Chuaigh spiairí Iosraeilíteacha go dtí cathair Ireachó agus d’fhan siad in éineacht le bean darbh ainm Rácháb. Fuair rí Ireachó amach fúthu agus chuir sé saighdiúirí go dtí Rácháb. Chuir sí na spiairí i bhfolach ar dhíon an tí agus chuir sí na saighdiúirí an treo mícheart. Dúirt sí leis na spiairí: ‘Cabhróidh mé libh mar tá a fhios agam go bhfuil Iehova libh agus go bhfuil sibh chun an tír a ghabháil. Geallaigí dom, más é bhur dtoil é, go sábhálfaidh sibh mo theaghlach.’

Dúirt na spiairí le Rácháb: ‘Geallfaidh muid duit nach ngortófar aon duine a bheidh istigh i do theach.’ Dúirt siad: ‘Ceangail rópa dearg i d’fhuinneog agus tiocfaidh do theaghlach slán.’

Lig Rácháb síos na spiairí ar rópa óna fuinneog. Chuaigh siad go dtí na sléibhte agus d’fhan siad i bhfolach ansin ar feadh trí lá sula ndeachaigh siad ar ais go dtí Iósua. Ansin chuaigh na hIosraeilítigh trasna Abhainn na hIordáine agus fuair siad réidh le haghaidh an tír a ghabháil. Ba é Ireachó an chéad chathair a chloígh siad. Dúirt Iehova leo máirseáil timpeall na cathrach uair in aghaidh an lae ar feadh sé lá. Ar an seachtú lá mháirseáil siad timpeall na cathrach seacht n-uaire. Ansin shéid na sagairt a dtrumpaí agus bhéic na saighdiúirí in ard a gcinn. Thit ballaí na cathrach go talamh! Ach d’fhan teach Rácháb, a bhí tógtha ar an mballa, ina sheasamh. Tháinig Rácháb agus a teaghlach slán mar chuir sí a muinín in Iehova.

Scaip an scéal faoi Ireachó i measc na náisiúin eile i gCanán. Bheartaigh a gcuid ríthe teacht le chéile agus troid in aghaidh na nIosraeilíteach. Ach bhí plean eile ag na Gibeónaigh. Chuaigh siad go dtí Iósua agus iad gléasta i seanéadaí caite, agus dúirt siad leis: ‘Is ó thír i bhfad i gcéin a tháinig muid. Chuala muid faoi Iehova agus faoin méid a rinne sé daoibh san Éigipt agus i Móáb. Geall dúinn nach n-ionsóidh sibh muid agus beidh muid mar shearbhóntaí agaibh.’

Chreid Iósua iad agus gheall sé dóibh nach n-ionsódh sé iad. Trí lá ina dhiaidh sin, fuair sé amach nárbh as tír i bhfad i gcéin iad, ach as tír Chanán. D’fhiafraigh Iósua de na Gibeónaigh: ‘Cén fáth ar inis sibh bréag dúinn?’ D’fhreagair siad: ‘Bhí eagla orainn! Tá a fhios againn go bhfuil Iehova bhur nDia ag troid ar bhur son. Ná maraigh muid, más é do thoil é.’ Choinnigh Iósua a ghealltanas agus níor mharaigh sé iad.

Ní raibh sé i bhfad gur thosaigh cúigear ríthe Canánacha agus a n-arm ag bagairt ar na Gibeónaigh. Mháirseáil Iósua agus a arm ar feadh na hoíche chun teacht i gcabhair orthu. Thosaigh an troid go luath an mhaidin dar gcionn. Theith na Canánaigh i ngach treo. Scaoil Iehova clocha móra sneachta anuas sa mullach orthu. Ansin d’iarr Iósua ar Iehova go seasfadh an ghrian sa spéir. Cén fáth a n-iarrfadh sé é sin ar Iehova, nuair nár sheas an ghrian sa spéir riamh cheana? Mar bhí muinín aige as Iehova. Ní dheachaigh an ghrian faoi ar feadh lá iomlán go dtí go raibh na ríthe Canánacha agus a n-arm cloíte ag na hIosraeilítigh.