Ɓe winnduno fii annabi Iisaa

On yi’ii ɓee worɓe e oo fotoo ɗoo ? — Ko Matta, Markuusa, Luuka, Yuuhanna, Petruusu, Yaquuba, Yuudu e Puulusa. Ɓe fow ɓe wuuruno e saa’i annabi Iisaa on e ɓe winnduno fii annabi Iisaa. Etoɗen annden fii maɓɓe.

Tato e maɓɓe hari ko sahaabaaɓe. Ɓe waajoduno e annabi Iisaa. Hiɗon anndi ɓe ? — Matta, Yuuhanna e Petruusu. Matta e Yuuhanna no anndunoo annabi Iisaa moƴƴa e mo kala e maɓɓe winnduno deftere fii ngurndan annabi Iisaa ɗan. Yuuhanna winnduno kadi deftere inneteende Feɲɲinannde e ɓataaki tati noddaaɗi Yuuhanna arano, Yuuhanna ɗimmo e Yuuhanna tammo. Petruusu winndi ɓataaki ɗiɗi wonɗi ka nder Deftere Allah, hiɗi noddaa Petruusu arano e Petruusu ɗimmo. Ka nder ɓataakuru ɗimmuru, Petruusu winnduno fii ko Yahuwah daalunoo kon fii annabi Iisaa gila ka kammu. Yahuwah daali : « Oo ɗoo ko ɓiɗɗo an. Hilan yiɗi mo, e hilan weltori mo. »

Ɓee hediiɓe ka fotoo, kamɓe kadi ɓe winnduno piiji ko jannata en fii ngurndan annabi Iisaa ɗan. Goɗɗo e maɓɓe ko Markuusa. Ko annabi Iisaa nangaa hari himo ton. O yi’uno ko feƴƴunoo ton kon fow. Goɗɗo goo kadi ko Luuka o innetenoo. Hari ko o ɲawndoowo yimɓe. No gasa ko annabi Iisaa maayi, o wonti Almasiiyaajo.

Ɗiɗo e ɓee ɓe yi’oton ka fotoo ko minɲiraaɓe annabi Iisaa. Kamɓe kadi ɓe tawano e winndugol Deftere Allah nden. Hiɗon anndi inɗe maɓɓe ɗen ? — Inɗe maɓɓe ɗen ko Yaquuba e Yuudu. Hari ɓe hoolanooki annabi Iisaa. Ɓe sikkuno hay o feetii. Kono ɓawto ɗun, ɓe hoolino mo, ɓe wonti Almasiiyaaɓe.

Oo wonɗo ka tummbo fotoo ley, ko Puulusa o innetee. Kanko kadi o tawano e winndugol Deftere Allah nden. Ado yo o wonude Almasiiyaajo, ko Saawulu o innetenoo. O aɲuno Almasiiyaaɓe ɓen o hunƴani ɓe. Hiɗon anndi honɗun walli Puulusa faalaa wonugol Almasiiyaajo ? — Ɲannde goo, Puulusa hari no yahude e safaari. Ka hoore laawol, o nani hito goɗɗo ka kammu no yewta mo. Hari ko annabi Iisaa. O lanndii Puulusa : « Fii honɗun hiɗa hunƴani hooliɓe lan ɓe ? » Ɓawto ɗun, Puulusa wonti Almasiiyaajo. Puulusa winndi defte 14 cewɗe Deftere Allah nden, fuɗɗaade e Roomu haa e Yahuudiyankeeɓe.

Hiɗen janngude Deftere Allah nden ɲannde woo ɲannde, kaa ? — Si en janngii Deftere Allah nden, en annday piiji buy fii annabi Iisaa. On faalete ɓeydude janngugol fii annabi Iisaa ? —