Sanebimɔ He

◼ Namɔ abaanyɛ aha ekane kukuji lɛ yɛ Asafo Woloŋ Nikasemɔ kɛ Buu-Mɔɔ Nikasemɔ mli?

Wɔ Maŋtsɛyeli Sɔɔmɔ ni je kpo yɛ November 1977 kɛ October 1980 lɛ wie mɛi ni sa akɛ nikanelɔi lɛ ahe. Akɛ nyɛmimɛi ni abaptisi amɛ tsuɔ nii kɛ eko yɛ. Esa akɛ ahala amɛ kɛjɛ onukpai, asafoŋ sɔɔlɔi, kɛ asafo lɛ mli nyɛmimɛi hii krokomɛi ni abaptisi amɛ, ni he esa lɛ ateŋ. Esa akɛ mɛi ni ahalaa amɛ lɛ afee mɛi ni le nikanemɔ jogbaŋŋ, kɛ henumɔ kpakpa kɛ gbee ni sa. Esa akɛ amɛfee mɛi ni yɔɔ ekaa ni amɛjieɔ wiemɔ mli sui ni atsɔɔ yɛ Theocratic Ministry School Guidebook, yitso 6 lɛ mli lɛ kpo. (Okɛto Nehemia 8:8 he.) Esa akɛ amɛfee mɛi ni feɔ nɔkwɛmɔ nɔ kpakpa yɛ jeŋba mli hu.

Akɛni woloŋ nikasemɔ lɛ edaaa tamɔ asafoŋ kpeei krokomɛi lɛ hewɔ lɛ, jeee be fɛɛ be ekolɛ abaana nyɛminuu ni sa, ni abaptisi lɛ ni ekane. Yɛ shihilɛi ni tamɔ nɛkɛ mli lɛ, nikasemɔ nɔkwɛlɔ lɛ baanyɛ akpɛ eyiŋ akɛ lɛ diɛŋtsɛ ebaakane, aloo ebaanyɛ ebi nyɛmiyoo ni sa, ni abaptisi lɛ, ni le nikanemɔ jogbaŋŋ, ni eye ebua. Kɛ nyɛmiyoo ji mɔ ni kaneɔ lɛ, ehe ehiaŋ ni eha eyiteŋ, ejaakɛ esɔmɔɔɔ yɛ nitsɔɔmɔ gbɛhe mli. Shi kɛlɛ, ebaanyɛ efee nakai, kɛji nakai feemɔ baaha ehe ajɔ lɛ.

Yɛ Buu-Mɔɔ Nikasemɔ lɛ mli lɛ, eka shi faŋŋ akɛ abaana nyɛmimɛi hii ni sa ni amɛkane. Esa akɛ Buu-Mɔɔ Nikasemɔ nɔkwɛlɔ lɛ atsɔ hiɛ ato gbɛjianɔ kɛha mɛi ni baakane lɛ, ni akɛkpɛtɛ adafitswaa tao lɛ nɔ. Eji onukpai akuu lɛ fɛɛ gbɛnaa nii akɛ amɛhala mɛi ni akɛ nitsumɔ baawo amɛdɛŋ akɛ amɛkane nii yɛ Buu-Mɔɔ Nikasemɔ lɛ mli lɛ. Kɛji nyɛminuu ko nikanemɔ mli tseee jogbaŋŋ lɛ, esa akɛ Buu-Mɔɔ Nikasemɔ nɔkwɛlɔ lɛ aŋɔ hegbɛ lɛ ni ejɛ mlihilɛ mli ekɛ ŋaawoo kɛ yelikɛbuamɔ aha lɛ. Abaanyɛ atsake mɛi ni ahala ni amɛkaneɔ lɛ yɛ be kɛ bei amli kɛ ehe miihia, koni nikanemɔ lɛ mli atse tamɔ bɔ ni eyɔɔ daa lɛ. Kɛ ajie nyɛminuu ko kɛjɛ mɛi ni kaneɔ lɛ ateŋ lɛ, esa akɛ aha ele yiŋtoo hewɔ ni ajieɔ lɛ lɛ, kɛ sui ni esa akɛ etsu he nii koni ehe asa kɛha kanemɔ ekoŋŋ.

Kɛji aakane nii kɛmiiha kuu bibioo yɛ Asafo Woloŋ Nikasemɔ shishi loo kɛha asafo muu fɛɛ yɛ Buu-Mɔɔ Nikasemɔ mli jio, esa akɛ mɔ ni akɛ nitsumɔ nɛɛ ewo edɛŋ lɛ kɛ hiɛdɔɔ asusu ehegbɛ nɛɛ he. (1 Tim. 4:13) Esa akɛ ewie kɛ nɔmimaa, ni ekɛ ŋaalee akane nii lɛ bɔ ni ebaaha anu “jalɛ kɛ anɔkwale wiemɔi” lɛ ashishi jogbaŋŋ.—Jaj. 12:10.