Namɛi Baaná Enɛ He Miishɛɛ?
1. Kɛ́ wɔkane Buu-Mɔɔ kɛ Awake! lɛ, mɛni he esa akɛ wɔsusu, ni mɛni hewɔ?
1 Afeɔ Buu-Mɔɔ kɛ Awake! lɛ bɔni afee ni mɛi ni yɔɔ je lɛŋ hei srɔtoi fɛɛ aná he sɛɛ. No hewɔ lɛ, saji ni yɔɔ mli lɛ kɔɔ nibii srɔtoi babaoo ahe. Beni wɔkaneɔ saji ni yɔɔ mli lɛ ateŋ eko fɛɛ eko lɛ, esa akɛ wɔsusu mɛi pɔtɛ̃ɛ ni baaná he miishɛɛ lɛ ahe, koni no sɛɛ lɛ wɔbɔ mɔdɛŋ wɔkɛha nakai mɛi lɛ.
2. Mɛɛ saji ni wɔwoji tɛtrɛbii lɛ wieɔ he lɛ ahe baanyɛ aba sɛɛnamɔ aha mɛi krokomɛi?
2 Ani Buu-Mɔɔ hee ni eba lɛ wieɔ Biblia mli sane ko ni okɛ onaanyo nitsulɔ ko gba he sane etsɛko? Ani sane ko yɛ mli ni kɔɔ weku shihilɛ he ni he baanyɛ aba sɛɛnamɔ aha wekunyo ko? Ani ole mɔ ko ni miito gbɛjianɔ ni efã gbɛ kɛya maŋ ko ni awie he yɛ Awake! lɛ mli? Ani nitsumɔhei loo amralo lɛ nitsumɔhei komɛi ni yɔɔ nyɛshikpɔŋkuku lɛ mli lɛ baanya woji tɛtrɛbii lɛ ateŋ eko he? Akɛ nɔkwɛmɔnɔ lɛ, wolo tɛtrɛɛ ni wieɔ helatsamɔ he saji ahe lɛ he baanyɛ aba sɛɛnamɔ yɛ helatsamɔhei. Wolo tɛtrɛɛ ni wieɔ awuiyeli he lɛ, he baanyɛ aba sɛɛnamɔ aha nitsumɔhei ni kwɛɔ ni aye mla nɔ lɛ.
3. Gbaa niiashikpamɔ ko ni tsɔɔ sɛɛnamɔ ni yɔɔ woji tɛtrɛbii pɔtɛ̃ɛ komɛi ni wɔkɛaaha mɛi ni wɔsusuɔ akɛ nɔ ni aŋma yɛ mli lɛ he baanyɛ aba sɛɛnamɔ aha amɛ lɛ.
3 Nɔ ni Jɛɔ Mli Kɛbaa: Beni wu kɛ ŋa ko ni ji Yehowa Odasefoi ni yɔɔ South Africa lɛ nine shɛ October 2011 Awake! lɛ ni wieɔ “How to Raise Responsible Children” (Bɔ ni Aaafee Atsɔse Bii ni Amɛtsu Amɛsɔ̃i ahe Nii) lɛ he lɛ nɔ lɛ, amɛtswa skul srɔtoi 25 ni yɔɔ amɛsafo lɛ shikpɔŋkuku lɛ mli lɛ. Amɛmli 22 kpɛlɛ ni aha amɛ woji lɛ eko ni amɛjara amɛha amɛskulbii lɛ. Wu kɛ ŋa kroko ni yɔɔ nakai maŋ lɛ nɔŋŋ mli lɛ hu ná nakai jwɛŋmɔ, ni amɛha skul srɔtoi ni yɔɔ amɛshikpɔŋkuku lɛ mli lɛ eko. Tsɔɔlɔi ni yɔɔ skul srɔtoi nɛɛ ateŋ ekome mli lɛ kpɛ mli akɛ amɛkɛ wolo lɛ baatsu nii yɛ gbɛjianɔ ni amɛto kɛha skulbii lɛ anitsɔɔmɔ kɛ nikanemɔ daa otsi lɛ mli. Gbalashihilɛ mli hefatalɔi nɛɛ gba kpokpaa nɔkwɛlɔ ko amɛniiashikpamɔ lɛ. No sɛɛ lɛ, ewo asafoi ni yɔɔ ekpokpaa lɛ mli lɛ hewalɛ koni amɛya skul srɔtoi ni yɔɔ amɛshikpɔŋkukuji lɛ amli lɛ mli. Mɛi babaoo bi ni nitsumɔhe nine lɛ aha amɛ woji tɛtrɛbii lɛ eko afata he, ni enɛ ha ebi ni asaa akala ekomɛi ekoŋŋ!
4. Mɛni hewɔ wɔsumɔɔ ni mɛi babaoo anine ashɛ wɔwoji tɛtrɛbii lɛ anɔ lɛ?
4 Wɔwoji tɛtrɛbii lɛ tsɔɔ shihilɛ ni yaa nɔ ŋmɛnɛ lɛ mli, kɛ nɔ ni esa akɛ wɔkase kɛjɛ mli, ni egbalaa jwɛŋmɔ kɛyaa Biblia lɛ kɛ Nyɔŋmɔ Maŋtsɛyeli lɛ nɔ. No mɛi pɛ ji woji tɛtrɛbii ni yɔɔ je lɛŋ ni “shiɛɔ yiwalaheremɔ.” (Yes. 52:7) No hewɔ lɛ, wɔmiisumɔ ni wɔha mɛi babaoo anine ashɛ eko nɔ. Gbɛ ni hi jogbaŋŋ ni oootsɔ nɔ ofee nakai ji, ni obi ohe akɛ, ‘Namɛi baaná enɛ he miishɛɛ?’