Taro na Dauwiliwili

Ni tukuni ena 2 Cesalonaika 3:14 me vakatakilakilataki e dua, vakacava mera cakava qori na qase ni ivavakoso se na dautukutuku yadua?

E vola na yapositolo o Paula vei ira na lotu vaKarisito e Cesalonaika: “Ke dua e sega ni talairawarawa ina neitou vosa e volai yani ena ivola qo, ni vakatakilakilataki koya.” (2 Ces. 3:14) Ena gauna sa oti, na idusidusi qori e baleti ira na qase ni ivavakoso. Ke dua e sega ni muria na ivakavuvuli vakaivolatabu ni sa vakasalataki oti vakavica, ena rawa ni dua nodratou ivunau ni veivakasalataki na qase ena ivavakoso. Ni oti qori, era na sega ni veimaliwai kei koya na dautukutuku yadua.

Ia e vinakati me veisau qori. Eda kila ena ivakasala i Paula, nira na cakava qori na lotu vaKarisito yadua ni vakatau ena so na ituvaki. E sega gona ni vinakati me dua nodratou ivunau ni veivakasalataki na qase. Na cava e veisau kina? Dikeva mada na ka e vakamacalataka tiko o Paula ena gauna e tukuna kina na ivakasala qori.

E tukuna o Paula nira tiko ena ivavakoso qori eso “e vakaveitalia tu na nodra bula.” Era sega ni via rogoca na ivakasala vakalou. Dua nona veisiko sa oti, e vakarota: “O koya e sega ni via cakacaka me kua ni kana.” Eso e rawa nira cakacaka me tokoni ira, ia era sega ga ni via cakava qori. Era dau siova tale ga na ka e sega ni nodra. Na cava mera cakava na lotu vaKarisito vei ira e vakaveitalia tu nodra bula?​—2 Ces. 3:​6, 10-12.

E kaya o Paula: “Ni vakatakilakilataki koya.” Na kena vosa vaKirisi e tiko kina na vakasama mo kilai koya, mo qarauna tale ga nona itovo ca. E tukuna o Paula na veidusimaki qo ena ivavakoso taucoko, sega ni baleti ira ga na qase. (2 Ces. 1:1; 3:6) Koya gona, na lotu vaKarisito yadua ena rairai kila e dua na tacina e talaidredre tiko ena ivakasala vakalou, ena vakatulewataka me “muduka [nona] veitokani vata kei koya” qori.

Vakacava, kena ibalebale ya mera okati koya me vaka ga e dua e biu tani mai na ivavakoso? Sega. E kaya tale o Paula: “Ni vakasalataki koya tiko ga me vaka ni tacimuni.” Koya gona, era na veimaliwai tiko ga kei koya na lotu vaKarisito yadua ena soqoni kei na cakacaka vakaitalatala. Ia era na vakatulewataka mera kua ni veimaliwai kei koya ena soqo se ka ni veivakamarautaki. Na vuna? E kaya o Paula: “Me madua kina.” Ni vakatakilakilataki va qori o koya e vakaveitalia tu nona bula, ena rairai maduataka nona ivalavala, ena rawa tale ga ni veisau.​—2 Ces. 3:​14, 15.

Eda na rairai muria vakacava na ivakasala qori na lotu vaKarisito ena gauna qo? Eda na via vakadeitaka mada ke “vakaveitalia” dina nona itovo me vaka e vakamacalataka o Paula. A sega ni tukuni ira tiko e duatani na ka era cakava ni yavutaki ena nodra lewaeloma se vakatulewa yadua. A sega tale ga ni tukuni ira tiko era vakamosia na lomada. E tukuni ira tiko ga era sa vakasalataki oti ena Vosa ni Kalou, ia era nakita tiko ga mera talaidredre.

Nikua, ke da kila e dua na tacida e vakaraitaka tiko na yalo ni talaidredrea va qori, eda na vakatulewataka yadua meda kua ni veimaliwai kei koya ena soqo se na ka ni veivakamarautaki. Me vaka ni noda vakatulewa yadua qori, eda na sega ni veivosakitaka kei ira eso tale era sega ni lewe ni noda vuvale. Ia eda na veimaliwai tiko ga kei koya ena soqoni kei na cakacaka vakaitalatala. Ni sa veisautaka nona rai kei na itovo, eda sa na qai veimaliwai tale kei koya.