Mera Vakaraitaka na Qase na Yalololoma

1. Na cava e rawa ni yaco ke valavala ca bibi e dua?

EDA vulica ena ulutaga sa oti na ka e cakava na yapositolo o Paula me vukei kina na tagane e valavala ca bibi e Korinica. A sega ni veivutuni na tagane qori, mani biu tani mai na ivavakoso. Ia me vaka e tukuni ena tikinivolatabu e yavutaki kina na vuli qo, ni rawa nira vukei eso era valavala ca bibi. E vinakata na Kalou mera veivutuni. (Roma 2:4) Sala cava era na veivuke kina na qase?

2-3. Na cava meda cakava ke da kila ni valavala ca bibi e dua na tacida? Na vuna?

² Ni bera nira veivuke na qase, e bibi mera kila mada na leqa. Ke da kila ni dua na tacida e cakava tiko na ivalavala ca bibi ena rawa ni biu tani kina mai na ivavakoso, na cava meda cakava? Meda uqeti koya me lai kere veivuke vei ratou na qase.​—Aisea 1:18; Caka. 20:28; 1 Pita 5:2.

³ Ia vakacava ke sega ni via lai tukutuku? E bibi meda lai tukuna vei ratou na qase me rawa ni vukei. Nida cakava qori, e vakaraitaka nida lomana na tacida, eda kila tale ga ni rawa nira vukei koya na qase. Ke sega ni veisau o koya e valavala ca bibi, ena vakaleqa sara ga nona veiwekani kei Jiova. Ena rawa tale ga ni vakarogorogocataka na ivavakoso. Eda na yaloqaqa gona meda cakava qori, nida lomani Jiova kei koya e valavala ca bibi.​—Same 27:14.

SALA ERA NA VEIVUKE KINA NA QASE

4. Na cava e nodra inaki na qase nira veivosaki kei koya e valavala ca bibi?

⁴ Ni valavala ca bibi e dua ena ivavakoso, ena digia na ilawalawa qase e tolu vei ratou na tagane matua me ratou kena komiti,a me ratou veivosaki kei na tacida qori. E bibi me ratou yalomalumalumu na tacida ratou digitaki. Eratou na saga me ratou vukei koya e cala me veivutuni, eratou kila tale ga ni sega ni rawa ni ratou vakasaurarataki koya me veisau. (Vkru. 30:19) Mera kila tiko na qase nira na sega ni veivutuni kece o ira na valavala ca bibi, me vakataki Tui Tevita. (2 Sam. 12:13) Eso era na rairai sega ni via rogoca na ivakasala i Jiova. (Vkte. 4:​6-8) Ia e nodra inaki ga na qase mera vukei koya e valavala ca bibi me veivutuni, ke rawa. Nira veivosaki kei koya e valavala ca bibi, na ivakavuvuli cava me dusimaki ira?

5. Na ivakasala cava mera nanuma tiko na qase nira veivosaki kei koya e valavala ca bibi? (2 Timoci 2:​24-26) (Raica tale ga na iyaloyalo.)

⁵ O ira na qase era na raici koya e valavala ca bibi me vaka na sipi talei, e lako sese. (Luke 15:​4, 6) Nira veivosaki kei na tacida qori, ena sega ni kaukaua nodra vosa kei na nodra ivalavala. Mera kua tale ga ni nanuma ni inaki ga ni nodra veivosaki, me tarogi na taro mera kila na dina ni itukutuku kece. Ia era na vakaraitaka na itovo e tiko ena 2 Timoci 2:​24-26. (Wilika.) Era na sega ni cudru, ia era na yalomalua, era yalovinaka tale ga nira saga tiko mera vukei koya e valavala ca bibi me veisautaka na lomana.

6. Ratou na vakarautaka vakacava na qase na lomadratou ni bera ni ratou veivosaki kei koya e valavala ca bibi? (Roma 2:4)

⁶ Mera vakarautaka na qase na lomadra. Era na saga mera vakatotomuria na yalovinaka i Jiova vei koya e valavala ca. Era vakasamataka tiko na ka e tukuna o Paula: “Ni yalovinaka tiko vei iko [na Kalou] ena nona vinakata mo veivutuni.” (Wilika Roma 2:4.) E bibi mera nanuma tiko na qase ni nodra itavi bibi mera vakatawa na qelenisipi ena veidusimaki i Karisito. (Aisea 11:​3, 4; Maciu 18:​18-20) Ni bera ni veivosaki na komiti kei koya e valavala ca bibi, me ratou masulaka nodratou inaki: ya me ratou vukei koya me veivutuni. Ratou na vakekeli ena Vosa ni Kalou kei na noda ivola vakaivolatabu, ratou na masu me vukei ratou o Jiova me ratou kila vinaka na tacida qori kei na ituvaki. Ratou na vakasamataka tale ga nona isususu ena rairai vakavuna me va kina ya nona rai kei na nona ivalavala.​—Vkai. 20:5.

7-8. Era na vakatotomuria vakacava na qase na vosovoso i Jiova nira veivosaki kei koya e valavala ca bibi?

⁷ Era na vakatotomuria na qase na vosovoso i Jiova. Era na vakasamataka nona sasaga me vukei ira era valavala ca bibi ena gauna sa oti. Kena ivakaraitaki, e vosovoso o Jiova vei Keni. E tukuna vua na ka ena yaco ke sega ni veisau, ia ena vakalougatataki koya ke talairawarawa. (Vkte. 4:​6, 7) E vakasalataki Tevita o Jiova ni tala na parofita o Necani. E tukuna o Necani e dua na vosa vakatautauvata e tara na lomana, mani veivutuni. (2 Sam. 12:​1-7) E “talai ira tiko ga” nona parofita o Jiova me vakasalataki ira “wasoma” na Isireli talaidredre. (Jere. 7:​24, 25) A sega ni waraka mera veivutuni me qai vukei ira. Ia nira se valavala ca tiko ga, e vakaliuliu o Jiova me vakamasuti ira mera veivutuni.

⁸ Era muria na qase na ivakaraitaki i Jiova nira saga mera vukei ira era valavala ca bibi. Era na vukei ira tiko ga me “salavata kei na [nodra] vosota vakadede,” me vaka e tukuni ena 2 Timoci 4:2. E vinakati gona me dau yalomalua na qase, me vosovoso tale ga ni vukei koya e valavala ca me cakava na ka dodonu. Ke cudru, ena sega ni rogoca na ivakasala o koya e valavala ca bibi, ena rairai sega tale ga ni via veivutuni.

9-10. Sala cava ratou na vukei koya kina e cala bibi na qase me vakasamataka na ka e cakava?

⁹ Era saga na qase mera kila na ituvaki e lai tini vakayacori kina na ivalavala ca. Kena ivakaraitaki, na cava e malumu kina vakayalo? Sa sega ni dau vuli vakataki koya se lako ena cakacaka vakavunau? Vakacava sa sega ni masu wasoma vei Jiova? Sa sega ni valuta na gagadre ca? O cei o ira nona ilala? Na ka ni veivakamarautaki cava e dau digia? E vakaleqa vakacava qori na lomana? Vakacava e kila ni vakararawataki Jiova nona vakatulewa kei na ka e cakava?

¹⁰ Ni ratou taroga qori na qase, eratou na takiva mai na lomana, ena vakasamataka tale ga na ka e vakaluluqataka nona veiwekani kei Jiova e tini valavala ca kina. Ia me caka ena yalovinaka, me ratou kua tale ga ni siova na ka e sega ni dodonu me ratou kila. (Vkai. 20:5) Rawa tale ga ni ratou vakayagataka na vosa vakatautauvata me vakasamataka na ka e cakava qai kila na vuna e cala kina, me vaka e cakava o Necani vei Tevita. De dua ena imatai ga ni nodratou veivosaki, ena rarawataka o koya e cala na ka e cakava. Ena rawa ni veivutuni.

11. E vukei ira vakacava na ivalavala ca o Jisu?

¹¹ Era saga na qase mera vakatotomuri Jisu. Ni vakaturi oti o Jisu, e vukei Saula na turaga ni Tarisu, e taroga vua e dua na taro vakavure vakasama: “I Saula, I Saula, na cava o vakacacani au tiko kina?” Nona cakava qori o Jisu, e rawa ni liaca kina o Saula ni cala na ka e cakava tiko. (Caka. 9:​3-6) E kaya tale ga o Jisu me baleta “na yalewa ya o Jesepeli”: “Au a solia vua na gauna me veivutuni.”​—Vkta. 2:​20, 21.

12-13. Sala cava ratou na solia kina na qase na gauna vei koya e valavala ca bibi me veivutuni? (Raica tale ga na iyaloyalo.)

¹² Nira vakatotomuri Jisu na qase, ena sega ni totolo nodra tukuna ni na sega ni veivutuni o koya e cala bibi. Eso era na rairai veivutuni ena imatai ni nodra veivosaki kei na komiti, eso tale ena rairai taura toka na gauna. E rawa gona ni ratou tuvanaka na qase me ratou veivosaki vakavica kei koya e cala bibi. De dua ni oti na imatai ni veivosaki, ena tekivu vakasamataka vakabibi o koya e cala na ka e tukuni vua. Ena rairai yalomalumalumu me torovi Jiova ena masu. (Same 32:5; 38:18) Koya gona, ena nodratou veivosaki tarava, ena rawa ni veisau nona rai ni vakatauvatani kei na imatai ni nodratou veivosaki.

¹³ Me rawa ni ratou vukei koya e valavala ca bibi na qase me veivutuni, e vinakati me ratou vakaraitaka na veikauaitaki kei na yalololoma. Eratou na masuti Jiova me vakalougatataka nodratou sasaga, ratou nuitaka tale ga ni na kilai yalona na tacida qori me veivutuni.​—2 Tim. 2:​25, 26.

14. O cei me vakavinavinakataki ni veivutuni o koya e valavala ca? Na vuna?

¹⁴ Ke veivutuni o koya e valavala ca, eda na marau vakalevu! (Luke 15:​7, 10) O cei me vakavinavinakataki kina? O ratou na qase? Rogoca mada na ka e vola o Paula me baleti ira na ivalavala ca: “De dua ena vakadonuya na Kalou mera veivutuni.” (2 Tim. 2:25) Koya gona, o Jiova ga e vukei koya na tacida qori me veisautaka nona rai kei na nona itovo, sega ni dua tale. E vakamacalataka o Paula na ka vinaka ena rawati ni dua e veivutuni. Ena rawa ni vulica kina e levu na kilaka dodonu me baleta na ka dina, ena kilai yalona tale, ena rawa ni dro tani mai na dai nei Setani.​—2 Tim. 2:26.

15. Sala cava ratou na rawa ni vukea tiko ga kina na qase e dua e sa veivutuni?

¹⁵ Ni veivutuni o koya e valavala ca bibi, ratou na sikovi koya tiko ga na qase me ratou vukei koya me valuta na dai nei Setani qai vakadodonutaka tiko ga na sala e muria na yava[na]. (Iper. 12:​12, 13) E macala ga ni ratou na sega ni veitukuniyaka na cala e cakava na tacida qori. Ia na cava ga ena rairai vinakati mera kila na lewe ni ivavakoso?

“VUNAUCI . . . E MATADRA KECE”

16. Me vaka e tukuni ena 1 Timoci 5:​20, o cei e vakaibalebaletaka o Paula ni tukuna e “matadra kece”?

¹⁶ Wilika 1 Timoci 5:20. E vola qori o Paula vua nona itokani qase ni ivavakoso o Timoci ena ka me cakava vei “ira na valavala ca tiko ga.” Cava e vakaibalebaletaka? Ni tukuna e “matadra kece,” a sega ni vakaibalebaletaki ira tiko na lewe ni ivavakoso kece. E dusia ga na lewe vica era rairai kila tiko na cala qori. Eso era raica sara ga, eso tale era rogoca vei koya e valavala ca bibi. Era na tukuna lo na qase vei ira qori ni sa qaravi na ka me baleti koya, e sa vakadodonutaki tale ga.

17. Ke sa kilai levu na ivalavala ca bibi, se kilai ni toso na gauna, na cava ena kacivaki ena ivavakoso? Na vuna?

¹⁷ Eso tale na ituvaki, ena rairai kilai levu na ivalavala ca bibi ena ivavakoso, se kilai ni toso na gauna. Ena ituvaki qori, “e matadra kece” e okati kina na lewe ni ivavakoso taucoko. Ena kacivaka gona na qase ena ivavakoso ni sa vunauci na tacida. Na vuna? E tukuna o Paula: “Mera rere kina na kena vo” mera kua ni valavala ca bibi.

18. Na cava mera cakava na qase ke valavala ca bibi e dua na gone sa papitaiso oti? (Raica tale ga na iyaloyalo.)

¹⁸ Vakacava ke ra valavala ca bibi na gone era sa papitaiso oti ia era se bera ni yabaki 18? Ena tuvanaka na ilawalawa qase e rua vei ratou me rau veivosaki kei na gone qori kei rau nona itubutubu lotu vaKarisito.b Rau na via kila na qase na ka rau sa cakava na itubutubu me vukei luvedrau me veivutuni. Ke muria o gone na nodrau ivakasala nona itubutubu qai veisautaka nona itovo, rau na rairai vakatulewataka na qase ni sega ni vinakati e dua na komiti ni qase. Ratou kila tale ga ni nodrau itavi lesi vakalou na itubutubu me rau vakadodonutaki luvedrau ena yalololoma. (Vkru. 6:​6, 7; Vkai. 6:20; 22:6; Efeso 6:​2-4) Ena tiko na gauna rau na raici rau na itubutubu na qase, me rau vakadeitaka ni sa vukei tiko na gone qori. Ia vakacava ke valavala ca bibi tiko ga qai sega ni veivutuni? Ena ituvaki qori ena veivosaki na komiti ni qase kei gone, vaka kina o rau nona itubutubu lotu vaKarisito.

“O JIOVA [E] DAU VEIKAUAITAKI QAI DAU YALOLOLOMA”

19. Era na vakatotomuri Jiova vakacava na qase nira vukea tiko e dua e valavala ca bibi?

¹⁹ E nodratou itavi bibi na komiti ni qase ena mata i Jiova me ratou raica me savasava tiko ga na ivavakoso. (1 Kor. 5:7) Eratou vinakata tale ga me veivutuni o koya e valavala ca bibi, ke rawa. Ni ratou vukei koya tiko, eratou vakanuinui tale tiko ga ni na veisau. Na vuna? Eratou vinakata me ratou vakatotomuri Jiova ni “dau veikauaitaki qai dau yalololoma.” (Jeme. 5:11) Dikeva mada nona vakaraitaka na itovo qori na yapositolo sa kenaturaga o Joni. E vola: “Kemuni na luvequ, au vola tiko yani vei kemuni na ka kece qo moni kua kina ni valavala ca. Ia ke mani valavala ca e dua, sa tiko vata kei Tamada e dua na noda dauveivuke, o Jisu Karisito, o koya na yalododonu.”​—1 Joni 2:1.

20. Na cava eda na veivosakitaka ena iotioti ni ulutaga?

²⁰ Ka ni rarawa, eso na gauna ena sega ni via veivutuni e dua na lotu vaKarisito. Ke dina qori, ena biu tani mai na ivavakoso. Na cava mera cakava na qase ke sega ni veivutunitaka e dua nona ivalavala ca bibi? Eda na veivosakitaka qori ena iotioti ni ulutaga.