Yosiiya no marunoo njaatigiiɓe moƴƴuɓe

Hiɗon sikkude waɗugol ko moƴƴi no metti fii ? — Buy no sikkiri non. Deftere Allah nden wi’i hari no sattani suka innetenooɗo Yosiiya waɗugol ko moƴƴi. Kono himo marunoo njaatigiiɓe moƴƴuɓe wallunooɓe mo. Etoɗen annden fii Yosiiya e njaatigiiɓe makko ɓen.

Ko Amon lanɗo Yuudu on, wonunoo baaben Yosiiya. Amon hari no boni haa feƴƴiti. Ko sanamuuji o rewaynoo. Ɓayri o maayi, Yosiiya ɓiɗɗo makko on lontii mo, o woni lanɗo yuudu on. Kono hari ko mo o duuɓi jeetati ! Hiɗon sikkude himo bonunoo wa baaben makko ? — Oo’o, o bonaano.

Hay fewndo ko o wonunoo paykun, Yosiiya no faalano ɗoftaade Yahuwah. Ko ɗun waɗi, o suɓii njaatigiiɓe yiɗuɓe Yahuwah. Ɓe walluno Yosiiya waɗugol ko moƴƴi. Ko homɓe wonunoo woɓɓe e maɓɓe ?

Goɗɗo e maɓɓe ko Safaniiya innetenoo. Safaniiya hari ko o annabaajo waajinooɗo yimɓe leydi Yuudu ɓen. O wi’i ko boni heɓay ɓe si ɓe accaali rewugol sanamuuji. Yosiiya jentino Safaniiya, o rewi Yahuwah. O rewaari sanamuuji.

Njaatigiijo makko goo, ko Yeremiiyah innetenoo. Fayda hari hiɓe fota duuɓi kanko e Yosiiya, e ko nokkun gootun ɓe wonunoo. Ko kamɓe njanɗidi. Ko Yosiiya maayi, Yeremiiya winnduno jaaroore, o jaarani mo hakkee ko ɓe weldunoo. Yeremiiya e Yosiiya, mo kala e maɓɓe walluno oya fii waɗugol ko moƴƴi e fii ɗoftagol Yahuwah.

Ko honɗun misal Yosiiya ngal janni on ? — Hay fewndo ko Yosiiya wonunoo paykun, himo faalanoo waɗugol ko moƴƴi. Himo anndunoo himo haanunoo heɓude njaatigiiɓe yiɗuɓe Yahuwah. Wattanee yila suɓoɗon njaatigiiɓe yiɗuɓe Yahuwah e wallooɓe on waɗugol ko moƴƴi !