Timotee no faalanoo wallude yimɓe

Timotee hari ko suka weltinooɗo wallugol yimɓe. O yahuno nokkeeli buy fii wallugol yimɓe. Sabu ɗun, o heɓuno weltaare e nder ngurndan makko ɗan. Hiɗon faalaa anndude fii makko ? —

Timotee ko e saare inneteende Listaara o njanɗi. Fewndo ko o wonunoo paykun, pati makko Lowiisi e neene makko Eniisi, fuɗɗino mo jannude fii Yahuwah. Ko o njanɗaynoo, himo faalanoo wallugol woɓɓe goo ɓe annda Yahuwah.

Ko o woni suka, Puulusa yeetino mo yo ɓe yaadu, ɓe waajoda e nokkeeli goo. Timotee wi’i : « Awa ! » Hari himo hebili yahugol walla woɓɓe goo.

Timotee yaaduno e Puulusa e saare inneteende Masedonii e nder Tesalonii. Fii yahugol ton, ɓe seppuno ko woɗi ontuma ɓe ƴetti laana. Ɓayri ɓe hewtii ton, ɓe walluno yimɓe buy anndugol Yahuwah. Kono woɓɓe e maɓɓe hari no monanii ɓe e no faalanoo waɗude ɓe ko boni. Ko sabu ɗun Puulusa e Timotee iwunoo ton ɓe yaari nokkuure goo fii waajagol.

Leɓɓi seeɗa feƴƴi, Puulusa yeeti Timotee yo o yilto Tesalonii, o ndartoya musiɓɓe maɓɓe ɓen. Himo haanunoo wondude e cuucal fii yiltitagol e nden saare bonnde. Kono Timotee yahuno ɓayri himo aanannoo musiɓɓe makko wonunooɓe ton ɓen. O artuno o yewti Puulusa piiji moƴƴuɗi. Musiɓɓe ɓen Tesalonii hari hiɓe e jam !

Timotee golluduno e Puulusa duuɓi buy. Ɲannde goo Puulusa winnduno ko Timotee o haanunoo nulude fii wallitagol mofte ɗen. Timotee wallitino mofte ɗen. Timotee no yiɗunoo Yahuwah.

Hiɗon yiɗi yimɓe e hiɗon faalaa wallude ɓe, ɓe annda Yahuwah ? — Si on waɗii ɗun, on heɓay weltaare e nder ngurndan mon ɗan wano Timotee !