia eda rawa ni vakatotomuria na Kalou qai kua ni veivakaduiduitaki. Saga mo kauaitaka na tamata yadua, kua ni raica tu ga na ilawalawa tamata. Vakacava o dau sevaki ira eso tale, de dua na vanua beka era cavutu mai kina se matatamata era lewena? Mo masu vua na Kalou qai kerea nona veivuke mo cavuraka laivi na ivakarau ni yalo qori. (Same 139:23, 24) Ke o kerea vei Jiova mai vu ni lomamu na kaukaua mo kua ni veivakaduiduitaki, o rawa ni nuidei ni na rogoca nomu masu qai vukei iko.—1 Pita 3:12.

a O Jiova na yaca ni Kalou.—Same 83:18.

“Se bera vakadua niu dabe qai veimaliwai vinaka kei na dua na yago vulavula . . . Au sa mai lewena e dua na mataveitacini e vuravura raraba.”—TITUS

iTalanoa Dina—TITUS

Valuta na Yalo ni Veicati

A lewena tu o Titus e dua na ilala voravora era dau sevaka na lawa ni veivakaduiduitaki. E kaya: “Keimami dau lako i tauni ina vanua era vakatabui kina na yago loaloa, me vaka na otela kei na vanua ni gunu, qori me keimami lai vakatubu veivala ga.” E kaya o Titus nira cakava ga qori ena levu ni veicati. E tomana: “Ni keirau veiba kei na dua na tagane se yalewa, ena vuka ga i liu na ligaqu.”

Ia e tekivu veisau o Titus ni mai vulica na iVolatabu kei ira na iVakadinadina i Jiova. E veisau sara ga nona rai ni wilika na iVolatabu. E uqeti koya vakalevu na yalayala me baleta na veigauna se bera mai, ya ni “sa na sega tale na mate, na lolosi, na tagiyaso kei na mosi.”—Vakatakila 21:3, 4.

E sega ni rawarawa nona sasaga me cavuraka na yalo ni veicati. E kaya: “E dredre sara ga meu veisautaka noqu ivakarau ni rai kei na itovo.” Ia e uqeti koya na ka e vulica ena Cakacaka 10:34, 35, e tukuni kina ni sega ni dau veivakaduiduitaki na Kalou.

E yaga vakacava vei Titus na ivakavuvuli qori? E kaya: “Dina nira duidui matatamata na iVakadinadina i Jiova, e duidui tale ga na roka ni yagodra, ia niu raica na nodra veilomani au vakadeitaka sara ga nira lotu dina. Ni bera mada ga niu papitaiso meu iVakadinadina i Jiova, a sureti au e dua na lewe ni ivavakoso yago vulavula me keirau lai kana vata i nona vale. E vaka ga au tadra tiko. Se bera vakadua niu dabe qai veimaliwai vinaka kei na dua na yago vulavula, ia qo au sa kana sara tu ga e nona vale. Au sa mai lewena e dua na mataveitacini e vuravura raraba.”