Ani Nyɛ Asafo lɛ Maŋtsɛyeli Asa lɛ Sa?
1 Ni wɔɔkpe kutuu koni wɔnine ashɛ nitsɔɔmɔ nɔ kɛjɛ wɔ Tsɔɔlɔ Kpeteŋkpele, Yehowa ŋɔɔ lɛ efee anɔkwa jamɔ he kadimɔ nii. Yehowa kɛɛ egbalɔ Mose akɛ: “Buamɔ maŋ lɛ naa oha mi, ni maha amɛnu miwiemɔi lɛ, ni amɛkɛkase migbeyeishemɔ gbii abɔ fɛɛ ni amɛyɔɔ jeŋ lɛ, ni amɛŋɔtsɔɔ amɛbii lɛ hu.” (5 Mose 4:10) Yɛ yiŋtoo ni ji akɛ nine ashɛ nitsɔɔmɔ nɔ daa hewɔ lɛ, Yehowa fa koni ama kpeebuu ko ni no afee anɔkwa jamɔ shihemɔ he yɛ Israel maŋ lɛ mli. Afɔ nine atsɛ mɔ fɛɛ mɔ koni ekɛ eheloonaa nibii lɛ eko aye abua koni ekɛ shika afi tsumaa he nitsumɔ lɛ sɛɛ.
2 Gbɔmɛi lɛ here nɔ waa diɛŋtsɛ. Nɔ ni jɛ mli ba ji: akɛ shika babaoo ye bua, ni efa kwraa fe bɔ ni ataoɔ. Nɔ ni sa kadimɔ ji akɛ mɛi ni amɛtsui tsirɛ amɛ koni amɛfee nakai lɛ ji mɛi ni kɛ shika ye bua. Nɔ ni aŋma afɔ shi lɛ kɛɔ wɔ akɛ “amɛtsuiŋ ta amɛ,” “[amɛ]na he tsui.” Hɛɛ, kpeebuu lɛ maa ni amɛkɛ shika aaaye abua lɛ ji Yehowa mli hemɔkɛyeli ni amɛyɔɔ lɛ kpojiemɔ, nɔ ni amɛkɛtsɔɔ bɔ ni amɛtsui kpakpa lɛ ji ha kɛ bɔ ni amɛfiɔ anɔkwa jamɔ sɛɛ amɛhaa.—2 Mose 35:20-29; 36:4-7.
3 Ŋmɛnɛ hu, Yehowa webii kɛ miishɛɛ tsuɔ too koni akɛma kpeehei koni akwɛ nɔ jogbaŋŋ koni akɛfi anɔkwa jamɔ sɛɛ. Mɛɛ jɔɔmɔ eji nɛkɛ akɛ aaana mɛi ni amɛyifalɛ yaa hiɛ ni bafataa wɔhe yɛ jamɔ mli yɛ ‘Yehowa gɔŋ lɛ nɔ lɛ, ejaakɛ, amɛ hu amɛmiisumɔ ni etsɔɔ amɛ nii ni amɛnyiɛ egbɛi lɛ anɔ.’ (Yes. 2:3) No hewɔ lɛ, Maŋtsɛyeli Asai tsuɔ gbɛfaŋnɔ ko ni he hiaa he nii yɛ anɔkwa jamɔ shweremɔ mli, ejaakɛ nomɛi ji kpeehei pɔtɛɛ ni Yehowa webii kɛtsuɔ nii koni amɛnine ashɛ nitsɔɔmɔ nɔ kɛjɛ Eŋɔɔ.
4 Nɔ ni Ataoɔ lɛ he Miihia Waa: Eyɛ miishɛɛ akɛ aaana akɛ Yehowa jɔɔmɔ yɛ wɔ nitsumɔ lɛ nɔ yɛ maŋ nɛɛŋ kɛ jeŋ muu fɛɛ hu. Yehowa etee nɔ ‘ewo’ nitsumɔ lɛ ‘foi’ ni eha eshwere. Wɔkɛ asafoi 722 je 1995 sɔɔmɔ afi lɛ shishi yɛ Ghana, ni ji ekomekomei 49 ni ebagbe nyɛsɛɛ afi lɛ yibɔ lɛ yi. Ŋwanejee ko bɛ he akɛ, akɛni asafoi lɛ ayifalɛ nɛɛ yaa hiɛ daa hewɔ lɛ, Maŋtsɛyeli Asai babaoo he miihia.
5 Shi kɛlɛ, Maŋtsɛyeli Asa ni amaa yɛ maŋ nɛɛ mli lɛ shɛɛɛ asafoi heei ni atseɔ lɛ. Maŋtsɛyeli Asai pii yɛ ni asafoi ni fa fe ekome kpeɔ yɛ mli. Yɛ maji wuji amli lɛ, asafoi aaafee enumɔ loo ekpaa kpeɔ yɛ Maŋtsɛyeli Asa kome nɔ. Hei fioo komɛi yɛ ni asafoi lɛ bɛ hei ni amɛkpeɔ yɛ po ni amɛbaanyɛ amɛtsɛ lɛ akɛ amɛ diɛŋtsɛ amɛnɔ̃. Yɛ anɔkwale mli lɛ, Maŋtsɛyeli Asai babaoo ni he hiaa koni akɛtsu mɛi ayifalɛ ahe nii bianɛ kɛ wɔsɛɛ be mli hu lɛ ji maŋ muu lɛ fɛɛ mli naagba ko ni ehe miihia ni wɔkɛ hiɛdɔɔ asusu he.
6 Tsuwoo Ŋtayaai: Yɛ maŋ nɛɛ mli lɛ, nibii ni fiteɔ shika fe fɛɛ yɛ Maŋtsɛyeli Asa ni amaa lɛ mli lɛ ateŋ ekome ji tsu lɛ woo. No hewɔ lɛ, Asafo lɛ eje tsuwoo ŋtayaai afeemɔ shishi yɛ Betel, koni ekɛba shikafitemɔ lɛ shi koni no aha anyɛ akɛ oyaiyeli amamɔ Maŋtsɛyeli Asai babaoo. Tsuwoo ŋtayaai ajara waaa, kɛji akɛto tsuwoo nibii krokomɛi ahe lɛ. Etsɛɔ waa ni hulu dɔlɛ nyɛɛɛ atsɔ mli, ni ehaa asa lɛ nɔ jɔɔ bɔ ni haa mɔ he jɔɔ lɛ yɛ wɔ kɔɔyɔŋ tsakemɔ be ni mli edɔ lɛ mli.
7 Nine baanyɛ ashɛ ŋtayaai lɛ anɔ kɛtsɔ ehemɔ nɔ nɔŋŋ, ni akɛ Asafo lɛ tsɔne baaloo kɛya koni eyajie yɛ tsumaa he lɛ. Asafoi komɛi ni yɔɔ he miishɛɛ akɛ, amɛkɛ ŋtayaai aaawo tsu lɛ, ni amɛhiɛɛɛ shika lɛ kɛ hegbɛ ni Asafo Maŋtsɛyeli Asa Shika lɛ kɛhaa lɛ tsu nii ni amɛkɛbi shikafaa. Beni akpɛlɛ gbɛbimɔ woji lɛ anɔ lɛ, yɛ nɔ najiaŋ ni amɛnine aaashɛ shika moŋ nɔ lɛ, akɛ tsuwoo ŋtayaai yaha amɛ. Enɛ eha efee mlɛo kɛha nyɛmimɛi lɛ akɛ amɛaawo amɛ asa lɛ kɛ ŋtayaai koni, amɛna amɛkpeei lɛ amli ŋɔɔmɔ yɛ be mli ni amɛyaa nɔ amɛtsuɔ nii waa koni amɛkɛgbe fãi ni eshwɛ lɛ anaa lɛ.
8 Bɔni afee ni anyɛ akɛ tsuwoo ŋtayaai lɛ afili lɛ, esa akɛ asafoi ni yɔɔ maji wuji amli lɛ aná wolo (indenture) kpakpa ni akɛwo mla shishi ni tsɔɔ akɛ shikpɔŋ lɛ ji amɛnɔ̃ yɛ gbɛ ni ja nɔ, ána tsumaa he wolo ni akpɛlɛ nɔ kɛ tsumaa he gbɛŋmɛɛ wolo kpakpa. Esa akɛ asafoi ni yɔɔ akrowai amli yɛ hei ni ekolɛ ebaawa akɛ aaana tsumaa he wolo ni akpɛlɛ nɔ kɛ tsumaa gbɛŋmɛɛ he wolo lɛ aha akrowa lɛ maŋtsɛ lɛ kɛ ewaonaa gbɛi awo wolo ko shishi loo ni eye he odase ni district assembly lɛ kɛ stamp ashi tsumaa he wolo lɛ nɔ.
9 Asafo ni ekolɛ amɛmiisumɔ tsuwoo ŋtayaai lɛ eko kɛha amɛ Maŋtsɛyeli Asa lɛ aha Asafo lɛ ale enɛ kɛ eshwɛ fioo ni amɛbaashɛ tsu lɛ woo mli. Kɛ agbe ŋtayaai lɛ namɔ lɛ he sanegbaa naa lɛ, Asafo lɛ tsumaa kuu lɛ mlinyo ko baayakwɛ tsumaa he lɛ ni etsɔɔ bɔ ni esa akɛ ato tsu lɛ nɔ koji lɛ kɛ tsei ni akɛbelebelei mli yɛ tsu lɛ nɔ lɛ he gbɛjianɔ jogbaŋŋ aha, dani nine ashɛ tsuwoo ŋtayaai lɛ anɔ.
10 Ni Akɛ Shika Aaaye Abua: Ani nyɛ asafo lɛ yɛ Maŋtsɛyeli Asa? Ani ayiɔ mli obɔ aahu akɛ mɛi shwɛɔ yɛ sɛɛ be fɛɛ be, ni ani ato gbɛjianɔ kɛha emli gbelemɔ loo kɛha ehee kwraa maa? Ehe miihia ni wɔkɛ shika babaoo afi gbɛjianɔ ni tamɔ nɛkɛ ni atoɔ lɛ sɛɛ, taakɛ eji yɛ Israel maŋ lɛ he lɛ. Kɛ asafo ko aaakpɛ eyiŋ akɛ ekɛ ŋtayaai aaawo tsu lɛ loo ekɛ nibii krokomɛi baawo lɛ, nɔ ni he hiaa ji ni wɔɔna tsuii ni tsirɛɔ wɔ koni ekanya wɔ ni wɔkɛ wɔhe kɛ wɔ nibii afi Maŋtsɛyeli Asa lɛ maa kɛ enɔkwɛmɔ jogbaŋŋ lɛ sɛɛ. Mɛi komɛi ena akɛ eyeɔ ebuaa kɛ aanyiɛ nɔkwɛmɔ nɔ ni atsɔɔ yɛ 1 Korintobii 16:2 lɛ sɛɛ, ni amɛkɛ amɛ shika toɔ daa koni amɛkɛye amɛbua Maŋtsɛyeli Asa he tsumaa nitsumɔ lɛ. Mɛi krokomɛi ni baanyɛ amɛkɛ shika afa asafo lɛ enyɛ amɛkɛ shika ni ehe ebahiaŋ amɛ bianɛ lɛ efa, ni enɛ eye ebua waa yɛ nibii ajara ni yaa hiɛ lɛ hewɔ.
11 Yɛ hei ni asafoi babaoo kpeɔ yɛ Maŋtsɛyeli Asa lɛ nɔ lɛ, esa akɛ ehee ni aaama lɛ akɔ mɔ fɛɛ mɔ he. Esaaa akɛ ebaa lɛ akɛ asafo kome yɛ asa, ni eeebu asa hee ni aaana lɛ akɛ asafoi ni eshwɛ lɛ anaagba. Ekome ni amɛ fɛɛ amɛaafee lɛ he baahia waa yɛ ehee ni aaama lɛ mli. Jeee Maŋtsɛyeli sanekpakpa lɛ shiɛmɔ pɛ eha Yehowa webii lɛ bɛ deka ŋmɛnɛ lɛ, shi amɛbɛ deka yɛ jamɔ héi kpakpai ni amɛaatao lɛ hu mli. Maŋtsɛyeli Asai ahe miihia bianɛ fe be fɛɛ. Ani obaatsu ogbɛfaŋnɔ koni okɛtsu hiamɔ lɛ he nii?—Okɛto Maleaki 3:10 he.
[Mfoniri kɛ ehe niŋmaa ni yɔɔ baafa 4]
Maŋtsɛyeli Asai Komɛi ni akɛ Ŋtayaai Ewo
Kwashieman North
Sempe Manprobi
Sogakorpe