Ná Hesai Pii yɛ Shiɛmɔ Nitsumɔ lɛ Mli—Ye Obua Mɔ ni Okɛnyiɛ Shiɛmɔ nɔ Lɛ

Nɔ Hewɔ ni Ehe Hiaa: Yesu na akɛ sɛɛnamɔ yɛ he akɛ mɔ ko baafata ohe kɛshiɛ. No hewɔ lɛ, be ni Yesu tsu mɛi 70 lɛ kɛtsɔ ehiɛ ni amɛyashiɛ lɛ, etsu amɛ enyɔnyɔɔnyɔ. (Luka 10:1) Kɛ́ mɔ ko fata ohe kɛtee shiɛmɔ ni okɛ shihilɛ ko ni wa kpe loo mɔ ko bi bo sane ko ni onyɛɛɛ ohã hetoo lɛ, mɔ ni okɛnyiɛ lɛ baanyɛ aye ebua bo. (Jaj. 4:9, 10) Ebaanyɛ egba bo eniiashikpamɔ loo yɛ bei komɛi amli lɛ ewo bo ŋaa ni baanyɛ aye abua bo ni ohe asa yɛ shiɛmɔ nitsumɔ lɛ mli. (Abɛi 27:17) Agbɛnɛ hu, ebaanyɛ ewo bo hewalɛ be ni nyɛjɛɔ shĩa kome kɛyaa ekroko mli ni nyɛgbaa sane lɛ.—Fil. 4:8.

Bɔ ni Obaafee lɛ Ohã:

Bo toi be ni mɔ ni okɛnyiɛ lɛ shiɛɔ lɛ. (Yak. 1:19) Kɛ́ eekane ŋmalɛ lɛ nyiɛmɔ nikanemɔ lɛ sɛɛ yɛ o-Biblia lɛ mli. Enɛ baahã onyɛ oye obua lɛ kɛ́ ehe bahia.
Okɛ hiɛshikamɔ atsu nii koni ona kɛ́ ehe miihia ni okɛ ohe awo sanegbaa lɛ mli kɛ be ni esa akɛ ofee nakai. (Abɛi 25:11) Kɛ́ ofata shiɛlɔ kroko he kɛmiifee Biblia mli nikasemɔ lɛ, mɔ lɛ baanya he waa kɛ́ okɛ ohe wo sanegbaa lɛ mli yɛ be kɛ beaŋ. Kɛ̃lɛ, kɛ́ nyɛmiishiɛ yɛ shĩa fɛɛ shĩa lɛ, ekolɛ mɔ ni okɛnyiɛ lɛ baasumɔ ni lɛ hu eshiɛ kɛ́ eshɛ enɔ. Shi kɛ́ eji shiɛlɔ hee, loo elé bɔ ni ebaahã sane ko hetoo loo nɔ ni ebaakɛɛ yɛ sane ko ni awie ashi wɔ lɛ he lɛ, no lɛ, ekã shi faŋŋ akɛ kɛ́ oye obua lɛ lɛ ebaanya he waa. Shi kɛ́ ofata mɔ ko he ni nyɛmiishiɛ yɛ shĩa fɛɛ shĩa jio, nyɛmiifee sɛɛkuu-kɛsaramɔ loo Biblia mli nikasemɔ jio lɛ, esaaa akɛ ofolɔɔ mɔ lɛ wiemɔ mli kɛ́ eewie, oheɔ sane lɛ yɛ enaa loo ojeɔ sane kroko shishi.
Gbaa lɛ oniiashikpamɔi. Kɛ́ ona bei komɛi akɛ obaanyɛ owo shiɛlɔ ni fata ohe lɛ ŋaa ko ní baaye abua lɛ ni ehe asa yɛ shiɛmɔ nitsumɔ lɛ mli lɛ, kaakama lɛ. (Abɛi 3:27) Kɛ́ ona akɛ esa akɛ ofee nakai yɛ be ko mli lɛ, ekolɛ obaanyɛ oje shishi akɛ: “Te ona bɔ ni ofee lɛ lɛ ohã tɛŋŋ?” aloo “Ani manyɛ matsɔɔ mijwɛŋmɔ?” aloo “Bei pii lɛ, nɔ ni mifɔɔ feemɔ nɛ.” Hã ehi ojwɛŋmɔŋ akɛ, mɛi komɛi kpɛlɛɔ ŋaawoo nɔ bei komɛi, shi kɛ́ awo amɛŋaa yɛ tɔ̃mɔ fɛɛ tɔ̃mɔ he lɛ, amɛnijiaŋ jeɔ wui.

Kaa Enɛ Okwɛ yɛ Nyɔɔŋ Nɛɛ Mli:

Be ni okɛ mɔ ni fata ohe kɛshiɛɔ lɛ etsu nii yɛ shiɛmɔ nitsumɔ lɛ mli sɛɛ lɛ, hã ele nɔ ko ni ekɛɛ loo efee ní hã ebafee hefatalɔ yelikɛbualɔ.