Wolo Ni Jɛ Nɔyeli Kuu Lɛ Dɛŋ
Suɔmɔ Nyɛmimɛi Hii kɛ Yei:
Mɛɛ miishɛɛ kpele eji nɛkɛ akɛ wɔɔŋma nyɛ! Wɔmiijie nyɛyi yɛ suɔmɔ kɛ he-kɛ-afɔleshaa ni nyɛyaa nɔ nyɛjieɔ lɛ kpo lɛ hewɔ. Nyɛbaana yɛ Yearbook nɛɛ baafai lɛ amli akɛ atsu nitsumɔi kpakpai pii yɛ sɔɔmɔ afi ni ho lɛ mli. Shikome ekoŋŋ lɛ, wɔkɛ ŋmɛlɛtswai ni fa fe akpekpei akpe kome tsu nii yɛ shiɛmɔ kɛ nitsɔɔmɔ nitsumɔ lɛ mli, ni wɔwo gbɔmɛi hewalɛ tɛɛ koni amɛtsi amɛbɛŋkɛ Yehowa. Ani ejeee woo ni wɔna akɛ wɔɔfee wɔ anunyam Nyɔŋmɔ kɛ ŋwɛi Tsɛ lɛ hefatalɔi nitsulɔi?—1 Kor. 3:9.
Yɛ be mli ni wɔkwɛɔ nitsumɔ ni kã wɔhiɛ lɛ, wɔyɛ hekɛnɔfɔɔ akɛ nyɛbaaya nɔ nyɛkase ekãa kɛ hemɔkɛyeli ni Nyɔŋmɔ tsuji lɛ yɔɔ lɛ, taakɛ atsɔɔ mli yɛ Biblia amaniɛbɔɔ lɛ mli lɛ. Ákɛ nɔkwɛmɔnɔ lɛ, bɔfo Paulo miishwe akɛ ehe baasa bɔ ni eeenyɛ yɛ Maŋtsɛyeli nibii ni eeeha eya hiɛ lɛ mli. Eyɛ faŋŋ akɛ, eŋma eklɛŋklɛŋ wolo ni ekɛyaha Kristofoi asafo ni yɔɔ Korinto lɛ yɛ enaagbee afi ni eye yɛ Efeso lɛ mli. Beni ewieɔ gbɛjianɔ ni eto amrɔ nɔŋŋ lɛ he lɛ, eŋma akɛ: “Mibahi Efeso kɛyashi Pentekoste gbi lɛ nɔ. Ejaakɛ agbele shinaa kpeteŋkpele naa aha mi, ni nitsumɔ pii yɛ, shi mɛi ni kuɔ naa hu lɛ ayi fa.”—1 Kor. 16:8, 9.
Paulo eto gbɛjianɔ akɛ ebaafa gbɛ kɛya Makedonia kɛ Korinto. Shi kɛlɛ, eyoo akɛ hegbɛ naa egbele ni ekɛaatsu nitsumɔ ni he yɔɔ sɛɛnamɔ kɛtsɔ Efeso ni eeehi jɛmɛ be fioo lɛ nɔ. Paulo yɛ tswãa; ena shihilɛ kpakpa ni ebaanyɛ ekɛha Maŋtsɛyeli nibii lɛ aya hiɛ yɛ he ni eyɔɔ lɛ nɔŋŋ, no hewɔ lɛ, etsake egbɛjianɔtoo lɛ yɛ enɛ kɛ gbeekpamɔ naa. Agbele shinaa kpele ni nitsumɔ yɔɔ mli naa aha Paulo, ni eesumɔ koni ekɛ hegbɛ lɛ atsu nii yɛ gbɛ kpakpa nɔ.
Nakai feemɔ baabi nitsumɔ babaoo—yɛ sanekpakpa shiɛmɔ nitsumɔ lɛ kɛ Efeso asafo lɛ tswaa kɛ shimaa fɛɛ mli. Sɛɛ mli lɛ, Paulo kɛɛ hii onukpai ni yɔɔ asafo ni yɔɔ nakai maŋ lɛ mli lɛ akɛ: “Mishiuuu nii ni he yɔɔ sɛɛnamɔ ha nyɛ lɛ eko nɔ, ni mijaje mitsɔɔ nyɛ yɛ faŋŋ kɛ shia fɛɛ shia hu; ni miye tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli lɛ he odase mitsɔɔ Yudafoi kɛ Helabii fɛɛ lɛ.”—Bɔf. 20:20, 21.
Nakai nɔŋŋ nyɛteŋ nyɛmimɛi hii kɛ yei babaoo ni asumɔɔ lɛ eŋɔ hegbɛi ni naa egbele kɛha nyɛ lɛ. Yɛ sɔɔmɔ afi ni ho lɛ mli lɛ, kɛ aja mli lɛ, mɛi 798,938 nyɛ amɛto amɛshihilɛ he gbɛjianɔ bɔni afee ni amɛnyɛ amɛkɛ amɛhe awo gbɛgbamɔ sɔɔmɔ lɛ fã ko mli. Nyɛteŋ mɛi komɛi efa gbɛ kɛtee shikpɔŋ lɛ naagbeehei lɛ, bɔni afee ni nyɛyasɔmɔ akɛ maŋsɛɛ sanekpakpa shiɛlɔi. Nyɛkɛ ekãa miigbɛ sanekpakpa lɛ nyɛmiishwa ni nyɛmiitswa asafoi nyɛmiima shi. Nyɛteŋ mɛi krokomɛi hu ekase wiemɔ hee bɔni afee ni nyɛnyɛ nyɛye nyɛbua mɛi ni wieɔ maŋsɛɛ wiemɔ ni bɛŋkɛ nyɛ lɛ. Shi, mɛi krokomɛi hu eto amɛshihilɛ he gbɛjianɔ koni amɛyatsu nii yɛ shikpɔŋkuku ni akɛwoko mɔ ko dɛŋ lɛ mli loo ni amɛyasɔmɔ yɛ he ni hiamɔ lɛ da yɛ. Mɛi komɛi ena po akɛ agbele shinaa kpele ni nitsumɔ yɔɔ mli naa yɛ skul, nitsumɔhe, loo yɛ shihilɛi srɔtoi ní abaanyɛ aye odase ni mɔɔ shi yɛ mli lɛ mli, tamɔ kɛtsɔ tɛlifoŋ nɔ nɛkɛ. Niiashikpamɔi ni jɛ je lɛŋ fɛɛ lɛ etsɔɔ akɛ Nyɔŋmɔ webii, gbekɛbii kɛ onukpai fɛɛ kɛ miishɛɛ miitao hegbɛi koni amɛkɛ anɔkwale lɛ mli nilee lɛ aha gbɔmɛi ni yɔɔ he fɛɛ he.
Nyɛnaa nɔmimaa akɛ Yehowa naa nyɛmɔdɛŋbɔɔ lɛ ni ehiɛ sɔɔ waa. Nyɔŋmɔ Wiemɔ lɛ kɛɔ akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ.” (Heb. 6:10) Nyɛyaa nɔ ni nyɛhiɛ ahia nyɛhe nɔ yɛ hegbɛi ni haa nyɛnyɛɔ nyɛhaa anɔkwa jamɔ he nibii yaa hiɛ lɛ he. Ekolɛ, nyɛteŋ mɛi komɛi baanyɛ alɛɛ nyɛsɔɔmɔ nitsumɔ lɛ mli. Wɔ fɛɛ wɔbaanyɛ wɔbɔ mɔdɛŋ koni wɔha wɔsɔɔmɔ nitsumɔ lɛ amɔ shi babaoo.
Wɔtsuuu wɔshiɛmɔ nitsumɔ lɛ ni shitee-kɛ-woo fataaa he. Kaimɔ akɛ beni Paulo wie shinaa kpele ni nitsumɔ yɔɔ mli ni agbele naa lɛ he sɛɛ lɛ, eŋma akɛ: “Mɛi ni kuɔ naa hu lɛ ayi fa.” Kɛha Paulo lɛ, mɛi ni fata nakai shitee-kɛ-wolɔi lɛ ahe ji Yudafoi kɛ Jeŋmajiaŋbii, mɛi ni amɛteŋ mɛi komɛi tutua lɛ tɛɛ ni mɛi krokomɛi hu tsɔ ehe ŋaa yɛ teemɔŋ lɛ.—Bɔf. 19:24-28; 20:18, 19.
Wɔkɛ shihilɛ ni tamɔ nakai nɔŋŋ miikpe ŋmɛnɛ. Yɛ be mli ni wɔbɛŋkɛɔ nibii agbɛjianɔtoo nɛɛ naagbee lɛ, wɔmiikpa shitee-kɛ-woo babaoo gbɛ. Satan eyi obɔ kɛ ‘mlifu kpeteŋkpele,’ ni etsɔ nakai mlifu lɛ eha mɛi ni sɔmɔɔ Nyɔŋmɔ lɛ titri. (Kpoj. 12:12) Nyɛkahaa nyɛhiɛ kpaa nɔ kɔkɔɔkɔ akɛ Satan ji “je lɛŋ lumɔ lɛ.” Yesu kɛɛ ekaselɔi lɛ akɛ: “Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.”—Yoh. 14:30; 15:19.
Wɔtswa wɔfai shi akɛ wɔŋmɛŋ gbɛ ni mɔ ko mɔ ko agbɔjɔ hemɔkɛyeli ni wɔyɔɔ yɛ Nyɔŋmɔ mli lɛ loo eba wɔshiɛmɔ nitsumɔ lɛ shi. Wɔle akɛ mɛi komɛi baaya nɔ ni amɛtutua wɔ ni amɛtsɔ wɔhe ŋaa. Ni kɛlɛ, wɔmiaa wɔhiɛ yɛ Maŋtsɛyeli sanekpakpa shiɛmɔ nitsumɔ lɛ mli, ni wɔyɛ nɔmimaa akɛ Yesu baakpata Satan kɛ esafoi lɛ ahiɛ yɛ Yehowa be ni sa nɔ. Shitee-kɛ-wolɔi nyɛɛɛ atsĩ bɔfo Paulo naa. Ni amɛnyɛŋ amɛtsĩ Yehowa tsuji ni yɔɔ ŋmɛnɛ lɛ hu naa. Yɛ Satan mlifu lɛ kɛ je lɛŋ hetsɛ lɛ fɛɛ sɛɛ lɛ, Yehowa mumɔ lɛ miitsu nii waa yɛ E-webii lɛ anɔ. Mɛɛ miishɛɛ eji nɛkɛ akɛ wɔɔle akɛ mɛi ni jajeɔ sanekpakpa lɛ eyashɛ yifalɛ hee ni ji 6,304,645!
Wɔsɔlemɔ ji akɛ nyɛbaaya nɔ ni nyɛŋɔ hegbɛi ni yɔɔ lɛ koni nyɛkɛha Yehowa Maŋtsɛyeli ni yɔɔ nyam lɛ he nibii lɛ aya hiɛ. Nyɛnaa nɔmimaa yɛ bɔ ni wɔsumɔɔ nyɛ diɛŋtsɛ yɛ be mli ni wɔkɛ “gbee kome” sɔmɔɔ Ŋwɛiflooflo Nyɔŋmɔ, Yehowa lɛ he.—Zef. 3:9.
Nyɛnyɛmimɛi,
Yehowa Odasefoi a-Nɔyeli Kuu