Gunndoo weltinay ngol en

Goɗɗo yewtii on gunndoo ? — a Deftere Allah nden no yewti fii gunndoo hertiingol noddaa ngol « gunndoo horminaangol ». Ko horminaangol ɓayri ko ka Allah ngol iwri. E hingol noddaa gunndoo ɓayri hari yimɓe ɓen anndaano fii mun. Hay malaa’ikaaɓe ɓen faalano anndude ngol gunndoo. Hiɗon faalaa anndude ko woni ngol gunndoo ? —

Ka fuɗɗoode, Allah taguno gorko arano on e debbo arano on. Inɗe maɓɓe ɗen ko baaba Aadama e neene Hawaa. Allah okkuno ɓe nokkuure fotunde inneteende tutateeri Adni. Si baaba Aadama e neene Hawaa ɗoftino Allah, kamɓe e ɓiɓɓe maɓɓe ɓen waɗayno aduna on fow aljanna wano tutateeri Adni. Ɓe waawayno wuurude ka Aljanna haa poomaa. Kono on waaway annditude ko baaba Aadama e neene Hawaa waɗunoo kon ? —

Baaba Aadama e neene Hawaa yedduno Allah, ko ɗun waɗi hannde en alaa ka aljanna. Kono Allah daaluno o moƴƴintinay aduna on fota e mo kala heɓoyay ngurndan poomayankeejan e welo welo. Ko honno o waɗiroyta ɗun ? Gila neeɓii, yimɓe ɓen anndaano fii mun. Hari ko gunndoo.

Ko annabi Iisaa ari e oo aduna, o jannuno yimɓe ɓen fii ngol gunndoo. O wi’uno ko fii Laamu Allah ngun. Annabi Iisaa innuno yimɓe ɓen yo ɓe toro fii yo Laamu Allah ngun aru. Ko ngun Laamu wattoyta aduna on aljanna fotuɗo.

Hiɗon weltii fii anndugol ngol gunndoo ? — Annditee ko ɗoftiiɓe Yahuwah ɓen tun wuuroyta ka aljanna. Deftere Allah nden no sifii taariikaaji buy fii worɓe e rewɓe ɗoftinooɓe Yahuwah. Hiɗon faalaa anndude fii maɓɓe ? — Etoɗen annden fii woɓɓe e maɓɓe e ndaaren honno waɗirten wano no ɓe waɗirnoo non.