Íseáia
38 Sna laethanta sin, buaileadh Hiziciá tinn agus bhí sé le bás. Tháinig an fáidh Íseáia mac Ámóz chuige agus dúirt leis: “Seo mar a deir an Tiarna: Déan do thiomna le do theaghlach, mar tá an bás agat; níl téarnamh i ndán duit.” 2 D’iompaigh Hiziciá a aghaidh ar an mballa agus chuir sé suas an phaidir seo chuig an Tiarna: 3 “Uch, a Thiarna, cuimhnigh, impím ort, mar a d’iompair mé mé féin i d’fhianaise le dílseacht agus faoi chroí mór maith, agus an rud a bhí maith i do shúile á dhéanamh agam.” Agus chaoin sé uisce a chinn.
4 Ansin ligeadh briathar an Tiarna le hÍseáia: 5 “Gabh agus abair le Hiziciá: Seo mar a deir an Tiarna, Dia Dháiví do shinsear: Tá d’urnaí cloiste agam agus do dheora feicthe agam. Tá mé chun tú a leigheas; faoi chionn trí lá, rachaidh tú suas go Teampall an Tiarna. Cuirfidh mé cúig bliana déag le do shaol. 6 Scaoilfidh mé saor thú as láimh rí na hAsaíre, agus déanfaidh mé an chathair seo a chumhdach.” 7 D’fhreagair Íseáia: “Seo duit ón Tiarna an comhartha go ndéanfaidh sé an rud a dúirt sé. 8 Bí ag coimhéad scáth na gréine ar chéimeanna Áchaz, tabharfaidh mé air filleadh deich gcéimeanna ar ais.” Agus d’fhill an ghrian ar ais na deich gcéimeanna a bhí sí tar éis a dhul síos.
9 Duan Hiziciá, rí, Iúdá, ar ócáid a leigheasta ón ngalar a bhí air.
10 Bhí mé á rá: i mbláth mo mhaitheasa
ní foláir dom imeacht liom
go geataí Seól síos; is ann a choinneofar mé
ar feadh a bhfanann agam de bhlianta.
11 Bhí mé á rá: Ní fheicfidh mé an Tiarna níos mó
i dtír na mbeo,
ní fheicfidh mé a thuilleadh
aon duine de mhuintir an tsaoil seo.
12 Tá m’áit chónaithe bainte dhíom,
tá sí stoite ar nós an phubaill a bhíonn ag aoirí;
mar a dhéanfadh fíodóir, tá mo shaol cornta suas agat,
agus tú ar tí an uige a ghearradh.
Ó mhaidin go faoithin tá tú do mo thabhairt chun críche,
13 agus mé ag screadaíl ansin go teacht na maidine;
tá mo chnámha ina gconamar, mar bhrisfeadh leon iad,
ó mhaidin go faoithin tá tú do mo thabhairt chun críche.
14 Mar a bheadh fáinleog ann, tá mé ag bíogarnach,
tá mé ag olagón ar nós colúir;
tá mo shúile á n-iompú agam i dtreo na n-ard,
amharc i mo dhiaidh agus bí i d’urra agam.
15 Cad is féidir liom a rá, ná a chaitheamh suas leis an Tiarna,
ó tharla gurb é féin a rinne an beart seo;
beidh mé ag fánaíocht romham an dá lá a mhairfidh mé,
agus m’anam go goirt ionam istigh.
16 Ach, a Thiarna, ina dhiaidh sin beidh m’anam beo i do chuideachta;
is tú a thabharfaidh suaimhneas do mo spiorad.
Beidh fáil ar théarnamh agam agus fadú saoil.
17 Óir an donas seo, tá sé á chlaochlú ina shéan;
is tú a shábháil mé ar dhuibheagán an neamhní,
óir chaith tú ar do chúla mo pheacaí go léir.
18 Ní thugann Seól moladh duit,
ní féidir don Bhás tú a cheiliúradh;
an dream a théann síos sa duibheagán,
níl dóchas acu as do dhílseacht níos mó.
19 An beo, an beo amháin a cheiliúrann thú,
mar a dhéanaim féin inniu.
Athair mé ag meabhrú do dhílseachta dá chlann.
20 Tá an Tiarna i ngar chun mé a shábháil;
mar sin seinnfimid ceol molta ar théada
laethanta uile ár saoil os comhair Theampall an Tiarna.
21 Dúirt Íseáia: “Cuirigí ceirín figí ar an neascóid agus tiocfaidh biseach air.” 22 Dúirt Hiziciá: “Cén comhartha a bheidh agam go rachaidh mé suas go Teampall an Tiarna?”