O Bau Kila?

Na mataqali qiqi vakacava e vodoka na matanivanua ni Iciopea ni lai tavaki koya o Filipi?

NA VOSA taumada ni “qiqi” e vakadewataki ena New World Translation, e rawa ni vakaibalebaletaki ena veimataqali qiqi. (Caka. 8:28, 29, 38) Ia kena irairai ni a vodoka tiko na turaga ni Iciopea e dua na mataqali qiqi e ka levu mai na qiqinivalu se qiqi ni veitau. Meda raica mada qo eso na vuna e tukuni kina qori.

Na turaga ni Iciopea e dua na vakailesilesi liu e lako sara mai vakayawa. E “nona dauniyau na ranadi ni Iciopea o Kadasi, e nona vakailesilesi liu tale ga.” (Caka. 8:27) O Iciopea ena gauna makawa e kovuti kina o Sudan kei na ceva kei Ijipita ena gauna qo. De dua a sega ni vodo tiko ga ena qiqi qori ena nona ilakolako balavu, kena irairai ni a kauta tale ga eso na ka ena yaga vua. Na mataqali qiqi era dau vodo kina na pasidia ena imatai ni senitiuri, e va na yavana. E tukuni ena dua na ivakamacala ni ivola na Cakacaka, na “mataqali qiqi va qori e rawa ni tawa kina e levu na ka, e vinaka na vodo kina, e rawa tale ga ni balavu na vanua e lakova.”

A wiliwili tiko na turaga ni Iciopea ena gauna e torovi koya kina o Filipi. E tukuni ena kena itukutuku, ni “cici yani o Filipi ena yasa ni qiqi, e rogoci koya sara ni wilika tiko i cake na ivola i Aisea na parofita.” (Caka. 8:30) A sega ni buli na qiqi va qori me lako vakatotolo. Ni berabera na toso ni qiqi, e rawa kina ni wiliwili na turaga ni Iciopea, e totolo tale ga nona taubale o Filipi me yacovi koya yani.

E “vakamasuti Filipi me vodo yani ina qiqi me lai dabe e yasana.” (Caka. 8:31) Ena qiqi ni veitau, era dau duri tu ga na vodoka. Ia na qiqi e dau lako vakabalavu, e galala vinaka ni rau dabe vata na matanivanua kei Filipi.

Me salavata kei na ka e volai ena Cakacaka wase 8 kei na itukutuku makawa, e laurai ena noda ivola ena dua na gauna tiko ga qo ni vodo tiko na matanivanua ni Iciopea ena dua na qiqi e ka levu mai na qiqinivalu se qiqi ni veitau.